الثبات على مبدئك أهم من الفشل أو النجاح

بسم الله الرحمن الرحيم، أكيد طبعاً مش محتاجة أقول لكم إن الموقع ده جامد جداً لأنكم أكيد عارفين.
أنا بقى مشكلتي إني محتارة جداً في شخص اتعرفت عليه تقريباً من سنتين، هو صاحب خطيب صاحبتي؛ المهم إن إحنا بنتكلم إن إحنا أصحاب وكده؛ لكن لقيته بدأ يهتم بيّ أوي، وأنا ما أنكرش إني مرتاحة له؛ حتى صاحبتي دي على طول بتقول لي إنه بيحبك؛ بس خايف تصدّيه لأن أنا معروفة إني ما ليش في المشي مع الولاد؛ يعني اللي عايزيني ييجي يتقدم.
كل ده عادي؛ بس المشكلة إنه كان يعرف بنات كتير أوي، وعلى فكرة هو اللي جه وقال لي وقعد يحكي لي؛ بس قال لي إنه بطّل الحوارات دي من مدة؛ بس أنا خايفة فعلاً أكون زي أي بنت عرفها؛ لأن أنا باكره الفشل جداً، وعمري -والحمد لله- ما فشلت.
آه ونسيت أقول كمان إنه من ناحية مستواه الاجتماعي والثقافي كويس جداً؛ بس أنا فعلاً قلقانة من حوار البنات ده، ومش عارفة لما يلمح لي تاني أصدّه ولا لأ.
bosy

لو عايز تفضفض لنا دوس هنا