إحنا كنا أصحاب، وكان بيحبني، وبعد كده ارتبطنا، حبيته وحبني؛ لدرجة إنه ممكن يكون نايم ويتصل بيّ وهو نايم ويكلمني. ومرة واحدة قلّ اتصاله، قلت يمكن ظروف، وبعد كده ما بقاش يسأل أصلاً، قلت يمكن عشان امتحاناته، خلصت الامتحانات، وبرضه ما بيسألش، قلت أقابله، وقابلته؛ حسيت إحساس عمري في حياتي ما كنت أفكّر إني أحسه.. حسيت إنه معايا؛ بس قلبه وعقله مش معايا، حسيت إن اللي شاغله حد غيري. قلت أقابله تاني، إداني ميعاد وما جاش، اتصلت بيه كتير ما ردش غير بعدين، وقال لي: يعني أعمل إيه؟ راحت عليّ نومة. قفلت معاه وأنا متعصبة، ما اتصلش غير بعد شهر ونص، وبعد كده رجعنا أصحاب من تاني. مش عارفة أعمل إيه؟ أنا بحبه، وأنا ما اتعودتش إن حاجة تمشي من بين إيديا وأنا عاوزاها.. يمكن يكون ده سلف ودين لأني عملت كتير في ناس زي ما هو عمل. يا ريت تردوا عليّ أنا ندمانة على اللي عملته. س.س