ابحثي عن عمل آخر حماية لنفسك وإرضاء لربك

السلام عليكم ورحمة الله وبركاته.. أنا باشكر الموقع ده كتير أوي إنه سمح لي ولغيري إننا نتكلم في أمور بتمرّ بينا جميعاً ونستفيد من خبرات بعض.
مشكلتي هي إني كنت باشتغل في شركة بدأت من الصفر، وقعدت فيها لمدة 6 سنين أنا ومالكها لغاية لما كبّرناها سوا، ومرّينا بكل الظروف فيها؛ بس اضطريت إني أسيب الشركة لما حسيت إن صاحب الشركة بيتعلق بيّ وهو راجل متجوز وعنده ولد، وأنا كنت موجودة قدامه من زمان، كان مرتبط بواحدة أجنبية، وبعدين خطب واحدة مصرية، وبعد كده سابها وارتبط بواحدة كمان، ودي آخر واحدة معاه؛ فأنا مشيت علشان مش عايزاه يؤثر عليّ أو أتعلق به.
المشكلة هي من ساعة ما سيبت الشغل وأنا مش لاقية شغل خالص من شهر 7 /2009 لغاية دلوقتي، ولو لقيت مش باكمل وبالاقيه مش مناسب، وحاسة إني عايزة أرجع لمكتبي وشغلي لأن الشركة دي بالنسبة لي زي بنتي، وساعات كنت باساهم من فلوسي الخاصة علشان نقبّض الموظفين لو ما كانش فيه سيولة، بدأت فيها سكرتيرة حتى أصبحت مديرة الشركة، وعندي توكيل من صاحب الشركة.
فأنا خايفة أكون عايزة أرجع عشان اتعلقت به من غير ما أحس وأنا مش عارفة.. ولا أنا وحشني مكتبي فعلاً وشغلي ووظيفتي؟ مع العلم إنه بالنسبة لي أخويا، وكنا بنروح نزورهم أنا ووالدتي لما كانت والدته مريضة قبل وفاتها، ورحنا العزاء؛ بالرغم من إنه مش في القاهرة، وحتى لما كان بيشتري حاجات السبوع الخاصة بابنه أنا رحت معاه واشترينها، وكنت فرحانة أوي وحاسة إنه سبوع ابن أخويا وإن أنا بالنسبة لابنه زي عمته بالضبط.
أرجو أن تفيدوني أنا فعلاً مش عارفة أشتغل خالص ونفسي أرجع شغلي؛ بس خايفة من السبب اللي قلته.. وشكراً.
simsim





لو عايز تفضفض لنا دووس هنا