مشهد وحوار مع صديقي كاره الثوار

بقلم : حسام فاضل حشيش
أنا : يسقط يسقط حكم العسكر ..
هو : انهم خير أجناد الأرض .. انت ياصديقي خائن وعميل وماسونى
أنا : الانتخابات البرلمانية كانت صفقة ما بين العسكرى والاخوان والعسكرى
هو السبب في النجاح الكبير للأحزاب الدينية بعد تعديل قانون الدوائر
الانتخابية
هو : دى نتيجة الصندوق ولابد أن تحترم والمجلس العسكرى الذي يضم قيادات
وأسماء وقامات عالية خدمت تراب مصر سنوات لا يعقد صفقات انهم الطهر بعينه
وانت ومن على شاكلتك أقزام وعلمانيين وخونة
أنا : لابد من تطهير القضاء .. معا من أجل استقلال القضاء ..
هو : القضاء غير ملوث حتى يتم تطهيره .. والقضاء هو ملاذنا وأمننا ومستقل تماما
أنا : المجلس العسكرى هو من سمح بانشاء أحزاب النور والحرية والعدالة
وغيرها وهى أحزاب ذات أساس دينى كجزء من الصفقة
هو : لكل فرد الحق في الانتماء السياسي كما يحب .. المجلس العسكرى هو
صمام الأمام الذي يحمى البلد من المتأمرين واللى عاوز يعمل حزب يعمله ..
المجلس العسكرى مضربش حد على ايده ولا يعقد صفقات مع أحد
أنا : لماذا لا يطبق قانون العزل ؟ كيف لشفيق أن يتقدم الجميع؟ المجلس
العسكرى يريد شفيق هناك شواهد تزوير واضح لصالح شفيق .. جميع مؤسسات
الدولة تعمل لصالح شفيق
هو : احترموا الصندوق واحترموا ارادة الشعب والغلط هو غلط الثوار الذين
لم يجتمعوا على مرشح واحد مش ذنب المجلس العسكرى والمجلس لا يزور لأحد
أنهم خير أجناد الأرض
أنا .. هناك فرق بين الجيش والمجلس العسكرى .. نحن ننتقد المجلس العسكرى
وليس جيشنا العظيم
هو : يسقط خونة الوطن وأعداء جيشنا العظيم .. انت بتتكلم زى البرادعى
العميل الامريكانى
أنا : حد بيصدق توفيق عكاشة ياعم
هو : أيوة عشان كاشفكم وفاضحكم زعلانين .. الراجل ده مش بيقول حاجة إلا
بمستندات كل حرف بينطق به صح
أنا : نلتقي بعد الفاصل ... كلها أيام وتظهر نتيجة الجولة الأخيرة
هو : موتوا بغيظكم .. شفيق رئيسا للجميع .. بس ياريت تحترموا الصندوق
وبلاش مظاهرات وتحرير والفوضي دى وتقبلوا النتيجة
وظهرت النتيجة الأخيرة وأختفي صديقي لأيام ثم عاد ناظرا للأرض
هو : مصر ضاعت أنا حزين على مصر بقت اخوان
أنا : مصر أكبر من الاخوان .. مصر أكبر من الجميع ..
هو : ايه رايك في النتيجة
أنا : ايه رأيك انت .. المجلس العسكرى زور النتيجة ولا دى نتيجة صحيحة ؟
هو : مش عارف .. لكن مش نتيجة طبيعة
أنا : مولانا توفيق عكاشة قائد ميدان مصطفي محمود و إمام وخطيب الكتلة
الصامتة يتّهم المجلس العسكرى بتزوير النتيجة وعقد صفقة كبرى مع
المخابرات القطرية
هو : أيوة الكلام ده صح ... فيه صفقة كبري تمت ( العسكرى والاخوان وايران
وقطر وامريكا وموزمبيق كمان ) بس محدش بيصدق عوكشه أوى يعنى بتوسع منه
أوقات
أنا : المجلس العسكرى يزوّر؟.. بس دول خير أجناد الأرض ؟
هو : لا يمكن شفيق يسقط .. لكن المخابرات والشرطة العسكرية حاصرت فيلا
شفيق وهددته لو اتكلم هيعتقل وامريكا دخلت قناة السويس بالطائرات
والبواخر والمدمرات وكان لابد لشفيق أن يصمت ويتقبل النتيجة
أنا : المجلس العسكرى لا يمكن يتقبل اى ضغوط عليه .. دى أسماء وقامات
عالية خدمت تراب الوطن ياراجل .. وشفيق أيضا راجلهم
هو : بس مينفعش الشاطر أو حد اخواني يشكل الحكومة .. أصلح واحد هو
البرادعى .. لانه هيحد من نفوذ الاخوان .. البرادعى ليبرالى وتاريخه مشرف
وعلاقاته حلوة
أنا : بس معقول المجلس العسكرى يعقد صفقة مع الاخوان ..
هو : أيوة بيعقد صفقات ؟ فاكر ايام الانتخابات البرلمانية ؟ عقد معاهم
صفقة وسابهم ينجحوا في البرلمان عشان يكتموا الثوار .. مكنوش هينجحوا الا
بمساعدة المجلس العسكرى
أنا : بس برضه مينفعش نتهم خير أجناد الأرض وقضاء مصر الشامخ انهم زورا النتيجة
هو : لا تم تزويرها والقضاء غير مستقل و يسقط يسقط حكم العسكر
أنا : بتتكلم كده ازاى عن القامات العليا .. أنت عميل وخائن ومتأمر على
جيشنا العظيم
هو : ..............................
....................
أنا : .................................................
( لم يكتمل المشهد بعد وليس لديكم الصلاحيات الكاملة لقراءته .. لذلك
سأكمله بموجب اعلان مكمل يتضمن صلاحيات حضراتكم لقراءة المشهد كاملا )