أنا مريت بعلاقة كانت في أولها جميلة أوي.. كانت واحدة صاحبتي وجت في يوم قالت لي أنا بحبك وقلت لها وأنا كمان.. وحبينا بعض سنة، وكانت أحلى سنة قضناها مع بعض. وكان فيه بيننا مشاكل طبعاً؛ بس كانت خفيفة؛ زي لبسها وخروجها مع أصحابها، وكنت بارفض ده دايماً؛ لكن بعد كده بدأت أوافق علشان حسيت إني ظالمها مع إني زي ما كنت باعمل معاها كنت باعمل مع نفسي وأكتر. وجت في مرة بتقول لي: هو ينفع نبقى أصحاب؟ فطبعاً اتصدمت أوي فقلت لها: لأ ما ينفعش وأنا مش عاوزك ولا تكوني حبيبتى ولا تكوني صاحبتي، قالت لي: لا بس أنا عاوزة نكون أصحاب، قلت لها: لا، وما تتصليش تاني بيّ. اتصلت تاني يوم وأنا أكنسل في وشها راحت باعتة لي ماسدج تقول لي افتح عاوزاك ففتحت وكان ردي وحش، فقالت لي: أنا آسفة ما تزعلش، أنا كنت باشوف هاعرف أعيش من غيرك ولا لأ، قلت لها وأنا عرفت أعيش ومش عاوزك. هي مشكلتها إنها عاوزة تمشّي كلامها عليّ واللي تقوله أنا أنفّذه بالحرف، وطبعاً الواحد مننا هو الراجل، وهو اللي يمشّي كلمته مش هي اللي تمشّي كلمتها عليّ.. فقلت لها وأنا مش عاوز أبقى كيس جوافة تعملي فيّ اللي إنتِ عاوزاه، قالت لي: لأ مش كده بس أنا مش بحب حد يمشّي كلامه عليّ، قلت لها: يبقى تشوفي لك راجل مش راجل وتمشّي كلامك عليه. أنا بحبها لسه، ومش عارف أعمل إيه.. أرجو النصيحة ليّ لأني محتاج حد ينصحني. koki