ليلة القبض علي صوتى

احنا بتوع الغريب احنا بتوع العجيب قرب قرب قرب معانا انتخابات تيك اواى او سلق بيض زى ما بيقولوا
احنا بتوع الجديد والتجديد واللي مش عاجبه يعمل عبيط ايون ايون قرررب..
شوية انشا بقا
تشهد مصر هذه الساعات اهم انتخابات لعضوية مجلس الشعب منذ انشائه في عام 1924 حيث انها الانتخابات التى تسبق انتخابات رئاسة الجمهورية..
مليون حاجة تغيظ نبدء منين منين منين
ايون نبدء من الاول بقا خالص
الدولة الديمقراطية المضبوطة الصح يعنى بتقول ان الدولة بها ثلاث سلطات تنفيذية وتشريعية وقضائية ويمنع تداخل عمل اي من السلطات في الاخري..
عندنا بقا في مصر ياسيدى السلطة القضائية تحت راية وزارة العدل"التنفيذية" والوزير عضو مجلس شعب
يعنى سيادة الوزير يقترح مثلا قانون ويرفع ايده في المجلس يوافق عليه !.
مجلس الشعب من حقه سحب الثقة من الحكومة يعنى حل الوزراء وتشكيل حكومة اخري طيب اكيد الوزير في المجلس هيقول مليون لا لسحب الثقة..! الا بقا والعياذ بالله لو كان عنده انفصام اللهم احفظنا
طيب ماعلينا من دى
اما يبقي المرشحين لمجلس الشعب في دواير كتير علي مستوى الجمهورية كلها ومعظم الناخبين يختاروا مرشحهم علي اساس القبلية او العصبية ومالوش دعوة بقا هو حزب ولا مش حزب مستقل ولا مش مستقل هو قريبي بقا وخلاص او ابن حتتي يبقي ازاى هنتكلم عن "الوعي"
اما الاخوان المسلمين نايمين من خمس سنين يمكن منسمعش عنهم الا كل شهرين تلاتة لاما في الجامعة لاما شوية اعتقالات علي الماشي ...ويجى يقولك الاسلام هو الحل ياعم ياسيدى ياحبيبي عارفين والله انه هو الحل بس مش انت الاسلام وبعدين انت فين من خمس سنين اوعا تقولي معتكف ..!
الاسلام ده يابيه اما ينتشر في اي حته ويتم العمل بيه يحالف المطبقين النجاح والامثلة كتير طيب انتوا ليه لغاية النهاردة حلفيكم الفشل دخلتم المجلس اللي فات ايه الجديد اللي حصل فين طبقتم القاعدة الاساسية للجماعة "الاسلام هو الحل" في الدورة اللي فاتت
واما يجوا بقا بتوع الحزب الوطنى زعلانين اوى من شعار الاسلام هو الحل علي اساس انه شعار دينى مخالف للدستور طيب ماهو اشهر رمز للحزب الوطنى الهلال هو ده مش رمز اسلامى؟!
اما كتير اوى من المرشحين يبقوا مستقلين وبمجرد نجاحهم يتحولوا للحزب الوطنى ده يبقي اسمه اية؟
سمك لبن تمر هندى
اما الوطنى يمضي المرشحين علي تعهد بعدم خوض الانتخابات كمستقل اذا لم يرشحه الوطنى ..ويرجع من تانى المرشح اللي مختارهوش يقدم طعون ويحتج ويصرخ بانه من حقه دخول الانتخابات طيب انت ايه اللي خلاك توافق من الاول هي خلاص بقت كلها فهلوة" لتصيب لتخيب"
اما الهيئة العليا للانتخابات تحلف تلاتين طلاق انها هتنفذ اوامر القضاة باضافة اسماء المرشحين المقدمين الطعون في جدول الانتخاب قبل الانتخابات ب12 ساعة ويبقي المرشح قاعد في بيته حاطط ايده علي خده قبل بدء الانتخابات بعشر ساعات ومش عارف هو في الانتخابات ولا لأ وقاعد يشد شعره شعره من راسه "هخش لا مش هخش"
اما ابقي ماشي في منطقتى بتسكع في الطرقات وتقابلنى لافتة......
اهالي وسكان منطقة كذا تبارك ترشيح كذا
هو ايه اصله ده هو انا مش ساكن هنا ولا ايه ؟!
اما محدش يسمع عن مرشح واحد قدم خطة عن دايرته"برنامج انتخابي " وكل البلد كاتبه علي الجدران من اجل التغيير.!
يبقي صوتى لو حطيته لمستقل ممكن بكرا يبقي وطنى وصوتى لو حطيته لمستقل في راسه زبيبه ممكن بكرا يبقي اخوان ولو حظى وحش وكان مرشحى اللي انا مقتنع بيه من بتوع الطعون المعلق امرها لغاية اللحظة دى يبقي صوتى راح هدر ولو اختارت مرشح ومفتنع بيه وكان حظه وحش من بتوع الطعون وبقا حظه حلو الصبح ولقيناه في الجداول واروح والاقي مليش صوت اصلا يبقي ايه!
ولو ليا صوت والمرشح اللي انا مقتنع بيه رشحته ودخل مجلس الشعب لو انا مكنتش وطنى وهو زيى مش وطنى ومتحولش لوطنى "صاحب مبدأ يعنى ودا وشرفك مفيش منه" هيبقي هو اقليه ووجوده في التصويت علي القرارات والقوانين زي عدمه يبقي برضه صوتى راح هدر!
يبقي لاما ابقي وطنى واحس بقا انى مواطن ويبقي" احتكار اختياري" حلوة الكلمة دى جديدة ..
لاما دي ليلة القبض علي صوتى
ويابخت الخرسانين.