محمد اسماعيل القناوي يكتب : مسرحية ...امر مكتبي

اللوحة الاولى
[قبل ان يضاء المسرح يدخل مرعى فى بؤرة ضوء . . . . . ]
مرعى كل يوم اشوف الناس احس انى ذئب وهما . . . (صمت ) غنم . . ... كل يوم
(يدخل عوض فى بؤرة ضوء اخرى . . . )
عوض كل يوم اشوف الناس احس انى . . . ثعبان وهما . . . بيض الحمام اللذيذ ( صمت ) كل يوم
(يدخل سامى فى بؤرة ثالثة . . . )
سامى كل يوم اشوف الناس احس انى . . . (لحظة صمت طويلة ) احس انى صرصار وهما حيد سونى
(يدخل صابر من عمق المسرح فى بؤرة ضوء ، بينما يظلم على الشخصيات الاخرى . )
صابر كل يوم اشوف الناس ، اشوفهم ، اعيش معاهم، أخا نقهم ، أصالحهم ، أكلمهم ، أخاصمهم ، أشكى منهم ليهم ، ابتسم لهم ، اعيط فى مناديلهم ،أحسهم ... ... ... ... (صمت ) كل يوم
[ تخفت الاضاءة تدريجيا حتى الاظلام التام ]
اللوحة الثانية
[ يضاء المسرح على غرفة بها مكتب خشب ومقعد . ليس لها اى نوافذ ، باب فى الجهة اليسرى . .. ( مرعى يجلس على المقعد وصابر واقفا امام المكتب )]
مرعى انت واقف ليه يا صابر ؟ ما تقعد يا راجل .
صابر شكرا يا مرعى بك انا لازم امشى .
مرعى ليه لازم ؟
صابر عشان . . . ( صمت )
مرعى عشان آيه ؟
صابر عشان . . . عشان يعنى . . . عشان لازم
مرعى ( ضاحكا ) يا راجل مفيش حاجة اسمها لازم فى الدنيا .
صابر على كل حال تأمر بإيه ؟
مرعى ابدا ، ولا حاجة . . . ( صمت ) . . معاك سيجارة ؟
صابر ( يضع يده فى جيبه يخرج علبة سجائر ويخرج منها سيجارة . . . ) أتفضل . .
مرعى ليك انت انا مابغيرش ما انت عارف
صابر بس انا مش عايز
مرعى يا راجل . . ولع . . خدلك خمسة نيكوتين هدٌَى الجثة . .
( بينما يشعل صابر السيجارة ينهض مرعى ويتجه ناحية الباب ويغلقه بالمفتاح ويأخذ المفتاح ويضعه فى جيبه ثم يتجه ناحية صابر . . )
مرعى اقعد على الكرسى يا صابر
صابر مايصحش يا مرعى بك . . .
مرعى (مغيرا لهجته . . . ) اقعد عشان امليك حاجه .
صابر ( يسحب الكرسى ويضعه بجوار المكتب . . . ) فين الورق والقلم ؟
مرعى آه .. انا معنديش . . . شوف معاك . . . دور فى محفظتك على اى ورقه . . .
صابر انا معنديش محفظة
مرعى يا راجل يا صابر . . . شوف بس فى جيوبك . . . دوٌر يا شيخ
صابر ( يضع يده فى كل جيوبه ، يخرج علبة السجائر وبطاقته . . . ) مفيش غير البطاقة و . . .
مرعى كويسه جدا
صابر كويسه ؟!
صابر بس دى . . .
مرعى دى آيه هو فيه ورقه احسن من دية ، ولو خايف عليها تبوظ ابقى اعمل بدل تالف . . . او امسح اللى كتبته .
صابر امرك . . . بعد مكتب اللى حضرتك هاتملهونى اروح المكتب بتعنا وأبيضه وبعدين امسحه ، ممكن قلم اصلى لا موآخذه ممعيش قلم .
مرعى وانا ممعيش قلم ،مش مشكله نتصرف
( يذهب ناحية المكتب يأخذ سلخة من خشب المكتب . . ) دى تنفع . خد اكتب .
صابر أزاى ؟!
مرعى ياه سهل قوى .. بُص .. (يذهب اليه ويأخذ منه سلخة الخشب ثم يجذب ذراعة بقوة ويغرزها فيه )
صابر آ آ آ آ ى
مرعى ( آمراََ ) اكتب .
صابر دمى بيتصفى .
مرعى الحق اكتب . . . (صمت ) الحبر الاحمر والريشة معاك . . . اكتب
{ يحاول صابر الهروب من الباب المغلق ولكن يفشل بينما يضحك مرعى وهو يعيده الى مكانه ثم يغمس سلخة الخشب فى دمائه ويعطيها له } اكتب العنوان لائحة لتنظيم العمل
صابر ( يكتب وهو يتألم )
مرعى اولا .. تؤجل كل الحقوق لكل من له حق الى اليوم التالى حتى يصاب بالإعياء فتأكله . . . ( صمت )
صابر ( فى اعياء يردد ما يكتبه ) . . . . . . . فتأكله . . . (صمت )
مرعى ثانيا . . . تؤجل ثانية كل الحقوق لكل من له حق الى اليوم التالى ان لم يصب بالإعياء عله . . . ( صمت )
( يحاول صابر الهرب مرة اخرى ويجرى الى الباب ولكنه يفشل فى فتح الباب بينما مرعى يضحك ويفتح درج المكتب ويرتدى قبعة كالتى يرتدونها رعاة البقر ويخرج حبل يرميه على صابر ويجذبه نحوه ثم يغمس سلخة الخشب فى دمه )
مرعى اقعد واكتب ( يجلس صابر فى قلة حيله وكلما مر الوقت زاد اعياء ) كتبت آيه ؟
صابر تؤجل ثانية كل الحقوق لكل من له حق الى اليوم التالى ان لم يصب بالإعياء عله
مرعى ثالثا ... تؤجل ثالثا كل الحقوق لكل من له حق الى اليوم التالى ان لم . . . . (صمت )
(يحاول صابر الهرب مرة اخرى ويتجه ناحية الباب بخطوات ثقيلة من اثر الاعياء بينما يجذبه مرعى من الخلف بشده وغضب )
مرعى انت متمرد ليه ؟ شغل حلق حوش بتاعك ده مش عايزه . قعد اكتب ... كتبنا آيه
صابر ثالثا ... تؤجل ثالثا كل الحقوق لكل من له حق الى اليوم التالى ان لم . . . . (صمت )
مرعى رابعا . . . صابر ( يقاطقه ) المكان الفاضى فى البطاقة اتملا
مرعى هو كان لسه متملاش ، اكتب فى الناحيه الثانيه .
صابر دى صورتى ، واسمى ،و . . . (صمت)
مرعى مش مهم الفقرة اللى جيه دى اهم فقرة وبعدين تبقى تمسح ده كله .
صابر ده بالدم مش هايتمسح
مرعى ابقى اعمل بدل تالف ، اكتب ، رابعاٌ كل من يعترض اويطالب بحقه يعتبر ارهابياٌ ويردع دون النظر لما يطالب به . خامساٌ ...
صابر ( يقاطقه ) البطاقة اتملت
مرعى ( ضاحكاٌ) تعبت ؟ طيب هات البطاقه واستريح شوية وبعدين نكمل . . . نام
صابر دمى بيتصفى
مرعى هات البطاقه و نام . . .
صابر ( فى خوف وهو يحتضن البطاقة )لا مش هانام
مرعى متخفش انا هنام معاك ( ينزل مرعى على الارض لينام ) انزل نام وهات البطاقة
( ينزل صابر ينام بجواره وهو ممسكاٌ بطاقته بشده )
مرعى هات البطاقة
صابر لاَ . انا هابقى انقل اللى فيها واجيبه لسيادتك
مرعى ( بصيغة امر شديد اللهجة ) هات البطاقة
صابر (بعنف) لاَ دى بطاقتى انا . . . انا هأنقل . . . (صمت )
مرعى نام . . اهدا ونام
صابر دمى بيتصفى
مرعى حيتجلط كمان شويه
صابر انا حاسس . . .
مرعى بإعياء ؟
صابر ( يُقاوم ) لاَ
مرعى نام
صابر مش قادر
مرعى حاسس بإيه ؟
صابر دمى . . . . . ( صمت )
( نرى مرعى نائما ومغمض عين والأخرى مفتوحة بينما يصاب صابر بحالة اغماء . . . يحبو مرعى ويذهب خلف المكتب ويعود بوجه ذئب . . . ينحسر الضوء فى بؤره على مرعى وهو ينقض على بطاقة صابر ويأخذها وهو يضحك ويختلط صوت الضحك بصوت عواء ذئب ، ثم تخفت الإضاءة تدريجيا حتى الإظلام التام
اللوحة الثالثة
( يضاء على عوض وصابر ملقى على الارض )
عوض انت شهى قوى ، اصحى ، يا اخ ، اصحى
صابر انا حاسس بأعياء ، فين بطاقتى ؟
عوض مش عارف ، هى كانت فين ؟
صابر فى ايدى
عوض امتى ؟
صابر قبل ما انام . . . كنت بكتب
عوض بتكتب على البطاقة !؟
صابر ايوه . . . هو امرنى
عوض امرك !؟ . . . . . آآآه .. هو مين ؟
صابر مرععى بك . . . المدير العام
عوض لا . . . . ده مش مرعى بك
صابر هو . . . صوته . . . صورته . . . سحنته . . . هو
عوض ضحك عليك
صابر مين ؟
عوض اللى كان بيمليك
صابر مرعى بك
عوض لا . . . اللى كان بيمليك
صابر هو
عوض استريح على الكرسى وانا هشرحلك
(ينهض عوض وتجه ناحية الباب وينادى ) سامى . . . ابعتولى سامى ( يعود الى صابر ) قوم يا صابر قوم استريح على الكرسى
صابر مش قادر
عوض ليه ؟ مالك . . . ؟ حاسس بائيه ؟
صابر صفى دمى ، وبطقتى ضاعت
عوض مين ؟
صابر مرعى بك..( صمت) المدير العام
عوض مرعى بك ؟ولا المدير العام؟
صابر هو هو
عوض لاء . . مرعى بك مش هو المدير العام
صابر ليه سنين معه وهو المدير العام
عوض مين ؟
صابر مرعى بك
عوض انت مش فاهم . . مرعى بك مش بالدرورة يكون المدير العام
( يدخل سامى )
سامى افندم ياعوض بك
عوض اقفل الباب ( صمت وسكون )
صابر انا تعبان
عوض بالمفتاح
صابر صفى دمى ( صمت وسكون )
عوض وتعالى
( تخفت الاضاءة تدرجيا ونرى بؤرة على عوض وسامى )
عوض الجرح لسة جديد انقر فيه لحد مايتفتح من ثانى
سامى هو تعبان ؟
عوض قدامك هو تعبان جدا
سامى اوعى تأكله ، لحسن . . .
عوض ( ضاحكا ) ماتقلقش . . . ياله انقر فى الجرح
( يضاء المسرح ويقتر سامى من صابر )
سامى انت عايز ايه ؟
صابر بطاقتى
سامى بكره نجبلك وحدة
صابر لا دى بتعتى
سامى طيب . . بكره
صابر بس ده حقى
( يأتى صوت .. تؤجل كل الحقوق لكل من له حق الى اليوم التالى حتى يصاب بالإعياء فتأكله . . . ( صمت ))
صابر لاء حقى بأمر القانون
سامى لاء ...بأمر المدير العام
صابر القانون اقوى
سامى تنظيم العمل من سلطة المدير
صابر بس دة حقى
عوض انت معاك البطاقة يا سامى
سامى لاة بس هو هايخدها بكرة
عوض مين ادهالك
سامى المدير العام
صابر مرعى بك..؟
سامى لاء..المدير العام
عوض انت لسة مش فاهم
صابر طول عمرة مرعى بك هو المدير العام
عوض ابداَ.. مش كدة يا سامى
سامى فعلاَ..هو بيبقى لحظات...لكن هو طول عمرة مكنش المدير العام
صابر انا متلخبط
عوض مش فاهم ..انت مش فاهم
صابر فهمنى
سامي بكرة
صابر والبطاقة
سامى بكرة
( صمت وسكون)
صابر دماغى
عوض عاملة ازاى
سامى زى البيضة؟
صابر ممششة
فيس بوك