نِسَاني

حبيت انسان بس للأسف نساني والله اني ندمان لأني حبيته
حبيته ومن الصد والهجر عطاني حبيته و بأصدق احاسيسي جيته
عطيته روحي وقلت انه يتمناني و أنا على نيتي حبيته و تمنيته
ومن حبي كتبت له أحلى أغاني وسكنته قلبي و القلب صار بيته
وقلت صدره بيتي و حضنه مكاني وحطيته بعيني و بجفني خبيته
قلت يمكن يقدر وبروحه يفداني يمكن يقدر اللي من أجله سويته
بس ياللأسف من قسوته سقاني وأنا غيرالحب والغرام ماسقيته
للأسف جرحني و صدمني وبكاني وأنا اللي ما عمري في يوم بكيته
للأسف بسهوله باعني و نساني و بكل سهوله دمر كل مابنيته
حسافه فيه حبي و صدقي و حناني حسافه ليتني ماقدرته و لا عزيته
ما يستاهل التقدير لأنه أناني ولا أتشرف لو قلت اني هويته
خساره فيه شعري وأعذب ألحاني حرام فيه كل لحن لحنته و غنيته
مقهور لأنه ذاب في دفا أحضاني مقهور لأني في دفا حضني ضميته
مقهور لأنه عاش معي في زماني مقهور لأني بدافي شعوري دفيته
حرام أبكي ويكون مصدر أحزاني وحرام فيه كلمة حبيته و فديته
ندمان و من تأنيب الضمير أعاني ندمان على هالحب اللي حسيته
والله كرهت اليوم اللي فيه لقاني وكرهت اليوم اللي فيه أنا لقيته
كرهت كل لحظه عشتها بأماني كرهته والكره من قلبي أهديته
خلاص كرهته بكل أنواع المعاني وخلاص أنا بعته برخص ماشريته
انا انسان وأخيراً النسيان جاني ونسيانه أسهل من حب عطيته