اتغير قبل ما تغير

بقلم كارم عمران
ثورة 25 يناير ... ثورة التحرير ... ثورة التغير ... ثورة التعبير عن النفس . وعن الشعب المصرى . ثورة عملت اللى ماكنش حد فى العالم يتخيله .. ثورة قالت للعالم كله .. هو ده الشعب المصرى .. هو ده شعب الحضارة ... لما يقول للعالم كله انها ثورة سلمية عشان يحافظ على البلد ... و اول ما تتحققت مطالبه .. يقوم ينظف مكانه ويرجع ميدان التحرير اجمل من الاول .. كل الشباب والبنات والكبار يساعدوا بعض فى تنظيف الميدان .. ومش ميدان التحرير بس ده بيعمل ده فى مصر كلها . فى منظر قمة فى الحضارة والرقى .. وده اكبر دليل على احساس الشعب بمسئوليته تجاه بلده .. ودى رسالة بنوصلها لدنيا كلها .. ان هو ده شباب مصر . اللى كان بيتهموه بالتخريب عشان يداروا فسادهم . هما دول ولاد مصر بجد . ايد واحدة وفعلا خايفين على بلدهم . اجمل ما فى الثورة دى هى انها خلت كل واحد من شعب مصر . عرف انه يقدر يغير ويطالب بحقه . وان له دور فى بلده ودور مؤثر . خلته يعرف ان الخوف لما بنواجهه . هو اللى بيخاف ويهرب . ويفضل مكانه الشجاعة والاصرار على المطالبة بالحقوق . وده من اهم مكاسب الثورة .. رجعت مصر والمصريين لاصلهم . اللى التاريخ والعالم كله بيشهدوا بيه من اول الفراعنة لحد حرب اكتوبر 1973 . ودى بدايه لمستقبل جى .
الهدف من الثورة دى التغير .. عايزين يبقى شعارنا الفترة اللى جيا هو "" اتغير قبل ما تغير "" احنا فعلا بدأنا نطبق الشعار ده من اول يوم قامت فيه الثورة .. لأننا غيرنا جوانا احساسنا بالخوف .. ولما عملنا كدا .. غيرنا كتير اوى .. ومطالب كتير اوى لينا اتحققت. بس لسا جوانا حاجات كتير عايزة تتغير لان هو ده اللى هيغير مصر للاحسن .. وهتتغير بجد . لازم نعالج السلبيات اللى فينا .. اول حاجة لما نلاقى حد بيغلط نواجهه بغلطه . ومانساعدوش عليه . يعنى ما نديش رشوة عشان مصالحنا تمشى .. ولو اطلب مننا ده نبلغ عنه ما نخفش . ونلتزم بالصح عشان لما يطلب منا الغلط نقدر نواجهه .. لو اتعملنا من الشرطة بشكل مافهوش احترام لينا . نشتكى . ونقف فى وش اى فاسد مهما كان . مانقولش ده مركزه كبير فى البلد .. احنا اكبر منه . ونقدر نخليه مش موجود فى المركز ده .. احنا اللى خليناه فيه .. واحنا اللى نقدر نشيله منه .. عايزين نلغى من قاموس حياتنا كلمات معينة زى .. ( انا خايف ... مش هقدر اعمل كدا ... ماليش دعوة ..... خلينى فى حالى ... خلينى جنب الحيط .... مدام ما ضرنيش مش مهم ) .. لاء مش شرط يضرك انت بس هيضر غيرك . وهيجى عليك الدور .. او الضرر هيمسك بشكل غير مباشر من قريب او بعيد .. نلغى السلبية من حياتنا .. نبقى ايجابيين .
التغير مش لازم يكون سياسى بس . التغير لازم يكون على كل المستويات ... على كل واحد فى الشعب يبقى جواه النية فى تغير نفسه للافضل . بالشكل ده هنحافظ على اللى عملته الثورة . وهنساعد بعض وهنرجع مصر زى زمان .. الجار بيخاف على جاره .. والشاب بيحمى بنت بلده ويخاف عليها من غير ما يعرف هى مين . لانه حاسس انها بنت بلده .. اخته .. كل ده حصل فى ميدان التحرير .. عايزينه يبقى فى مصر كلها ... زى ما خلينا العالم كله خلال 17 يوم قال ان شباب مصر دول رجاله وكانوا مبهورين بينا .. عايزين نفضل فى عيون العالم كدا على طول ويعملولنا الف حساب .. وقبل ما نبقى كدا فى عيون العالم نبقى كدا فى عيون بعض .. احنا قادرين نعمل ده لاننا عملنا الاصعب منه .. احنا اقوى شعوب الارض .. وبنقوى ببعض وبنخاف على بعض . لما بنعمل كدا بنهز الدنيا والعالم كله وانتم شوفتوا . عايزين نبقى كدا .. عايزين مصر تبقى اجمل بلاد الدنيا .. وهى فعلا اجمل بلاد الدنيا بشعبها ... تحيا الثورة ... تحيا مصر