هدوء بعين مفتوحه

في ديسمبر 2010 كلامنا يارب يكون 2011 فيها الخير ونحقق جزء من احلامنا البسيطه
وبداية السنة الجديده كلها حزينه لتفجير الكنيسه القديسين
في يناير انتشرت كلمة شعب تونس الحر وننظر لانفسنا بحسرة وانكسار
و يوم 25 كل واحد خرج لانه عاوز يعمل اللي عليه ويكسر الخوف اللي جواه وكل حلمه ان يرجع بليل لبيته سليم ويريح قلب امه اللي قلقانه عليه
وانتهي يناير بفرحة انتصار المظاهرات وكسر الخوف ودمعة علي كل شهيد او مصاب قتله ابن بلده
وفي فبراير انتشرت كلمة اجندات وكنتاكي وموقعة الجمل والثورة المضادة و اللجان الشعبية
والغريب اننا نظمنا صفوفنا وواجهنا المخاطر من غير تخطيط مسبق ومع ذلك كنا منظميين جداا
ومفأجاه شهر فبراير خلع رأس نظام فاسد ويمكن ناس كتيرة قالت اقرصوني هو حقيقي حسني مبارك غاااااار.
وبداية شهر مارس انتشرت كلمة مخطط وتخطيط . فتنة طائفية
انا عاوز اقول كلمة بسيطه وهي هدوء من فضلكم
لان اللي بيحصل كتير علي عقول اي شعب كان من شهر واحد حلمه ابسط من كدا بكتير
عقولنا هلكت من ضغوط السرعة في ردود افعال كتيرة
مهما كانت قوة السيارة وسرعتها بس لازم يكون في فرامل تهديها وتسيطر عليها لحسن نفقد السيطره ونضيع كلنا
ارجو من الجميع اننا نركز في شغلنا
واننا كل يوم الصبح نشتري جريده وندخل علي الفس بووك او تويتر نتابع الاخبار بدل الافلام لازم نعرف اخبارنا ..ما بلدنا هي احنا
لازم نروح ندور علي كتاب الدستور المصري ونقراه عشان لما نروح الاستفتاء نكون فاهمين بنعمل ايه
لو حد طلب منا اي عمل تتطوعي نعمله طول ما هو في خدمة المجتمع
ومنفكرش في الصراعات السياسية لاننا احنا بس اللي نقدر نسيطر علي اي صراع او مخطط لاذيتنا لاننا متابعين الوضع بهدوء
لو كل واحد فينا اول ما يشوف جاره او صديقه او زميله في الشغل المسيحي وخده بالحضن انتهت بعديها الفتنة الطائفية من غير كتر كلام لاننا صدعنا لاننا باختصار احنا .. واحنا دي المسلميين والمسحين
وفي النهاية ارجوكم نهدي شوية عشان عقلنا يرتاح وتكون قرارتنا لمصلحتنا جميعا
بس المهم العين مفتوحه عشان لما نشوف غلط نقول لاء كلنا بصوت عالي وقتها عمر ما حد يقدر يكسرنا تاني