قلبه طيب ولما بيغلط بيعترف بغلطه.. بس برضه خايفة

السلام عليكم.. أولاً عاوزة أقول لكم إني فعلاً محتاجة لكم أوي تساعدوني، وتاني حاجة بجد باثق فيكم أوي، وحاسة إنكم هتساعدوني.
أنا بنت عندي 19 سنة، ولسه بادرس في الكلية.. اتعرفت على واحد من حوالي سنة ونص، وجه على الطول البيت، وخطوبتنا كانت من قريب، والحمد لله على كل شيء.
المشكلة إن خطيبي من خلال معرفتي بيه أول ما عرفته حكى لي إنه كان خاطب وكان بيحبها وسابته للماديات، هو مستواة المادي كويس؛ بس أيامها كان لسه بيبدأ حياته.. المهم سابته وهو اتعذب.
هو كان بيشتغل في محافظة تانية لحد قريب، وهناك كانت الماديات حلوة، وكان مرتاح.. أنا من أول ما عرفته، وهو دايماً عصبي وبيتسرع في الكلام؛ بس بأمانة بيعترف بغلطه.. مشكلتي معاه إنه رجع تاني هنا محافظتنا، وطبعاً ده مضايقه جداً والماديات مقصّرة معاه.
أنا مش فارق عندي، أنا بحبه.. بس هو من ساعتها وهو عصبي ومتغير ومزعّل الناس كلها منه.. على فكرة هو أكبر مني بعشر سنين؛ بس عمري ما حسيت بالفرق.. دلوقتي هو بقى بيتكلم في الموضوع ده.. مش فاهمة ليه بيعمل كده.
وكمان مشكلتي إن أبويا متديّن جداً، ومقفّل علينا، وإحنا بننزل من وراه، وده طبعاً غلط؛ بس أبويا جامد أوي، وخطيبي قافل منه لأنهم تقريباً عكس بعض، وكمان خطيبي فري شوية وشايف إن يعني التجاوزات بين المخطوبين دي عادي ما هم هيتجوزوا.
بس أنا خايفة أوي من ربنا، ونفسي إنه يصلّي ويبطّل عصبية؛ بس والله هو طيب وأبيض من جواه.
يا جماعة أنا متعذبة.. هو ساعات بيغلط فيّ لما بيتعصب؛ بس أنا بحبه، وفيه حاجات كتير مخوّفاني.. خايفة أكون اتسرعت، ولا هو ما بيحبنيش ولا أنا غلطانة؟.. مش فاهمة.. ساعدوني.. محتاجة لكم جداً.
saso

صديقتي العزيزة
أشكرك على هذه الثقة الغالية مما يسمح لي أن أعطي بعض التعليقات الأوّلية على رسالتك والتي رصدت العديد من مميزات خطيبك وهي:
- أنه عندما تعرّفتي عليه طِلِع جدّ وملتزم، وجاء البيت، وتقدّم لك، وده دليل على أنه بيحبك ومقتنع بيكِ.
- أمانته لما حكى لك عن ماضيه وعن آلامه التي عاناها بسبب خطيبته الأخرى.
- إنك بتقولي إنه قلبه طيب وأبيض لما بيغلط بيعترف بغلطه، وده دليل على إنه شخصية عاقلة.
كل ده كويس؛ لكنك في نفس الوقت ذكرتي إن خطيبته عندما تركته، تركته بسبب ظروفه المادية، ومن الممكن إنه يكون متضايق لأنه بعد ما كان مرتاح مادياً رجع دخله يقلّ تاني وده أكيد سبب العصبية، وعليك إنك تحاولي تستحمليه شوية لأنك بتحبيه، ولازم تبقي معاه في السراء والضراء.
- ونصيحتي ليكِ إنك تقعدي تتكلمي معاه بهدوء، وتشوفي إيه اللي مضايقه لأن أكيد فيه سبب، وحاولي تهوّني عليه، وتطمّنيه دايماً إنك جنبه ومعاه، وهتستحملي منه أي حاجة وتفهّميه إن الناس مش مضطرة تستحمله في غضبه، وإنه يحاول ما يزعّلش الناس منه لأنهم ما يعرفوش فيه إيه.. ده هيديه إحساس بالأمان تجاهك، ومش معنى كده إنه يغلط فيكِ بس لما يهدى.. فهّميه إن ده زعّلك منه شوية.
- أما عن فرق السن فدي حاجة مش جديدة، ومادام إنكم بتحبوا بعض يبقى فين المشكلة؟ ولو فتح الموضوع قولي له إنه أكيد عارف إنه مش فارق معاكِ وإنتم مع بعض، حاولي تقرّبي من عقله شوية على قد ما تقدري.
- أما عن فارق التفكير بينه وبين والدك؛ فتكلمي معه لأنه المفروض إنه بيحبك، ولازم يحترم التربية اللي تربيتيها، ودي حاجة تفرّح؛ لأنه أبوك الحمد لله ربّاكِ على الخير.. لازم تلتزمي بذلك وتتكلمي معاه إنه لازم يساعدك إنك ما تعمليش حاجة تغضب ربنا، وإنك بتحبيه، ولما تتجوزوا يبقى يعمل اللي هو عاوزه.. وإنه مسئول عنك، ولازم يحافظ عليكِ، ويشجّعك على ده.
- وطالما بتحبيه؛ فده هيوصل له عن طريق تصرفاتك، حاولي تقنعيه إنه يصلّي وشجّعيه على قدر المستطاع، وما دام هو بيعرف غلطه يبقى تتكلمي معاه وتتفاهمي وتشوفي رده إيه.
وفّقك الله إلى الخير.

لو عايز تفضفض لنا دووس هنا