بالفيديو.. ماكياج سواريه بخطوات بسيطة ومن غير تكلّف

أهلا بكم في حلقة جديدة من "أبيض وألوان مع ريهام"، النهارده هنعرف مع بعض إزاي نعمل ماكياج سواريه شيك وفي نفس الوقت يكون بسيط ومميز من غير تكلّف..
كريم الأساس
أول حاجة بنحط كريم الأساس، واللي بيكون بنفس لون البشرة، وفي ماكياج السواريهات لو هنلبس فستان مفتوح شوية، لازم نوزع كريم الأساس على الرقبة كمان علشان تدّينا نفس اللون، ويبقى شكلنا طبيعي.
الكونسيلر
هنحط كونسيلر فوق العين؛ لأن الكونسيلر بيساعد على تثبيت الآي شادو أكتر، أما تحت العين هنحط بودرة سايبة زيادة شوية علشان لو فيه أي حاجة وقعت من الآي شادو ماتعملش ألوان.
ماكياج العين
أول حاجة هنعملها في رسمة العين هي إننا بنحط كحل أسود عادي على الجفن المتحرك، وبعد كده بنسيّحه باستخدام قطن الأذن علشان يدّي لون هادي.
بعد كده هنحط لون آي شادو رمادي على الكحل فوق الجفن المتحرك فقط، ونحاول إننا نحطه بطريقة الطبطبة بالفرشة علشان اللون يبقى أقوى، وبعد كده هننظّف الفرشة كويس من اللون، ونمشّي على أطراف الآي شادو علشان نسيّحه ويبقى أهدى، وكمان نحاول نفتح عينينا ونسيّح الآي شادو في المنطقة اللي فوق العين علشان يبقى واضح والعين مفتوحة.
في المنطقة اللي فوق الجفن المتحرك عند زاوية العين، هنحط فيها آي شادو مزيج من اللون البني مع البرتقالي ونسيّحه مع الشادو الرمادي علشان يعمل مزيج حلو مش مجرد خطوط من الألوان فوق العين، وبعدين هنحط لون أبيض خفيف تحت الحاجب علشان يدي إضاءة للعين، هاختار لون قوي شوية، وأحط منه في المنطقة بين الآي شادو الرمادي والأبيض عند زاوية العين، وبعدين أسيّح الألوان مع بعضها.

إضغط لمشاهدة الفيديو:
تحديد العين بالكحل والآي لاينر
بعد كده هنرسم العين بالكحل أو بالآي لاينر، وأنا بافضل الآي لاينر الجل؛ لأن لونه مش لامع، وكمان بيتناسب مع الجو الحار ومابيسيحش، هنحط خط من الآي لاينر، وبعد كده نسيّحه بإسفنجة أو فرشة ويكون فيها آي شادو أسود بسيط، ونمشي على خط الآي لاينر ونسيّحه مع باقي الجفن، وده بيخلّي نظرة العين فيها تركيز أكبر.
الكحل اللي هستخدمه النهارده هيبقى باللون الأزرق، وده علشان يليق مع لون الفستان، وكمان هيدّي ضي حلو للعينين، وباحطّه على الجفن السفلي من جوه، وبعدين نسيّحه بالإسفنجة.
بعد ما نخلّص رسمة العين، هنشيل البودرة اللي تحت العين بالفرشة، وبعدين نحط الماسكرا ونثقّلها شوية، ونسرح الرموش كويس علشان ماتكلكعش فيها الماسكرا، والرموش السفلية هنحط عليها لمسة خفيفة من الماسكرا.
رسمة الشفايف
بنحدّد الشفايف كلها من الداخل والخارج ومن فوق وتحت بلون قريب من لون الشفايف، وبعدين نستخدم قطن الأذن ونسيّح به التحديد كويس على الشفايف؛ والطريقة دي بتدّي ثبات أكتر للروج.
بعد كده هنحط عليه روج باللون البمبي، وبعدين هنستخدم قلم تحديد رفيع بلون قريب من لون الروج، ونحط منه فوق الروج علشان نثبّته أكتر، وبعدين في الآخر هاحط الملمّع بس مايكونش لامع أوي، ومش هنحطه على كل الشفايف؛ لكن في المنتصف فقط.
أحمر الخدود
هنعمل مزيج من اللون البني مع اللون المشمشي، وبعدين نحطّه على عظمة الخد بالطريقة اللي اتعودنا عليها، وهي إننا بنفتح صوابعنا على شكل سبعة ونحط البلاشر بين فتحة الصوابع.
فيه طريقة حلوة ممكن نعملها في الخدود، وهي إننا بنجيب آي شادو أبيض ونحط منه على الأطراف الداخلية للبلاشر، ودي بتدي شكل حلو وإضاءة للوش.
بعد كده بنجيب بودرة لامعة أو لون برونزي، ونحط منه على أطراف البلاشر الخارجية، وكمان عند منابت الشعر، وده هيدي مظهر حلو أوي وهيحدد الوش ويبرزه.
رسمة الحواجب
أول حاجة هنسرّح الحواجب بالمشط الخاص بالحواجب، وبعدين نرسمها ببودرة الحواجب بشكل خفيف فوق رسمة الحواجب نفسها علشان ما تعملش شكل مصطنع ومبالغ فيه.
آخر خطوة هنعملها هي إننا بنستخدم بودرة لامعة بسيطة ونمشي بيها على كل الوش والرقبة، ودي بتدي شكل منور ومضيء للوش.

إضغط لمشاهدة الفيديو:


مفاجأة سارة لكل بنات وعرايس "قمر 14"

خبيرة التجميل/ ريهام جهاد
بتقدّم خصم خاص جدا على الماكياج وربطة الطرحة لكل المناسبات
كل اللي عليكِ إنك لما تيجي تحجزي تقولي إنك..
صديقة "قمر 14"



خلصت حلقتنا النهارده..
تابعونا دايما علشان لسه عندنا حلقات وأفكار جامدة..
في انتظار آرائكم وتعليقاتكم،،،