أشعارى ماقبل الثورة...لكل شىء فى الدنيا نهاية

نسيتوا إن الإله موجود وسامع دعوة المظلوم
وفاكرين الحياة دايمة لأ يا ظلمة مش بتدوم
ده حقيقة لابدمنها وأكيد كلنا عارفينها
لكل شىء فى الدنيا نهاية ولكل واحد يظلم يوم
حقى أنا ممكن أسامح فيه لكن حقى ولادى لايمكن
أنا مش خايف أخاف من إيه أصلى بعدل الله أنا مؤمن
أنت معاك وربنا كرمك عمر ماحاش عنك ولا حرمك
وارث من أبوك ومن أمك إيه من الدنيا تانى تعوز
ناس مش لاقية تاكل أكلة على فتفوتة بتقوم شكلة
وأنت لاقيها فى بقك سهلة وكمان برده ضارب بوز
قالوا الزوج من حقه الشقة قالوا المفتى أجاز السرقة
قالوا حرام فى زمانا الصدقة والغلبان ياخد بالشوز
إحمد ربك وإرضى بحالك أجمل حاجة راحة بالك
ربك لو كرمك فى عيالك تبقى ساعتيها راجل محظوظ
عايز تبقى حياتك سكرلله سيبها وإوعى تفكر
ليه تخلى مزاجك يتعكر فوق أحزانك عدى ودوس