جمالك بالألوان مع جيلان.. ربطة طرحتك بإيشارب واحد

أهلاً بكل أصدقائي وأصدقاء "قمر 14"..
زي ما وعدتكم إني في الفترة دي هاقدّم لكم مجموعة أفكار جديدة لربطات سهلة وسريعة، وممكن أي بنت تعملها لو جالها مشوار مفاجئ، أو لو حسينا إننا زهقنا من الربطات التقليدية اللي بتكون فيها شغل كتير وبتحتاج لوقت ومجهود...
وطبعاً الربطات دي هتكون سهلة لأي بنت لسه في بداية حجابها، وعايزة تعمل ربطة تكون شيك وبسيطة في نفس الوقت...
1- ربطة طرحتك بإيشارب واحد
دلوقتي إحنا هنعمل ربطة بإيشارب واحد، بس للناس اللي مش بتحب تربط أكتر من إيشارب، والربطة دي هنستعمل فيها إيشارب لونه موف في فوشيا، وفيه خطوط متدرجة.
وخامة الإيشارب قطن علشان تناسب جو الصيف والحر..
وطريقة الربطة سهلة جداً ومش هتاخد وقت، وكل اللي عليكِ إنك تجيبي الإيشارب وتربطيه على ورا وبنخلي جزء أطول من جزء، وبعد كده بتلفي الطرف الطويل من الإيشارب على الرأس من فوق، وبعدين بنربطه مع الطرف القصير على جنب.
والربطة دي بتليق مع أصحاب الوش الرفيع؛ لأنها بتدي امتلاء للوش بسبب الحركة اللي عملناها على جنب.

إضغط لمشاهدة الفيديو:
2- ربطة عملية بالإيشارب المربع:
دلوقتي هنعمل ربطة بسيطة ومناسبة لفترة الصبح أو بعد الظهر، وهنستخدم فيها الإيشاربات المربعة، وعلى فكرة الإيشاربات دي كانت موضة من فترة طويلة ودلوقتي رجعت موضة تاني، وحتى دور الأزياء العالمية دلوقتي اتجهت لتصميم الإيشاربات المربعة بأشكال مختلفة وكتيرة.
وميزة الإيشارب المربع إنه بيبقى عملي وسهل وبسيط جداً، وأي واحدة حتى لو في بداية حجابها بتقدر تستعمله، ومش بتحتاج أكتر من باندانا واحدة تحته، وبعد كده تربط عليها الإيشارب بسهولة جداً.
ودي الخطوات اللي هنعملها بالتفصيل:
1- هنربط الباندانا على الشعر.
2- بعد كده هنجيب الإيشارب المربع، وبنتنيه بحيث إن الجزء اللي من الخارج يبقى أطول شوية من الجزء اللي جوه؛ علشان تقدري تتحكمي في طوله، وبنربطه على ورا بالراحة جداً، ونسيبه أو ممكن نربطه ربطة تانية وبعد كده نجيب الإيشارب كله على جنب.
والربطة دي بتليق مع أصحاب الوش المليان لو نزلنا الباندانا على قدام شوية علشان نداري منطقة الخدود.
وكمان بتليق مع أصحاب الوجه الطويل والرفيع؛ لأننا ممكن نعمل فيها امتلاء من الجنب.
وزي ما هنشوف في الفيديو إن ألوان الإيشارب دي ممكن تليق مع أي لون بشرة؛ لأنها عبارة عن جينز وأبيض؛ فممكن تليق مع أصحاب البشرة الفاتحة والغامقة.

إضغط لمشاهدة الفيديو:

3- ربطة طرحة مميزة بالإيشارب الشيفون:
الربطة دي كمان سهلة جداً، وممكن تعمليها في أي وقت، وهتديكي في النهاية شكل شيك وبسيط...
ودلوقتي تعالوا نشوف مع بعض الخطوات بالتفصيل:
1- أول حاجة هنعملها إننا نربط الباندانا القطن، وزي ما قلنا قبل كده إن الباندانا القطن دي مهمة جداً؛ لأنها بتحافظ على الشعر وكمان بتثبّت الطرحة، وطبعاً بنختار لونها بحيث تكون لايقة على ألوان لبسك، وهنا إحنا اخترناها باللون الرمادي بنفس درجة لون البادي اللي الموديل لبساه، وبعد كده هنربط عليها باندانا بينك.
وميزة الباندانا إنها بتكون سريعة وعملية، وممكن نلبس منها أكتر من واحدة، كبديل للإيشاربات الكتير اللي البنات بتلبسها؛ لأنها بتضايق وخصوصاً مع الصيف والحر.
2- بعد ما ربطنا الباندانا القطن، هنربط الإيشارب الشيفون اللي معانا، وهو زي ما هنشوفه في الفيديو إيشارب مستطيل مشجّر، وطبعاً إحنا اخترناه مشجر علشان الموديل لابسة ألوان سادة؛ فالإيشارب المشجر هيكون حلو ومناسب جداً معاها.
وبعد كده هنقسّم الإيشارب نصفين متساويين، وبعد كده هنثبّت الإيشارب بدبوس من ورا، وده أحسن عشان يبقى ثابت، خاصة لو خامة الإيشارب خفيفة، بس لو إنتِ متمكّنة ممكن تربطيه عادي من غير دبوس، وبعد كده بتعمليه على شكل فيونكة من الجنب.
إضغط لمشاهدة الفيديو:
ولغاية هنا خلصت حلقتنا النهارده، وأتمنّى إنها تكون عجبتكم ويا ريت تبعتوا تقولوا لي رأيكم إيه، وكمان يا ريت تجرّبوا الربطات اللي قدّمناها وتقولوا لي على النتيجة، وتقدروا تكلموني في أي وقت على رقم تليفون 0123418020
وفي النهاية أحب أشكر محل scarfobia للإيشاربات اللي شارك معانا في الحلقات بمجموعة الإيشاربات اللي ظهرت في الفيديوهات، ورقم تليفونه 0106101710

أتمنّى إن الربطات تكون عجبتكم...
وتبعتوا تقولوا لنا رأيكم إيه...
واستنونا في حلقات جديدة مع ربطات طرح مختلفة...