مشكلتي الليسانس!

السلام عليكم، كل سنة وإنتم طيبين، أنا فتاة عمري 21 خلصت جامعة السنة دي، مشكلتي هو الليسانس أنا متقدم لي واحد هو ابن خالتي وبيحبني من أولى ثانوي وأنا رفضته أكتر من مرة حتى من غير ما اعرفه بجد؛ بس السنة دي حاولت أتعرف عليه عشان لا أظلم نفسي ولا أظلمه.
طلب مني إننا نتكلم وندي بعض فرصة وفعلا إديته فرصة، واتكلمنا سبع شهور لغايه دلوقتي، وبعدين كنت باحس وأنا باكلمه إني بحبه ومرتاحة له موت؛ بس مرة فضل شهر ما نتكلمش لظروف يعني غصب عني وعنه، وبعدين رجعنا نتكلم؛ بس هو اتقدم رسمي ومستني ردي وأهلي موافقين؛ بس أنا مترددة جدا أولا لأني ساعات أحس إني مش بحبه وساعات كتير وأنا باكلمه أحس إني باموت فيه.
أما المشكلة الأساسية إنه معاه دبلوم؛ بس عنده مشروع وناجح كل اللي مخوفني تفكيره وتفكيري، خايفه ما نتوفقش وإنه مش شغال شغل ثابت يعني المشروع مش دايم؛ بس ملكه، وأنا مش عارفة أرد أقول إيه، ويا ريت تردوا عليّ بسرعة عشان هو مستني الرد وأنا خايفة آخد قرار وأندم يا ريت تردوا عليّ بالله عليكم.
lama

صديقتنا العزيزة:
أولا لازم تستخيري ربنا, وتدعيه أن لو كان في زواجك منه خير لك وله؛ فليقربه الله منك وليقربك منه, ولو كان في زواجك منه شر لك وله؛ فليبعده اله عنك وليبعدك عنه, وبعدين لازم تفكري كويس جدا, وتحطي في اعتبارك أن الزواج له أسس, وأولها الارتياح النفسي والقبول, وثانيا التوافق الاجتماعي والتعليمي والمادي والعمري والفكري, والحمد لله فيه قبول بدرجة كبيرة بينك وبيه؛ فمشاعرك ناحيته دلوقتي بتأكد إنك الحمد لله مرتاحة له, والحب دب في قلبك بالفعل, وهتصعدي سلم الحب درجة درجة؛ لأن الحب بيتدرج من مجرد الإعجاب إلى الارتياح إلي الشعور بالسعادة في حضوره وبالحزن في غيابه, ثم إلى التعلق الشديد, وأنت قربت من المرحلة دي.
أما بالنسبة للتكافؤ؛ فاجتماعيا واضح أنه متقارب منك وكمان ابن خالتك, أما بالنسبة للتعليم فهو أقل منك, وده ممكن يكون عقبة كبيرة لو أن فارق التعليم ده عامل لك أو له مشكلة, يعني لو التعليم ده مسبب له عقدة نقص بتظهر في طريقة كلامه وتصرفاته, أو مسبب لك إحراج وضيق, يخليه بمعني تاني مش مالي عينك؛ بس فعلا الرجولة مش بتتقاس بالشهادات, والمهم بجد سعة أفقه وذكاؤه وسرعة بديهته وإدراكه ومعرفته باللي بيحصل حواليه في الداخل والخارج, وتحمله للمسئولية, وتقبله للغير ولوجهات نظرهم, وتصرفه في الأزمات, وطريقة تفكيره بصفة عامة, وأخلاقه ومبادؤه, وطبعا مظهره وطباعه.
فطبعا مهم بالنسبة لك تشوفيه شخص محترم, يثبت وجوده وحضوره في أي مكان, وده مش بييجي بالتعليم بس؛ فكتير من حملة الشهادات العليا ما بيعروفش أكتر من اللي درسوه في الكتب ونسوه؛ فالمهم تكون سلوكياته ومظهره وطريقة كلامه بيأكدوا إنه راجل محترم, تفخري بيه لو خرجتي معاه أو عرّفتيه لحد من أصحابك, المهم يكون راجل تعتمدي عليه ويفهمك ويتفاهم معاك, ويحتويك بحبه ويصونك بقوته, أما بالنسبة للمستوى المادي؛ فهو الحمد لله عنده مشروعه الخاص كما ذكرت, وإن كان مش مضمون ككل حاجة تانية في حياتنا؛ فلكل عمل مساوئه, اللي بيشتغل موظف حكومة مرتبه قليل, واللي بيشتغل في شركة خاصة ممكن يطرد في أي وقت, واللي فاتح مشروع ممكن يخسر في أي وقت؛ بس مش معنى كده إننا نرفض شخص مقتدر بيشتغل ومعاه فلوس يقدر يفتح بيها بيتاً خوفا من المستقبل المجهول؛ لأن كل حاجة في حياتنا مجهولة لنا, وطالما بنعمل اللي علينا يبقي نتوكل على الله من غير ما نخاف أو نقلق.
صديقتي, لازم تفكري كويس؛ خاصة في نقطة التعليم؛ فلو هو متقبل نفسه, وفخور بيك ومش متعقد منك, وأنت حاسة أنك فعلا هتقدري تفخري بيه من غير ما تتحرجي من مؤهله, يبقي توكلي على الله ووافقي, وربنا يهديك للخير, وابقي طمنينا عليك.

لو عايز تفضفض لنا دووووس هنا