بقلم احمد النجار هل الشعب المصري يريد فعلاً التغيير ؟ هل يريد تقدم البلاد ؟ تعالوا نبص شويه كدا ونعرف يعني إيه تغيير يعني مفيش حد يمشي في طريق مخالف ويقول دي حته صغيره هاخطفها خطف كدا يعني مفيش حد يركن في الممنوع ويقول دقيقه واحده بس أروح أجيب حاجه وأرجع تاني .. ويتأخر ساعه ولا ساعتين !! يعني مفيش حد يسوق من غير حزام الأمان .. آه امشي بالقانون يا خفيف وبطل فزلكه يعني مفيش باعه جائلين إلا بترخيص يعني مفيش إشغالات .. يعني سعادتك مش هاتقدر تطلع بره المحل بتاعك اليافطه إياها في الشارع ومكتوب عليها سنترال أو مكتبه أو أي شئ وتسد بيها الشارع علشان الناس تتنيل تاخد بالها منك يعني مفيش حد ياخد رشوه يعني مفيش حد يدفع رشوه يعني مفيش حد يبني في الأراضي الزراعيه ويقول وماله ماهو إللي جنبي باني وعادي يعني يعني مفيش حد يشوف فاسد ويقول ضرر أقل من ضرر .. الفساد فساد يا غبي يعني مفيش كوسه .. علشان الكوسه بتجيب خيار للناس وأحياناً أته :) يعني مفيش موظف يروح شغله ويشتغل نص ساعه والباقي أزأزة لب ورغي مع الناس وفي الآخر يتنطط عليهم ويقولهم فوت علينا بكره يعني مفيش ضابط يتنك على الناس ويضرب الحته الراي بان والسلسله ويتمشى بأه عامل فيها أبو لهب .. ناقص يجيب كرباج ويكربجنا !! يعني مفيش أمين شرطه يتفق مع العيال البلطجيه علشان يعملوله قضايا .. وكله بالفلوس يعني مفيش صيدلاني يبيع حبوب مخدره للناس ويقول يكش يولعوا .. عادي بأه يعني مفيش مقاول يغش في المقاولات وفي الآخر العماره تقع على دماغ الناس يعني مفيش دكتور يروح المستشفى ويعامل الناس أي كلام وفي العياده يفشخهم في الفلوس في مقابل الإعتناء بيهم .. الطب رساله يا جحش يعني مفيش مدرس يعطي دروس خصوصيه ويروح المدرسه يقول للعيال خدوا درس عندي علشان أنجحكوا في العملي بتاع الشهر يعني مفيش صنايعي يلاقي إللي قصاده أستاذ ولا بنت مش عارفين حاجه يقوم يغشهم في البضاعه وكمان ياخد منهم فلوس كتير .. ربنا فوق يا عم الاسطى يعني مفيش فصيل كان طالع عين أمه ومسحول في السجون وعمال يقول أنا بتاع ربنا وأول ماربنا يفتحها عليه وينصره يتنطط على الناس ويقولهم موتوا بغيظكم ويعاملهم زي ماهو كان بيتعامل .. مرضى نفسيين وكارهين للناس يعني مفيش واحد يقول قال الله وقال الرسول ويشوف غلط بيحصل ويسكت عنه لمجرد إن الغلط دا بيكون في حق ناس هو مختلف معاهم فكرياً .. مترفعش القرن لحد وخليك راجل !! يعني مفيش واحد كان عاوز يمسك حاجه ولما مجيتش يفضل يطلع القطط الفطسانه في إللي مسك ومش مشكله بأه المكان دا يخرب ولا يولع .. عادي يعني مفيش واحد عارف إنه بيكذب ويستهتر بدم الناس .. وفي الآخر عامل فيها رأس الرجاء الصالح !! يعني ويعني ويعني .. حاجات كتير قوي قوي قوي قوي فاسده عندنا في مصر مصر متخرتأه فساد يا رجاله .. ها قولولي بأه عندكوا استعداد تنضفوا وتقوموا البلد على رجليها .. ولا كل واحد هايفضل يشتم في التاني وخلاص ؟؟ يا عزيزي كلنا عراه ..
