ما قبل المحاكمة

بقلم على عبد الله على
ساد الهدوء المركز الطبى كما هو معتاد منذ عام وأما البوابة الداخلية للمركز وقف جنديين للحراسة وقد أشعل أحدهم سيجارة ومد يده بسيجارة لزميلة الذى إلتقطها شاكرا قبل أن يقول له
· فكرك إيه إللى هايحصل بكرة ؟
· العلم عند الله يا رفاعى
· أنا شايف إنه هياخد براءة
· بص يا إبنى أنا بطلت أشغل دماغى بالحكاية دى وإحنا عبد المأمور يقولولنا خليكوا هانفضل هايقولونا إرجعوا الثكنات هانرجع
· ياما كان نفسى الموضوع يطول شوية ده إحنا هنا متهنين وبناكل الشهد
لفت إنتهباهم نداء قوى من عند البوابة الرئيسية
· إنتباااااااااااااه
إلقى كلا منهما السيجارة بسرعة وشدوا قامتهم حتى إقتربت منهم سيارة فى مقدمتها علم مصر وما أن توقفت على بعد خطوات منهم حتى ترجل منها السائق ليفتح الباب الخلفى للسيارة وينزل منها ظابط جيش برتبة لواء فأدوا التحية ولكنه تجاوزهم بسرعة وكأنه لا يراهم ثم إستقل المصعد برفقة ظابط برتبة أصغر حتى توقف بهم المصعد فى الطابق الثالت فخرج الظابط مسرعا يتقدم اللواء وهو يهتف بالظباط المصتفين على طول الممر
· إنتبااااااااااااه
فشد الظباط كلهم قامتهم وأدوا التحية العسكرية في حين تجاوزهم اللواء بخطوات واسعة بدون أن يرد التحية حتى وصل إلى غرفة عليها حراس يرتدون الزى المدنى على خلاف الباقيين
· بلغ سيادة الرئيس إن اللواء " عرفان " محتاج يقابله ضرورى
فطرق ظابط الحراسة باب الغرفة وإنتظر نصف دقيقة حتى أتاه صوت محشرج من الداخل يسمح له بالدخول فدخل ولم تمض دقيقة حتى خرج وأخبر اللواء أن الرئيس ينتظره فى الداخل فخلع اللواء قبعته العسكرية وضمها إلى صدره قبل أن يدخل الغرفة
· سيادة الرئيس
· فيه إيه يا عرفان
· كنت محتاج أكلم حضرتك فى أمر مهم
· إتكلم يا عرفان مافيش حد غريب ... دى سوزى
نظر إليها اللواء بإحترام قبل أن يتكلم , كانت الغرفة فسيحة يوجد بها تلفاز كبير وسرير وكان " مبارك " يجلس على كرسى هزاز ويرتدى روب دي شامبر ونظارة طبية وبجانبه زوجته على كرسى مجاور
· بخصوص النطق بالحكم بكرة يا أفندم ؟
· براءة طبعا يا عرفان ... شىء طبيعى
· بخصوص ده يا أفندم
قالها بلهجة مترددة والكلمات تهرب منه فقال مبارك بحزم
· إيه إللى وراك يا عرفان ؟
· الحكم بكرة مش هايبقى براءة يا أفندم
فإنتفضت سوزان من مكانها صارخة بغضب
· إيه التخاريف دى , إنتم بعتونا خلاص ؟ طنطاوى باعنا يا مبارك
فسكت مبارك حينا يفكر قبل أن يلتفت إلى سوزان
· سيبينا لوحدنا شوية يا سوزى
· أسيبك إزاى ده ....
· قلتلك سيبينا وما تقلقيش
فإنصرفت من الغرفة غاضبة وتركتهم وحدهم
· إتصلى بطنطاوى حالا يا عرفان
· ما أنا لسة ما شرحتش لحضرتك السبب
· قلتلك إتصلى بطنطاوى حالا من غير مجادلة
فأخرج اللواء هاتفه وطلب رقما
· إدينى المشير حالا يا بنى
لحظات مرت قبل أن يجيبه صوت طنطاوى
· سيادة الرئيس معاك يا أفندم
فإلتقط مبارك الهاتف وقال بلهجة غاضبة
· إيه التخاريف دى يا طنطاوى
· إحنا متفقين إن الحكم براءة ... إيه إللى جد دلوقتى
· يعنى إيه هو هايفهمنى ؟
· ماشى يا طنطاوى ... بس الأولاد تخلى بالك منهم
· تسلم عيونك يا طنطاوى
ثم أغلق الهاتف وأعطاه إلى اللواء
· فهمنى بقى إيه معنى الكلام ده ؟
· الحكم هايكون بكرة على سعادتك ب25 سنة يا أفندم
· إيه ؟ إنت مجنون ؟
· صبرك عليا يا أفندم
· كمل ... أما نشوف
· زيى ما حضرتك عارف إن أى وثائق أو أوراق تدين سعادتك تم حرقها فى مقار أمن الدولة
· مفهوم طبعا
· وبالتالى لم يتم تقدم أى شىء يدينك فى المحاكمة
· وعلشان كدة يا عرفان المفروض الحكم يكون براءة مش 25 سنة
· طبعا يا أفندم , لكن لو تم الحكم بالبراءة الأن الناس غضبها هايزيد وهايدوا أصواتهم لمرسى وساعتها الله أعلم إيه إللى ممكن يحصل
وضع مبارك يده على رقبته يتحسسها بحركة لا إرداية وهو يبتلع ريقه
· يا ستار يا رب ... كمل يا عرفان
· يبقى الحل إن سعاتك تاخد حكم مشدد وده هايخلى الناس إللى فى البيوت إللى مش بتتابع غير التليفزيون المصرى والفضائيات إللى تبعنا برضه تطمن للحكم وتقول إننا كدة أرسينا العدل وبالتالى تدى أصواتها للفريق أحمد شفيق وبكدة الحكم ها يفضل فى إيدينا
· طيب وبعدين ؟
· الحكم هايكون كالتالى , الحكم على سعادتك وحبيب العادلى ب 25 سنة وبراءة للمساعدين بتوعه لعدم وجود أدلة
· يعنى المساعدين ياخدوا براءة وإحنا حكم ؟
قالها بغضب فأجفل اللواء وتراجع خطوة للخلف قبل أن يكمل حديثه
· ماهى دى اللعبة يا أفندم ؟
· إزاى ؟
· لما يتحكم عليكم بحكم مشدد والمساعدين ياخدوا براءة لعدم كفاية الأدلة ده هايخلى أى محامى صغير يقدر يطعن ببطلان الحكم للتناقض بين اسبابه ومنطوقة وتطلع براءة وتاخد تعويض كمان
فتراجع مبارك فى مقعده الهزاز وإنفجر ضاحكا
· يا ولاد الجنية ... ملعوبة جدا
· تلاميذك يا أفندم ؟
· طيب والأولاد يا عرفان ... لازم يطلعوا براءة
· هايحصل يا أفندم بكرة
· كويس كويس
ثم علا القلق وجهه
· طيب إفرض القوى الثورية والإخوان ماعجبهومش الحكم ونزلو التحرير
· يبقى يوم المنى يا أفندم ؟
· إزاى ؟
· القوى الثورية مافيش منها خوف ولو الإخوان نزلوا الميدان الناس إللى فى البيوت وهم القوة التصويتية الأكبر هاتخاف منهم وهاتقول إن الإخوان بالشكل ده لو حد نزل ضدهم هاينزلوا بحشودهم دى ويقمعوهم وبكدة هايدوا أصواتهم لشفيق للتخلص من الإخوان ... وده إللى القنوات هاتعمل على نشره يوم المحاكمة
· تمام تمام يا عرفان ... فعلا إللى كلف مامتش
· طول العمر ليك يا أفندم
قالها ثم إستئذن فى الإنصراف وترك مبارك وحده مبتسما وهو يتخيل محاكمة الغد .... الهزلية .