لكل الناس اللي بتعمل ريجيم، ونفسهم ياكلوا بيتزا لكن خايفين إنها تؤثر على نظامهم الغذائي.. النهارده على "سفرة دايمة" هنعمل بيتزا دايت جامدة جدا، بسعرات حرارية قليلة، ممكن ناكلها في اليوم الفري. بيتزا دايت المقادير: * 3 كوب دقيق * كوب لبن منزوع الدسم * 3 ملعقة صغيرة زيت نباتي * ملعقة كبيرة بيكينج باودر * 1/ 2 ملعقة صغيرة ملح * ملعقة صغيرة خميرة * سكر مقادير الحشو: * 1/ 4 كيلو شرائح جبنة موتزاريلا لايت (موجودة في السوبر ماركت) * 2 ملعقة كبيرة كاتشاب دايت * 2 ثمرة طماطم مقشّرة ومفرومة * بصلة متوسطة مقطّعة حلقات * ثمرة فلفل أخضر مقطّعة حلقات * 1/ 2 ملعقة صغيرة زعتر * زيتون أسود الطريقة: 1- لتحضير العجينة، اخلطي كل المكونات بتاعتها مع بعض في طبق كبير لغاية ما المكونات كلها تتجانس مع بعض. 2- بعد كده زوّدي العجينة تدريجيا بمقدار كوب ميه مع تقليب العجينة باستمرار. 3- غطّي العجينة وسيبيها في مكان دافئ لمدة ساعة علشان تتخمّر وتترفع. 4- هاتي الصينية اللي هتعملي فيها البيتزا، ورشّي فيها كمية صغيرة من الدقيق، وافردي العجينة فيها بحيث إن سُمكها يبقى تقربيا 1/ 2 سم، ودخّليها الفرن على درجة حرارة 200 لمدة 10 دقائق وبعدين طلّعيها. 5- افردي الكاتشاب على العجينة، وبعد كده رشّي عليها الزعتر، وعلى الوش وزّعي الطماطم والبصل والفلفل والزيتون. 6- تقدري تضيفي كمان أي أكلات لايت تحبّيها؛ يعني ممكن تحطّي قطع فراخ مسلوقة أو تونة دايت، وفي الآخر ضيفي شرائح الجبنة الموتزاريلا. 7- دخّلي الصينية في الفرن مرة تانية لمدة 10 دقائق تقريبا، لغاية ما الجبنة تذوب.. وبالهنا والشفا.
خلصت وصفتنا النهارده.. استنونا كل يوم مع وصفات جديدة.. سلام،،،