كتبت: رحاب سليمان زي ما بنحرص دايما إنك تكوني متألّقة ومتميّزة في سفرتك وعزوماتك.. حبينا كمان إننا نساعدك علشان تكوني ست بيت مدبّرة تعرفي إزاي توفّري.. علشان كده عددنا النهارده من "سفرة دايمة" هنعرّفك فيه إزاي تعيدي استخدام بواقي الأكل اللي بيفضل مِن عزوماتك؛ علشان تستفيدي منه مرة تانية، وتقدّميه بشكل جديد بدل ما ترميه.. ودلوقتي تعالي نتعرّف على بعض الأفكار البسيطة اللي ممكن تستخدمي فيها أي بواقي أكل عندك.. ممكن تضيفي قطع الفراخ الباقية لصواني النجرسكو والأرز بالبشاميل بواقي الفراخ دلوقتي هنشوف أكتر من طريقة ممكن نستخدم فيها بواقي الفراخ: - اعملي بها سلطة.. ممكن تقطّعي بواقي الفراخ، وتضيفي عليها مكوّنات السلطة، وتعملي طبق سلطة خضراء بالفراخ، وتقدري كمان تضيفي قطع الفراخ على سلطة الكول سلو. وممكن تعملي سلطة فراخ بإنك تضيفي عليها خليط من المايونيز وعصير الليمون والفلفل الأسود والكرفس واللوز المحمص. - دخليها مع الصواني.. ممكن تستخدمي قطع الفراخ الباقية، وتضيفيها مع صواني النجرسكو والأرز بالبشاميل، وكمان تقدري تحطّيها على البيتزا أو تحشي بها السمبوسة. - اعملي طاجن فراخ بلسان العصفور.. ممكن تشوّحي قطع الفراخ مع بصل مفروم، وتحطّي عليها لسان عصفور محمّر، وتقلّبيهم مع بعض، وبعد كده بتضيفي عليهم شوربة وعصير طماطم، وسيبيهم على النار لغاية ما يغلوا، وبعد كده حطّي كل المكوّنات دي في طاجن، وقطّعي على الوش شرائح طماطم ودخّليه الفرن. - أبدعي بها مع البطاطس.. ممكن تفرمي قطع الفراخ المسلوقة الباقية عندك، وتشوّحيها مع شوية بصل، وتحشي بها البطاطس بدل اللحمة المفرومة، أو تقلّبيها مع البطاطس المهروسة، وتعملي من الخليط ده أقراص، وتغمّسيها في بيض مع ملح وفلفل، وبعد كده قلّبي الأقراص دي في البقسماط، وبعد كده اقليهم في الزيت. - ضيفيها مع شوربة العدس.. طبعا هتستغربي أوي؛ لأننا مش متعوّدين إننا نضيف الفراخ مع العدس، لكن بجد لو جربتيه هتلاقي طعمه تحفة، لأن قطع الفراخ هتضيف نكهة حلوة وجديدة للعدس، وكمان هيبقى طبق متكامل ومغذّي جدا، وكل اللي عليكِ إنك تضيفي قطع الفراخ المسلوقة المتبقية عندك على شوربة العدس قبل ما تطفي عليها.
ممكن تعملي فاهيتا لحمة بأي بواقي عندك بواقي اللحمة اللحمة من أكتر الحاجات اللي بيكون صعب علينا إننا نرمي البواقي بتاعتها؛ بسبب أسعارها الغالية جدا اللي كلنا بنعانيها؛ علشان كده النهارده هاقول لكم على طرق كتيرة جدا ممكن تستخدمي فيها بواقي اللحمة: - اعملي وجبة خفيفة.. ممكن تقطّعي اللحمة المتبقية، وتشوّحيها على النار مع أي أنواع خضار تحبّيها، وتحطّي عليها صويا صوص وزنجبيل وكمية صغيرة من أي زيت نباتي عندك، وتبّليهم بشوية ملح وفلفل أسود وأي بهارات تحبّيها، وتعملي جنبها بطاطس محمّرة وسلطة خضراء، وتبقي بكده عملتي وجبة خفيفة. - اعملي فاهيتا لحمة.. ودي طريقتها سهلة جدا، كل اللي عليكِ إنك تقطّعي اللحمة لشرائح، وتبّليها بملح وفلفل وخل وعصير ليمون وكمون وزعتر وفلفل حامي مفروم وفلفل أحمر مطحون، وتسيبيها في التتبيلة دي لمدة نصف ساعة؛ علشان اللحمة تتشرّب مِن التتبيلة، وبعد كده هاتي طاسة وحطّي فيها كمية صغيرة من الزيت، وشوّحي فيه فلفل وبصل مقطّع شرائح طولية، وبعد كده ارفعيهم من على النار، وحطّي اللحمة بالتتبيلة بتاعتها في نفس الطاسة، وسيبيها تتشوّح شوية، وبعد كده رجّعي الخضار عليها تاني، وقلّبي كل المكوّنات مع بعضها، وارفعيها من على النار وقدّميها.. وبالهنا والشفا. - بواقي اللحمة المعصّجة.. ممكن تعملي بيها حاجات كتير زي المسقعة أو أي صواني بالبشاميل، أو تحطّيها على البيتزا، أو تعملي بها حشوة السمبوسة.
ممكن تعملي كفتة سمك ببواقي السمك المخلي بواقي السمك - اعملي به سلطة دايت.. ممكن تقطّعي السمك، وتحطّي عليه خص وجرجير، وتبّليه بملح وكمون وزيت، ويبقى طبق سلطة خفيف ينفع للناس اللي بتعمل ريجيم. - كفتة السمك ببواقي السمك المخلي.. ممكن تستخدمي اللحم الني اللي بيطلع من السمك المخلي في إنك تعملي به شوربة سمك. ممكن كمان تعملي كفتة سمك بإنك تجيبي بواقي السمك، وتفرميه مع كزبرة خضراء وملح وفلفل ومايونيز وتوم، وتشكليها زي ما إنتِ عايزة، وبعد كده تغطّيها بالدقيق والبقسماط، وتقليها في الزيت. - كمونية ببواقي الجمبري.. لو عندك بواقي جمبري؛ سواء مطبوخ أو ني ممكن تعملي بيه كمونية، وطريقتها سهلة جدا؛ كل اللي عليكِ إنك تشوّحي الجمبري مع بصل وفص ثوم وكمون وملح وفلفل وكزبرة ناشفة، وممكن تضيفي كمان مكعبات بطاطس وفلفل أخضر، وبعدين تحطّي عليهم عصير طماطم، وتسيبيهم يغلوا على النار لغاية ما تحسّي إن المكوّنات استوت والصلصة اتسبّكت.
ولغاية هنا خلص عددنا النهارده.. بس أفكارنا لسه ما خلصتش.. استنونا الأسبوع الجاي علشان نكمّل باقي أفكارنا،،، ********************* للتعرف على مزيد من الوصفات الشهية اضغط هنا "سفرة دايمة" *********************