أولاً أنا مش عارفة إزاي أشكركم على الباب ده، بجد مش بالاقي حد أتكلم معاه غير "فضفضة". أنا بإذن الله هاتخرّج السنة دي من كلية "التربية الموسيقية"، ومن أيام الثانوي كنت في مدرسة مشتركة؛ بس كان لي أصحاب أولاد مش أكتر، وفيه ولد كنت مش باكلّمه؛ بس عارفاه اسماً وشكلاً، وهو برضه مش بيكلّم بنات المدرسة، كان أكبر مني بسنتين؛ فخلّص المدرسة وراح كلية تجارة، وبعد ما أنا خلّصت المدرسة شُفته بعدها بسنتين، وافتكرته، وكلّمنا بعض لأول مرة لمجرد ذكريات أيام المدرسة بس. كلمني وكلمته، وطلب موبايلي، ومن يومها بنكلم بعض عادي، وفجأة بعد ما اتعلقت به، بدأ يبعد فجأة، مش عارفة ليه؛ بس كنت حاسة قبل ما يبعد إنه متعلق بيّ، وأنا اتعلقت بيه؛ بس لما اتعلقت بِعِد عني فجأة، مش عارفة ليه، وبدأت أتصل بيه، يقول لي: مشغول ومش فاضي، وفي نفس الوقت يقول لي: ماتزعليش إنتِ وحشتيني، واستحمليني، أنا اتنقلت لشغل جديد، معلش أنا باتعب استحمليني، خلاص هانت وهاشوفك.. وعلى كده لمدة سنة ونص. والمشكلة إني متعلقة بيه أوي وبَعَت له من فترة إني بحبه، وهو بيجرحني في كل مكالمة من اللا مبالاة بتاعته، وقلت له: أنا مش عايزاك تحبني؛ بس كان نفسي أقول لك بحبك ووحشتني وبس.. ومن ساعتها مافيش ردّ منه خالص. كتبت له رسالة باقول له: وحشتني أوي، ويا ريت تكون فاكرني وكتبت اسمي.. وبرضه ما فيش ردّ. أنا مش عارفة أعمل إيه.. بجد نفسي يكون معايا، أنا باتمناه أوي، وبادعي ربنا في كل وقت يكون من نصيبي، ولحد دلوقتي مستنيّة يكون من نصيبي.. يا ريت حد يساعدني أنا باتعذب أوي، مش عارفة أعمل إيه.
