طالبة بآداب سوهاج تكشف عن مفاجأة في حادث الكوامل: "اللي ماتوا 15 بنت غير الولد والسواق"

قالت ندى صلاح – طالبة بكلية الأداب جامعة سوهاج-، وشاهدة عيان على حادث طريق الكرامل بسوهاج، الذي راح ضحيته 11 طالبة وسائق السيارة، كما صرحت الجهات الرسمية، أنها كانت أحد ركاب الميكروباص الذي شهد الحادث بأكمله.
وروت ندى صلاح شهادتها على الحادث قائلة: "حادثة الكوامل وقعت أمامى مباشرًة حسبى الله ونعم الوكيل.. الحادثة كانت بشعة، واليوم كان صعبا جدا، إحنا كنا راجعين من الكوامل فى ميكروباص، واتفاجأنا بميكروباص طلع قدامنا وفجأة السواق فرمل، وسمعنا صوتا عاليا.."
وأضافت ندى "شوفنا عربية نقل بتخبط فى الميكروباص، والعربية اتقلبت ع الطريق، والميكروباص اتقلب فى الترعة وسكت الصراخ، وبعدها السواق قال استنوا نطلع لقدام شوية وبعدها جه كام مكروباص تانى ركن ورانا وأنا وكام واحدة نزلنا وناس تانية كتير نزلت من باقى الميكروباصات.."
وقالت شاهد العيان "رحت شوفت البنات وهيه مرمية فى الترعه كانوا يمكن 4 أو 5 محدوفين بره الميكروباص علي الترعة ومتغطيين بالطين ودمهم سايح فى مياه الترعة، وكانوا مكفيين على وشهم، ومعرفتش أشوف حد فيهم وبعدها قعدنا نقول للشباب انزلوا شوفوا البنات دى ماتت ولا عايشة، وطلعوهم ومحدش فيهم رضى يتحرك خالص، وبعدها أنا كلمت الإسعاف وردوا عليا وبعد ما قولتلهم حولوني على الإسعاف بتوع سوهاج وقعدوا ساعتين لحد ما ردوا وقالولى آه عارفين بعتنلهم بكل برود واستهتار.."
وأضافت "اتحركنا على سوهاج والبنات كلهن أعصابهن بايظة اللي بتعيط واللي بتترعش ويغمى عليها ووصلنا وقولنا فى الجامعة لحد ما عملنا مظاهرة كبيرة نطالب فيها بطرق آمنة ومنروحش من الكوامل تانى.. وطالبنا بإقالة ومحاسبة رئيس الجامعة والمحافظ على ماحدث.."
وتكمل ندى "بلغنا بطلب دم فصيلة (o) روحت أنا وشوية بنات مستشفى الأميرى وشوفنا الحالات هناك كان فى 2 مصابين شوفناهم، وواحدة فى العمليات والباقى مات، وبعدها كان فى واحدة مش لاقيه صحبتها بين الضحايا، واحنا قاعدين جه واحد قال لنا مواصفاتها، وإنها فى مستشفى الجامعة روحنا هناك، ودخلت الثلاجة علشان تتعرف عليها.. وطلعت منهارة وبتقول هيه وقالولها ادخلى اتاكدى تانى وقولتلها متخفيش هدخل معاكى بس رفضوا هناك، وطلعت هيه بالفعل "نسمةالسيد أحمد" وأخوها علشان يكلموا أهلها وفى المستشفى مصابة واحدة والباقى جثث وفى القنوات بيقولوا ماتوا عشرة دا كدب هما 15 بنتا غير ولد والسواق دول جثث يا جماعة.."
وتابعت ندى: "لازم ننظيم وقفة احتجاجية غدا فى جامعة سوهاج، ومنسمحش لقرار الأربعة أيام إجازة أنه يسكتنا واحنا مش عايزينهم يضحكوا علينا ويعزلوا كام واحد كبش فداء ويخلص الموضوع لا إحنا عايزيين افعال حقيقية تنفز مش شويه كلام ووعود وهمية ويارب محدش همته تقل ويكسل دى أرواح ناس ياعالم فوقوا كلنا كنا معرضين إننا نكون مكان الناس دول