منى الحديدى تكتب: "خير من صدقة يتبعها أذى"

كتير مننا بيجمع صدقات ماله
وبيفضل يخرجها في رمضان
تلاقي ناس بتوجه صدقات مالها
بالتبرع للمستشفيات اللي بتنزل
بأعلانات للتبرع في الشهر الكريم
وكأن المستشفيات دي مستنيه
صدقات الناس تتبني بيها !!
طيب انتي فين ياحكومه من بناء
المستشفيات دي وفين الدعم ليها ؟
وناس تانيه
بتفضل تنزل بنفسها تلف علي بيوت
المتعففين اللي مش بيتسولوا الصدقه
وااااه ياوجع قلبي علي اللي شوفته من
ناس مش بتطلع علي الشاشات
وتقول محتاجين ..ولا بتقف في
شارع وتمد ايديها للي رايح واللي جاي
والله والله بحكي واقع وبعيني شوفته وعيني كمان مابطلت بكاء
لما تشوف اخت واخ معاقين قعيدين عيشين في حجرة مترين في مترين الاخ علي السرير والاخت
علي الارض مطبخها في متر نومها
وبتستني اللي يخبط علي بابها يعطيها صدقه ..دول مواطنين مصريين ياحكومه
لما تشوف بنتين في المرحله الابتدائيه والاعداديه فقدوا الام والاب وعيشين في مكان صغير وبردوا مستنيين اللي يخبط علي بابهم يعطيهم الصدقه ..دول حقهم فين علي الدولة ؟
ولما تشوف أم سنها 80 سنه وبتخدم ابنها المعاق والمريض وعنده 50 سنه وعيشين في اوضه اقسم بالله ماتتحمل تدخلها وبرده مستنيين اللي يخبط علي بابهم او شباكهم يعطيهم الصدقه..دول حقهم فين وعند مين ؟
لما تلاقي رجل وزوجته المسنيين
ويعانوا من صعوبه في المشي وعيشين في مكان صغير دور سادس سلم خشبي تبكي العين
ويدمي القلب حالهم وبرده مستنيبن
اللي يطلع ستة ادوار علشان يعطيهم
صدقه ..دول حقهم فين ياحكومه ؟
ولما تلاقي ست بتغسل كلي وزوجها مريض كبد ومفيش مصدر دخل وتروح تمسح سلالم وتخدم في البيوت علشان تعيش وتجيب علاجها وعلاج زوجها وبرده بتستني اللي يخبط علي بابها يعطيها الصدقه دول حقهم فين ياحكومة؟
ولما تلاقي ست عندها خمسه اولاد وزوجها توفي وبتصرف علي ولادها في ظل ارتفاع اسعار وعدم دخل ثابت وبرده مستنيين اللي يخبط علي بابهم يعطيهم الصدقه دول برده مواطنيين مصريين
ولما تلاقي حاله بتحقن كل اسبوع بما يقرب من 1300 ج والزوجه تخرج
للخدمه والزل والاهانه لتدبير المعيشه والعلاج وبرده مستنيه حد يخبط عليها يعطيها الصدقه ..دول حقهم فين ؟
حالات كتير ومواطنين كتير اوي يجتمع لديهم كل عناصر الكرب
المرض والفقر والجهل ..مستحيل هتعتمد حياتهم علي صدقة الشهر الكريم من اصحاب الكرم والمال
نسلط الضوء عليهم ونناشد كل مسؤل وكل عضو مجلس شعب عن دايرته شوف الناس اللي في دايرتك
طالب بقانون يحمي الناس دي
ويضمن ليهم حق الحياة الكريمه
دون اهانه او كسر نفس
الناس دي ليها حق علي البلد
كل واحد مالوش دخل ثابت او وظيفه حكوميه حق ربنا المفروض تصرف له الدوله راتب شهري مناسب يقدر يعيش ويتعالج بيه حتي يشعر بقيمته كإنسان يعيش في دوله تحترم المواطن وانسانيته
مش هجوم اكثر ماهو تسليط ضوء ومناشدة لكل مسؤل مش واصله الصورة صح ولا حقيقه مره
اعضاء مجلس الشعب اللي بينوبوا عن المواطنين في كل مكان انتم الإشارة الاولي التي تشير الي هؤلاء
المكروبين استحلفكم بالله بقلب موجوع وعين بكت كثيرا لحال هؤلاء ..ليتهم يشغلوا بالكم .