الدكتور أحمد المصيلحى يكتب عن : تطعيم الحصبة وأسئلة مهمة

إيه الفرق بين حملة تطعيم الحصبة والحصبة الالمانية التي أعلنت عنها وزارة الصحة وعن التطعيم الثلاثي الروتيني ؟
التطعيم الثلاثي الروتيني : تطعيم ضد 3 أمراض وهما الحصبة والحصبة الالمانية والنكاف وهو تطعيم متاح طوال السنة ويمكن أخذه في أي وقت حسب جدول طفلك .
أما
التطعيم الخاص بالحملة المعلن عنها هو تطعيم ضد مرضين فقط وهما الحصبة والحصبة الالمانية ويعتبر هذا تطعيم إستثنائئ لمكافحة إنتشار حالات الحصبة وزيادة كفائة التطعيمات الاجبارية التي يتلقاها الطفل في جمهورية مصر العربية وذلك لوجود خطة كاملة لدى الوزارة للقضاء على الحصبة والحصبة الألمانية بحلول عام 2020 وهو متاح في وقت محدد فقط من قبل وزارة الصحة وهو وقت الحملة .
التطعيم ده مهم ولازم أدية لطفلي ؟
ايوة مهم جدااااا ولازم تديه لطفلك حتي لو اتطعم قبل كده التطعيم الثلاثي .
أيه أهميته يعني التطعيم الاستثنائئ ده ( بتاع الحملة ) ؟
التطعيم ده مهم جدا علشان مناعة طفلك بالاضافة أن تطعيم جميع الاطفال في فترة زمنية محددة ده يعتبر نوع من أنواع مكافحة إنتشار الفيروس في البلاد
لو أبني مخدشي التطعيم الثلاثي قبل كده .. أطعمه في الحملة دي ولا لأ ؟
أيوة يا فندم ده بالذات لازم تطعميه !!
طب ابني أتطعم من أسبوعين ( أي تطعيم ) ينفع أطعمة في الحملة دي ولا لأ ؟
لازم تستني مرور اسبوعين كمان لان لازم يكون في فترة بين التطعيمين مدة لا تقل عن 4 أسابيع .
لو أبني خد التطعيم الثلاثي من إسبوعين …. ينفع أطعمة في الحملة دي كمان ؟
أه يا فندم وفي الغالب أن لما يكون طفل حضرتك كمل شهر بعد التطعيم الثلاثي الي أخده من أسبوعين هتكون الحمله لسه شغالة وهتلحقي تطعميه ان شاء الله .
مده الحملة قد ايه
زى ما قالت وزاره الصحة أن الحملة مدتها 3 اسابيع .
طب في موانع للتطعيم ده ( الحملة ) ؟
بصي يا ست الكل التطعيم ده المفروض مياخدوش الاطفال دول
الي أصيب بالحصبة من مدة أقل من شهر
الي عنده حساسية من تطعيم الحصبة
الي بيتعالج بالكورتيزون
الي بياخد أدوية لتثبيط المناعة
الي عنده أمراض متعلقة بالمناعة زي مرض نقص المناعة أو سرطان الدم
سمعنا إشاعات عن التطعيم ده علي الفيس بوك كلها مليانه كلام بيشكك في الحملة دي … ايه رأيك في الكلام ده ؟؟
بصي يا ست الكل ,التطعيم ده زي ما قلنا خاص بالحصبة والحصبة الالمانية ووفرته وزارة الصحة والسكان بالتعاون مع منظمة الصحة العالمية , يعني اتوفر من مصادر معتمده , بالاضافة أن وزارة الصحة فحصت عينات منه من خلال عده جهات للتأكد من سلامته بالاضافة إلي أن الحقنة الي هيتطعم بيها طفلك غير قابلة للاستخدام مرة تانية يعني هتترمي ومحدش تاني هيتشك بيها.
التطعيم الخاص بالحملة ده حقن ولا نقط ؟
التطعيم ده بيتم عن طريق الحقن !!
اشمعنى الحملة دي مش بتلف علي البيوت ولازم نروحلها أحنا ؟
زي ما قولت التطعيم ده بيتم عن طريق الحقن وعلشان تضمن وزارة الصحة جودة الرقابة ومراعاة القواعد الامنه في حقن الاطفال وخاصة الرضع فكان لازم تثبت الاماكن الي هتتاخد فيها الحقن ومتبقاش في البيوت
طب وأيه هي أماكن التطعيم ؟
أماكن التطعيم هى : الوحدات الصحية، القوافل الطبية، ومكاتب الصحة، والحضانات والمدارس وسيتم الإعلان عنها وعن باقي المواقع المختارة
طب فيه أعراض جانبية للتطعيم ده بتاع الحملة يعني ؟
اعراض بسيطة جدا زي الي بتحصل في أي تطعيم زى أحمرار مكان الحقنة أو ارتفاع بسيط في درجة الحرارة !!
بس متنساش ان الاعراض الجانبية البسيطة دي متجيش حاجه جمب مخاطر عدم تطعيم طفلك في الحملة !!
ابني عيان يا دكتور هو ينفع أطعمه وهو عيان ؟
في الحالة دي قبل ما تطعميه هتسالي الطبيب المتواجد مع فريق التطعيم وهو بدورة هيفحص طفلك ويعرف هل أعراضه بسيطه ولا شديده وهيقولك يتطعم ولا لأ
ايه المواعيد الي حددتها وزارة الصحة لحملة التطعيم ضد الحصبة والحصبة الالمانية ؟
الحملة لسه معادها متحددشي لكن منتظر أنه هيكون خلال الشهر الحالي نوفمبر أن شاء الله وفيه بعض محافظات الجمهورية أعلنت أستعدادها لبدء حملة التطعيم ومنها الدقهلية والغربية ومحافظات تانية …
ايه الاعمار الي حددتها وزارة الصحة لحملة التطعيم ؟
من سن 9 شهور وحتي 6 سنوات
والتطعيم لكافة الأطفال المتواجدين علي الاراضي المصرية سواء كانوا مصريين أو أجانب !!
**كاتب المقال