نصف رجل.. وعنده عقدة

أنا عندي 22 سنة، وبحب واحد، مرتبطة بيه من حوالي 4 سنين، وهو أكبر مني ب5 سنين.. بحبه جداً؛ بس هو ظروفه النفسية وحشة؛ متعقد من الزواج بسبب مشاكل عنده في البيت بين والدته ووالده، ونفسه إنه يسيب البيت ويعيش لوحده مع إني أنا غير والدته خالص وطباعي مختلفة وباحاول أريّحه وأرضيه.
عاوز مني فرصة إنه يجرّب يعيش لوحده الأول قبل ما يفكّر في الجواز، ويشوف إيه الأحسن.
هو بيحبني؛ بس تفكيره أو العقدة دي تاعباني.. أنا نفسي أعيش معاه وواثقة إني عمري ما هاتعبه.
ساعدوني أرجوكم.
moonligh
فكّرتيني بمشهد في فيلم "المصير"، كان فيه "ابن رشد" بيقول لابن الخليفة "ما تجيش وإنت كبير وعندك 20 سنة تقول لي أصل أبويا كان بيضربني وأمي بتحب أخويا الكبير أكتر مني، وعشان كده أنا متعقد، إنت دلوقتي بقيت كبير كفاية ومسئول عن تصرّفاتك".
صديقتي.. حبيبك عنده 27 سنة، ومهما كانت مشاكله في البيت أو عُقدته من أبوه وأمه؛ فده مش مبرر أبداً عشان يسيب المشاكل دي تؤثر على نفسيته وحياته.. وأصلاً أنا مش فاهمة هو ليه مش بيعيش لوحده فعلاً أو بيتجوز، طالما مش مرتاح مع عيلته.. ده راجل مش بنت عشان المجتمع يمنعه، ولو إن فيه بنات بيعملوا كده وبياخدوا القرار ده، وبيتحملوا المسئولية الكاملة لقراراتهم وتصرفاتهم.
صديقتي أظن إن المشكلة الحقيقية هي فكرة المسئولية واتخاذ القرار.. حبيبك في الغالب عنده مشكلة في الجانب ده، وبيتحجج وبيعلّق مشاكله على شماعة مشاكل البيت والعقدة النفسية.. 4 سنين مش مدة قليلة لعلاقة المفروض تاخد شكلها الطبيعي وتتطور لخطوبة وجواز، مش معقولة إنك لسه سايبة له مساحة يجرّب يعيش لوحده قبل ما يفكّر يتجوز أو لأ، أمّال علاقتكم أصلاً قايمة على أساس إيه؟
أنا واثقة إن عمرك ما هتتعبيه ولا هتضايقيه زي أهله ما هيعملوا؛ بس اللي بافكّر فيه فعلاً دلوقتي: هل هو هيقدر يسعدك ولا لأ؟ أو مثلاً: لو جرّب يعيش لوحده، وبعدين لقى نفسه مبسوط لوحده وقرر إنه ما يتجوزش دلوقتي؛ حضرتك بقى هتستني يخف من عقدته النفسية؟!
لو عاوزة فعلاً تساعديه إنه يتخلص من عقدته النفسية، يبقى لازم تساعديه يفهم إنه مش صغير وإنه راجل ناضج دلوقتي، ولازم يتحمل مسئولية نفسه ومسئولية قراراته، وإنه مش هيكون سيد قراره إلا لو كان مستقلّ مادياً ومعنوياً؛ بغضّ النظر هو عايش بعيد عن أهله أو في وسطهم؛ إنما لو هو لسه معتمد عليهم.. ودي مشكلة تانية هتخليكي إنت تواجهي مشاكل كتير معاه؛ لأنه هيبقى أمره مش في إيده؛ لكن في إيد أهله، وهم اللي بيديروا حياته، وعلاقتك بيه مش هتتحسن غير لو كانت علاقتك بيهم كويسة!!
أنا مشفقة جداً عليكِ؛ لأنك بتحبيه ومستحملة وصابرة، ومش حاسة أبداً إنك متعلّقة بحبال الهوا الدايبة، وهو مش بيمدّ إيده حتى ويسنِدِك.
صديقتي إذا كنتِ شايفة إنك تستحقي راجل كامل؛ فما ترضيش بنصف راجل، لا يتحمل المسئولية أو يتخذ قراراته بنفسه، ويعلق أخطاؤه على شماعة الآخرين.. فكّري تاني.

لو عايز تفضفض لنا دووس هنا