الروتين اليومي للحفاظ على صحة البشرة والشعر

الأسبوع اللي فات عرفنا مع بعض ماسكات كتيرة لعلاج مشاكل البشرة المختلفة اللي كنتم دايماً بتشتكوا منها..
وفي عدد النهارده هنكمّل مع بعض وصفات "رانيا موسى" خبيرة التجميل بالأعشاب والمواد الطبيعية اللي نصحت بها لعلاج مشاكل الشعر المختلفة..
الأفوكادو لنقاء البشرة وتغذية الشعر
الأفوكادو ثمرة مفيدة جداً للبشرة؛ لأنها بتضيف حيوية ونضارة على البشرة وبترطبها وبتمنع الشوائب من إنها تدخل في مسام البشرة، وبالنسبة للشعر فالأفوكادو يعتبر علاج للشعر الجاف والمجعد؛ لأنه بيحتوي على نسبة كبيرة من الفيتامينات اللازمة للشعر، وتقدري تجيبي "الأفوكادو" من السوبر ماركت الكبيرة أو من منافذ بيع وزارة الزراعة..
الأفوكادو مفيد جداً للبشرة والشعر
ودي مكوّنات ماسك "الأفوكادو" للبشرة:
نصف ثمرة أفوكادو "طرية"
معلقة عسل نحل
مغلي زهرة الكاموميل "الشيح"
الطريقة:
قشّري ثمرة البابونج، وشيلي البذرة اللي فيها وخدي القلب بتاعها، واخلطيه مع العسل ومغلي الكاموميل، وحطي الماسك ده على بشرتك وسيبيه لمدة ساعة وبعد كده اشطفيه بالماء الفاتر.
ولو عايزة تعملي به حمام كريم لشعرك ممكن تعملي نفس الطريقة بنفس المكوّنات دي، بس تضيفي عليهم كمية من حمام الكريم اللي بتستعمليه، وتقدري كمان تعملي به حمام زيت بإنك تضيفي على نفس المكونات اللي فاتت مجموعة زيوت مغذية زي زيت السمسم وزيت الجرجير.
يعني ممكن بمنتهى البساطة إننا نعمل الماسك ونحط منه كمية على بشرتنا، وبعد كده نضيف على الجزء الباقي حمام الكريم أو الزيوت وتحطي منه على شعرك.
ملحوظة:
مغلي الكاموميل ده بتعمليه بإنك تجيبي زهرة الكاموميل وتغليها كويس أوي مع شوية مية على النار، والمية اللي بتطلع دي هي اللي بتستخدميها في الماسكات.
بالنسبة لثمرة "الأفوكادو" فلازم تكون طرية، ولو اشترتيها وكانت ناشفة شوية ممكن تسيبيها شوية بره الثلاجة علشان تطرى.
القهوة مفيدة جداً لعلاج مشكلة تساقط الشعر
تساقط وتقصيف الشعر
لعلاج المشاكل دي، نصحت "رانيا" بعمل حمام زيت للشعر عبارة عن خليط من زيت الثوم وزيت الجرجير وزيت جوز الهند، وبنسيب الخليط ده على شعرنا لمدة 3 ساعات، وبعد كده نغسل الشعر الشامبو المناسب، وبنكرر حمام الزيت 3 مرات في الأسبوع.
أما بقى بالنسبة للناس اللي عندها تقصيف في شعرها من الأمام من عند الجبهة، فبتنصحهم "رانيا" بضرورة تدليك فروة الرأس بزيت حبة البركة المعصورة على البارد، وبنكرر الموضوع ده يوم ويوم، مع عمل حمام الزيت السابق، وكمان أكّدت "رانيا" على ضرورة قص الشعر بشكل دوري للتخلّص من مشكلة التقصيف.
وأضافت "رانيا" إن القهوة كمان مفيدة جداً لعلاج مشكلة تساقط الشعر؛ بسبب مادة الكافيين اللي موجودة فيها، وإن فيه شركات عالمية دلوقتي بتتجه إنها تعمل شامبوهات بمادة الكافيين.
هيشان الشعر
لو كنت بتعاني من هيشان شعرك، فعليكِ بعمل حمامات الزيت أو الكريم اللي بتحتوي على عسل النحل، وبعد غسيل الشعر ندلكه بنقطة أو نقطتين من أي زيت للشعر.
قشرة الشعر
للتخلّص من مشكلة قشرة الشعر ممكن تجيبي زهرة الكاموميل "الشيح"، وتغليها في شوية مية مع زعتر وروزماري، وبعد كده تصفيهم وتاخدي الميه وتدلكِ بها فروة راسك كويس وتسيبيه على شعرك لمدة ساعة، وبعد كده اشطفي شعرك بالمية الباردة.
الحنة هي أكتر الحاجات الطبيعية التي تساعد على التخلّص من الشعر الأبيض
الشعر الأبيض بسبب الصبغات
الحنة هي أكتر الحاجات الطبيعية اللي ممكن تساعدنا على التخلّص من مشكلة ظهور الشعر الأبيض؛ ولكن علشان الحنة تعمل نتيجة كويسة وتدينا لون كويس لازم نضيف عليها وسط حمضي زي الخل الأبيض أو الليمون، وبنضيف عليها كمان زهرة كاموميل أو قرنفل مطحون أو مغلي، وبنحط الخليط ده على شعر نضيف جداً، وبنسيبه لمدة طويلة على الشعر وبعد كده نغسل الشعر كويس جداً من آثار الحنة.
فرد الشعر المجعّد
نصحت "رانيا" بعمل حمامات بزيت الحلبة أو زيت جوز الهند لفرد تموجات الشعر، لكن مع ضرورة المواظبة عليها.
الروتين اليومي للمرأة العاملة
خصصت "رانيا" جزءاً من وقت الندوة للحديث عن الروتين اليومي الخاص بالمرأة العاملة التي تحافظ به على جمال وصحة وحيوية بشرتها، وأعطت عدة نصائح منها:
1- ضرورة عمل ماسكات خفيفة وسريعة لترطيب البشرة ونضارتها بشكل يومي أول ما يصحوا من النوم وقبل ما يخرجوا، فمثلاً بالنسبة لأصحاب البشرة الجاف ممكن يمسحوا بشرتهم قبل ما ينزلوا بقطنة مبللة باللبن الساقع، ويسيبوه على بشرتهم وبعد كده يغسلوه بمية فاترة قبل ما ينزلوا، أما أصحاب البشرة الدهنية أو المركبة فممكن يعملوا نفس الطريقة، ولكن يستبدلوا اللبن الساقع بعصير الخيار، أما أصحاب البشرة الحساسة فيستخدموا عصير الجزر.
2- ولو ما فيش وقت لعمل عصير الجزر أو الخيار، ممكن نعمل منهم كمية ونحطها في أي زجاجة عطر بالبخاخ، ونحتفظ بها في الثلاجة ونرش منها على بشرتنا كل ما نحتاج، بس ناخد بالنا إن أقصى وقت ممكن نحتفظ فيه بالعصائر دي في الثلاجة هو من 4 إلى 5 أيام، في حالة إن الخيار والجزر يكون طازة وفي حالة جيدة.
3- الاكتفاء بميك أب خفيف لفترة الصبح؛ لأن الميك أب وكريم الأساس التقيل ممكن يعمل بقع على البشرة، وخصوصاً مع التعرّض للشمس، ونصحت باستخدام البودرة السايبة؛ لأنها بتكون أخف على البشرة من البودرة المضغوطة.
4- استخدام الصن بلوك المناسب لنوع البشرة قبل التعرّض للشمس، ونصحت باستخدام صن بلوم فوتو ديرم
5- الاهتمام بالنظافة الشخصية لأقصى درجة، وأن الاستحمام يجب أن يكون بشكل يومي، ومن الأفضل لو كان مرتين في اليوم سواء في الصيف أو الشتاء.
المشمش له فوائد كتيرة جداً للبشرة والشعر
كما أكّدت على ضرورة الاهتمام بالتغذية الصحية والمتوازنة للحفاظ على صحة ونعومة الشعر والبشرة، ونصحت بضرورة اتباع روتين غذائي يحتوي على:
* 3 لتر من الماء طول اليوم.
* كوب لبن الصبح وبالليل، وبالنسبة للناس اللي بيتبعوا ريجيم ممكن ياخدوا لبن خالي الدسم.
* كوب زبادي الصبح وبالليل.
* عصائر فريش زي الخروب والتمر والكركديه والدوم، والتقليل من المشروبات الغازية.
* المشمش سواء كان فاكهة طازة أو عصير؛ لأن المشمش له فوائد كتيرة جداً للبشرة والشعر، ولو هنشربه عصير يبقى ناخد 4 أكواب في اليوم.
اقرأ أيضاً:
الحل لكل مشاكل بشرتك بطرق طبيعية مع "رانيا موسى"

وبهذه النصائح ختمت "رانيا موسى" ندوتها عن العناية بالبشرة والشعر..
ونتمنّى إننا نكون جاوبنا على كل أسئلتكم الخاصة بالبشرة والشعر..
إلى اللقاء،،،