إزاي تعالجي نفسك من الصداع؟!

الصداع هو "بُعبُع" كل الناس، الستات منهم والرجال، وحتى كمان الأطفال؛ والأهم إنه في معظم الأوقات بيكون للصداع أكثر من سبب، وأكثر من شكل، فساعات بييجي لك صداع ويكون وجعه بيسّمع في العين، وساعات ثانية وجعه بيكون في الرأس، وفي معظم الوقت بتكوني مش عارفة تعملي إيه؟! ولا إزاي توقّفي الوجع اللي بيخبّط زي الشاكوش في راسك...
علشان كده حبّينا في "قمر 14" إننا نقول لك إزاي تعالجي نفسك من الصداع، من غير ما تلجئي للأدوية ولا المسكنات؟!
قبل ما نتكلم هنفرّق
علشان يكون كلامنا على أساس سليم لازم في الأول نفرّق بين أسباب الصداع؛ وده لأن أسباب الصداع كتيرة ومتعددة، قد تكون أسبابا عضوية نتيجة الإصابة ببعض الأمراض مثل:
- ضعف النظر أو قِصَر النظر أو وجود التهاب في العين
- التهاب الأذن الوسطى أو الجيوب الأنفية
- وجود اضطرابات ومشاكل في المعدة
- التهابات الأسنان واللثة
- الإصابة بنزلات البرد
- ارتفاع ضغط الدم
- الإمساك
وفي الوقت ده لا بد من استشارة دكتور متخصص لتشخيص الحالة وتقديم العلاج المناسب، أو قد يكون الصداع نتيجة أسباب غير عضوية، وده اللي بتشتكي منه بنات كتيرة أوي، وكل ما تروح لدكتور يقول لها إن مافيش عندها أي مشاكل.. وبيكون الحل في النهاية هو المسكنات؛ لتخفيف ألم الصداع، لكن اللي ناس كثير ما تعرفهوش إن الإكثار من المسكنات مش هو الحل المفيد لعلاج الصداع، ده غير إن المسكنات دي ممكن إنها تسبب مشاكل تانية كتير..
علشان كده هنقدّم لك النهارده مجموعة من النصائح تساعدك على علاج مشكلة الصداع من غير ما تحتاجي أي مسكنات...
* نامي كويس
علشان ننام 8 ساعات متواصلة الأيام دي بقت حاجة صعبة جداً؛ وده علشان خاطر حاجات كثير، يمكن أهمها السهر أمام التليفزيون أو الكمبيوتر أو السهر في الشغل، بس لو كنتِ من الناس اللي بتسهر وكنتِ بتعاني من الصداع، فاعرفي إن قلة النوم ممكن تكون هي السبب؛ لأن الجسم لازم يرتاح 8 ساعات يومياً بدون إزعاج.
وحاولي إنك تعملي لنفسك جدول منظّم بمواعيد النوم والاستيقاظ، وحاولي كمان تحافظي يومياً على المواعيد دي علشان الصداع يبعد عنك.
* اشربي مية وسوائل
دكاترة كثير بينصحوا دايماً بأهمية شرب المية بما لا يقل عن 8 أكواب في اليوم، علشان فوائدها؛ للمحافظة على رشاقة الجسم، وانتظام عمل المعدة، ونضارة البشرة وغيرها من الأسباب الكثيرة، لكن من أهم أسباب شرب المية، وهو تضييع الصداع؛ لأن الجفاف من ضمن الأسباب اللي بتجيب صداع، وبكده بنلاقي إنه في حالة عدم حصول الجسم على كفايته من المية بيبدأ يحتفظ بالسوائل الموجودة فيه واللي خزّنها قبل كده، ويبحث عن طرق للإشارة إلى أنه محتاج للمية أو السوائل، وبتظهر الإشارة دي في شكل وجع في الرأس أو صداع نصفي... وبكده بتلاقي إن شربك للمية بيخلي الصداع يختفي فوراً، وده من خلال شرب كمية كافية من 6 إلى 8 أكواب يومياً.
* العبي رياضة
لو كنتِ بتشتكي من الصداع بانتظام، وبتحتاجي لحاجة تقلّل الوجع اللي بتحسي بيه، فاعرفي إن التمارين الرياضية هتساعدك في كده؛ لأنك لما بتتحركي ده بيحسّن من مستوى تحمّلك للألم وبيخليكِ تنامي بشكل أحسن، طبعا هتقولي إنك ما بتعرفيش تعملي تمارين رياضية علشان كده هاقول لك إن أبسط حاجة ممكن تعمليها هي إنك تمشي كل يوم في الهواء لمدة نصف ساعة على الأقل وهتشوفي الفرق بنفسك.
كمان فيه تمرين بسيط ممكن إنك تعمليه في البيت أول ما تحسي ببوادر الصداع.. وهو إنك تنامي على ظهرك وتغمضي عينيكي وتستنشقي الهواء بالأنف بعمق، بحيث إن الرئتين تمتلئ بالهواء، وتطلّعي الهواء ببطء من خلال فمك.
* ما تنسيش تاكلي كويس
لو رجعتي البيت بعد يوم شغل طويل ولقيتي عندك صداع جامد ومش عارفة تعملي إيه، حاولي كده تفتكري إمتى كانت آخر مرة أكلتي فيها؟، وإذا اكتشفتي إن ساعات كثيرة عدّت عليكي من غير أكل يبقى اتأكدي إن صداعك سببه قلة أكلك.
لأننا لما بنكون بره البيت لفترات طويلة وننسى ناكل ده بيخلي معدل السكر في الدم يقلّ وبينتج عنه صداع؛ لأن الصداع هو وسيلة الجسم في إنه يقول لك إنه جعان ومحتاج للأكل، ويا ريت لما تيجي تاكلي تبدئي بحاجات بسيطة زي مثلا إنك تاكلي فاكهة زي التفاح، وبعد نصف ساعة تبدئي في الأكل الطبيعي بتاعك، وبكده بتلاقي إن السكر في دمك رجع لمعدّله الطبيعي، وبعد ربع ساعة هتلاقي إن الصداع بدأ يروح تدريجيا.
واوعي تسمعي كلام حد يقول لك إن تناول الحلويات قبل الأكل بيضيع الصداع؛ لأن الحلويات دي مفعولها هينتهي أول ما تاكليها على طول ومش هتجيب تأثير ملحوظ.
* اشربي قهوة بس خدي بالك
ساعات كتير أول ما تصحي من النوم بتحسّي بصداع، في الوقت ده ادخلي المطبخ وجهّزي الفطار وحاولي إنك تاكلي حتى لو أي حاجة بسيطة، وبعد كده اعملي فنجان قهوة؛ لأن اللي ما تعرفيهوش إن القهوة لها فوائد طبية في القضاء والتخفيف من شدة الصداع غير العضوي.. لأن الكافيين بيوقف وجع الصداع من بدايته عن طريق تضييق الأوعية الدموية، بس خدي بالك إن تأثير الكافيين على بعض الناس بيكون عكسي، وبيجيب لهم صداع، وعلشان كده لازم تاخدي بالك لما تشربي حاجة فيها كافيين لازم تكوني عارفة إذا كنتِ من النوع ده ولا لأ.
* تجنّبي الإضاءة المباشرة
لو كنتِ بتعاني من الصداع، يبقى يا ريت تتجنّبي في الوقت ده تعريض عينيكي للضوء بشكل مباشر زي مثلا الجلوس أمام الكمبيوتر أو التليفزيون، ويا ريت كمان تتجنبي الجلوس في أي مكان فيه ضوضاء شديدة، أو فيه أي حد بيدخن، وتجنبي الكلام في التليفون وخصوصا الموبايل؛ لأنه هيزوّد إحساسك بالصداع، وتجنبي شم أي روائح نفاذة؛ لأنها هتخليكي تحسي أكتر بألم الصداع، وابعدي عن أي مصدر هواء بارد زي هواء التكييف مثلاً، وحاولي إنك تريّحي دماغك من التفكير في أي موضوع، وادخلي غرفة نومك واقفليها عليكي كويس ونامي لمدة ساعتين، علشان تريّحي أعصابك وتتخلصي من الصداع... وأول ما تصحي من النوم خدي حمام دافئ.
* عالجي نفسك من الصداع في البيت
وعلشان شعارنا في "قمر 14" دايما هو "بالطبيعة كل شيء أحلى" جبنا لك شوية الوصفات السهلة دي اللي ممكن تعمليها في البيت، علشان تعالجي بيها الصداع..
الوصفة الأولى
هتكون خاصة بكل الستات والبنات اللي بيشتكوا من الصداع قبل الدورة الشهرية، واللي بييجي لهم في صورة ألم خلف العينين، وده حله إنك تاكلي أكل غني بالعناصر الغذائية اللي جسمك محتاج لها زي مثلا الكبدة والأسماك واللحوم والجبنة القريش والفلفل الأخضر.
الوصفة الثانية
هي وصفة أوراق الريحان، وكل اللي عليكي إنك تجيبيه وتغسليه وبعدين تمضغيه، والوصفة دي بيكون لها تأثير سحري في التخفيف من آلام الصداع.
الوصفة الثالثة
هي وصفة زيت النعناع، واللي هتستخدميه بإنك تدهني بيه أطراف الأنف وتشمي ريحته؛ وصدقيني هتحسي بالنتيجة على طول، وزيت النعناع ده هتلاقيه عند العطار.

وبكده يكون خلص كلامنا عن طرق التخلّص من آلام الصداع...
وإلى اللقاء في العدد القادم،،،