القائمة الصحيحة عادة طيبة وحصر لحقوق الزوجين

بسم الله الرحمن الرحيم والحمد لله والصلاة والسلام على رسول الله..
السلام عليكم ورحمة الله وبركاته.. ومرحبا بكم في موقع "بص وطل" الإلكتروني..
وما زالت تأتيني أسئلة كثيرة من الشباب..
فيه سؤال بيقول:
ما رأيك في قائمة العفش اللي بتتعمل لما الواحد بيتزوج -وهي أن أهل البنت بيكتبوا قائمة فيها العفش وفيها الذهب وبيجعلوا الزوج يوقّع عليها، وتبقى هذه القايمة مع أبو البنت أو مع أسرة البنت؟؟
دي حاجة المصريين عملوها وممكن تلاقي إن في بلاد إسلامية كتيرة مش موجودة قضية القائمة، لكن هي عادة طيبة؛ لأن فيها حصر للحق وللمستحق بين الزوج والزوجة، "استعن بيمينك" يعني النبي أمرنا إننا نكتب الحاجات اللي بيننا وبين بعض عشان ما نختلفش على شيء من الدنيا، أحيانا تُكتب هذه القائمة بطريقة غلط، وهي إنها تكتب بطريقة مبالغ فيها لا علاقة لها بالواقع؛ فمثلا أوضة النوم يكون ثمنها 5 أو 6 آلاف جنيه فيكتبوها بخمسين أو ستين ألف جنيه، السفرة تكون بألف جنيه فيكتبوها بمائة ألف جنيه، ما ينفعش كده.. ده كذب.
ولذلك فالقائمة المزوّرة هي التي لا تحاكي الواقع، أما القائمة التي تحاكي الواقع لا يوجد بها أي خلل، بعض الناس تلاقيهم في الفضائيات بيقولوا "القائمة حرام" وهم يقصدون القائمة المزورة، القائمة التي تقول شيئا غير الواقع؛ لأن في هذه الحالة لو أراد الرجل -لا قدّر الله- أن ينفصل عن المرأة أو هي التي تريد الانفصال عنه، فيرجعوا للقائمة فبدلا من أنها في واقعها تعبّر عن عفش بخمسين ألف جنيه يلاقيها بتعبر عن عفش بخمسمائة ألف جنيه، فيعجز الرجل عن الإتيان بمثل هذا الخيال الخطأ المغالَى فيه اللي كان في الأول، ومن هنا ابتدأ الناس يسألوا وابتدأ السؤال ده يظهر، طول عمر المصريين ماشيين بالقائمة بس القائمة التي ترضي ربنا، والتي تصف الواقع، لكن نكذب ونقول حاجات ماهياش في الواقع فيبقى هو ده الغلط، ونقدر نقول إن القائمة في حد ذاتها عرف مصري كويس لا مشكلة فيه ويأخذ به القضاء ويمشي عليه المصريون من زمن بعيد من أكثر من خمسمائة أو ستمائة سنة؛ من أجل حفظ حق البنت، وده أمر طيب وأي واحد عنده حسن نية ما يقدرش يقول لأ.
لكن الكلام في تزوير هذه القائمة وجعلها شديدة المخالفة للواقع الذي أمامنا وهذا فيه إثقال للرجل، وهنا بقى نسمع الكثير من الناس في الفضائيات بيقولوا عن الحكاية دي إنها حرام وهم عندهم حق؛ الصورة المزورة للقائمة حرام، لكن القائمة نفسها وفكرتها حلال مافيهاش أي حاجة.
وفيه سؤال تاني بيقول:
ما رأيكم في الفيس بوك وبرامج الشات أثناء ساعات العمل؟
السؤال ده طويل، ولذلك هنخليه للحلقة الجاية إن شاء الله.
ودلوقتي أقولكم السلام عليكم.
إضغط لمشاهدة الفيديو: