عايزة تعرفي بشرتك حساسة ولّا لأ.. بشرتك حساسة ومش عارفة تستخدمي لها إيه.. وإيه هي الماسكات اللي بتناسب بشرتك الحساسة؟! البشرة الحساسة على الرغم إنها نادر إن يظهر عليها بثور أو حبوب، لكنها مُعرّضة إنها يظهر عليها بقع حمرا، وبتبقى سريعة الالتهاب؛ علشان كده لازم تكوني حريصة جدا في التعامل معاها... تابعوني في حلقة النهارده من "جمالك من الطبيعة مع رانيا" على "قمر 14"؛ علشان نعرف مع بعض إزاي ممكن نتعامل مع البشرة الحسّاسة، وإيه الماسكات المناسبة لها... إزاي أعرف إن بشرتي حسّاسة؟! البشرة الحساسة لو حطينا عليها مثلا نقطة عسل أبيض في أي حتة، وسبناها لمدة نصف ساعة ممكن تسبب إحمرار أو التهاب، كمان لو استخدمتِ ماركات ماكياج مش مضمونة بتسبّب التهاب للبشرة بسرعة؛ لأن البشرة دي بتكون ضعيفة جدا والزيوت فيها قليلة، وهي بتكون قريبة للمنطقة اللي تحت العيون؛ لأنها بتعتبر أضعف منطقة في الوش، وعلشان كده لازم أصحاب البشرة الحساسة يتعاملوا معاها بحرص جدا. الروتين اليومي للتعامل مع البشرة الحسّاسة الصبح.. اغسلي وشك بصابون أو غسول مخصوص للبشرة الحساسة، والمنتجات دي متوفّرة جدا بس في الماركات الكبيرة. ولو عايزة غسول من المواد الطبيعية؛ يبقى ممكن تغلي ردة، وتاخدي الميه بتاعتها، وتغسلي بها وشك كل يوم، ودي بترطّب وتنظّف وتغذّي، كمان تقدري تستخدمي غسول الكاموميل، وكل اللي عليكي علشان تحضّريه إنك تجيبي الكاموميل وتغليه كويس، وبعد كده تصفّيه وتحطّيه في التلاجة، وتستخدميه يوميا، والغسول ده بيهدّي البشرة جدا وبيرطّبها، وممكن تستخدميه بعد ما تغسلي وشك بالصابون علشان يهدّي البشرة، وممكن تضيفي معاه مية ورد؛ يعني مثلا لو عندك كوب مية كاموميل ممكن تضيفي عليه ملعقة مية ورد مخففة. بعد كده ممكن تستخدمي الخيار مع البشرة الحساسة، ولكن يكون معاه إضافات تانية؛ لأن البشرة الحسّاسة بتكون مسامها منقبضة جدا؛ فهتحتاجي إضافات تانية مع الخيار علشان يحافظ على المسام دي ويرطّبها أكتر، وعلشان كده ممكن نضيف معاه لبن وتكون نسبة الخيار أقل من اللبن. بالليل.. اغسلي وشك بنفس الطريقة، وبعدين ادهني بشرتك بزيت اللوز أو خليط من زيت اللوز الحلو وزيت جنين القمح، وممكن تخلطي زيت الزيتون مع قطعة من أي كريم مرطب مناسب لنوع بشرتك، ومن الكريمات اللي بتناسب البشرة الحسّاسة هي الكريمات اللي بتكون بخلاصة الجزر أو الكاموميل. إزاي ممكن نستخدم الماكياج مع البشرة الحسّاسة بشكل آمن؟ أولا.. أنا بانصح أي بشرة إنها تحط ماكياج يكون معلوم المصدر، وبلاش الأنواع اللي بتكون مش معروف مصدرها أو جودتها؛ فالأفضل إننا نستخدم ماكياج يكون سعره مناسب، بس في نفس الوقت يكون معلوم مصدره ومضمون، وأهم حاجة لازم نبقى حريصين إننا ما نجهدش البشرة بكتر الماكياج، ويا ريت نبعد تماما عن استخدام البودرة المائية مع البشرة الحسّاسة، وعموما أنا ما بانصحش بالبودرة المائية مع أي نوع بشرة، لكن فيه أنواع بشرة ممكن تتحمّلها؛ زي: الدهنية أو المختلطة، لكن مع البشرة الحساسة هتجهدها جدا، وعلشان كده لازم أي ماكياج هنستخدمه يكون ناعم جدا؛ سواء كريم الأساس أو البودرة تكون خفيفة وناعمة، ولازم لمّا نيجي نحط البودرة مانمسحش البشرة بعنف، والأفضل إننا نحط البودرة بطريقة الطبطبة أو التربيت الخفيف على البشرة. ماسكات طبيعية للعناية بالبشرة الحسّاسة اللبن والزبادي لترطيب البشرة: دايما لازم نهتم إننا نرطّب البشرة الحساسة باللبن أو بالزبادي المخلوط مع ملعقة عسل، وبلاش نسيبه على البشرة لفترات طويلة؛ يعني ممكن نكتفي بربع ساعة، وبعدين نشطف الوش كويس أوي. الموز والجزر لتهدئة البشرة الحسّاسة الموز من الحاجات المفيدة للبشرة الحساسة، وده ممكن نخلطه مع اللبن، وممكن نضيف له ملعقة عسل أو لأ على حسب رغبتك، وبعدين نحطّه على البشرة، والماسك ده بيهدّي البشرة جدا. ومن الحاجات المفيدة جدا للبشرة الحساسة هي خليط الجزر مع اللبن أو مية الجزر فقط، واللي بنحصل عليها بعد ما نغلي الجزر، وده بيهدّي البشرة جدا، وكمان النشا مع الميه ومية الورد يعتبروا ماسك هايل جدا للبشرة الحساسة. وممكن نعمل الماسكات دي كلها في أي وقت من اليوم، أو بعد ما نرجع من أي مشوار، بس أهم حاجة إننا مانسيبش الماسكات دي أكتر من 15 : 20 دقيقة، وده على الأكتر، وبعدين نشطف وشنا كويس أوي. البشرة الحسّاسة كمان بتنفع معاها أوي منتجات الأطفال الخاصة بالبشرة فقط، لكن بالنسبة لمنتجات الشعر بتختلف تماما، وماينفعش إن الكبار يستخدموها.
خلصت حلقتنا النهارده.. استنونا كل أسبوع مع حلقة جديدة.. وأفكار وماسكات جديدة.. سلام،،، ********************* للرجوع للحلقات السابقة اضغط هنا "جمالك من الطبيعة مع رانيا" *********************
