هى دى الرجالة ولا بلاش

بقلم : صالح شيحة
هى دى بجد الرجالة اللى بتخاف على البلد ... ربنا يحفظه ... اللى عشان خاطرنا رشح نفسه ... الحاج عمر سليمان وليس كما يدعى البعض أنه لواء جيش ... فحينما ينجح عمر سليمان فى إنتخابات الرئاسة سينتهى عصر الحكم العسكرى للبلاد ويصبح أول رئيس مدنى ... راجل وطنى وطنى ... والدليل إن رجالة الحزب الوطنى وأعضاء المجالس المحلية المنحلة واقفين وراه وبيجمعوا له توكيلات عشان مبارك صحته تعبانة شوية ومش هيقدر يرشح نفسه ... يا خسارة مصر خسرت ... ربنا يقومه بالسلامة ...بس الحمد لله ربنا رزقنا بعمر سليمان ... رجل المرحلة ...ربنا يديله طولة العمر لحد ما المرحلة دى ما تعدى ... أنا مش عارف من غير عمر سليمان كنا هنعدى إزاى المرحلة دى ...
أنا مش عارف الحاج عمر سليمان إزاى صابر على العيال اللى عملوا النكسة دى إزاى يعنى نوارة نجم عمالة بتغلط فيه والراجل ديمقراطى ... فاكرة إنه مش هينجح ... بكرة ينجح وتنتفخى يا نوارة وكل اللى عامل فيها ثائر يجهز نفسه للإعتقال ...بكرة الحاج عمر ينجح ومعظم اللى عاملين فيها رجالة هيتحولوا لحريم ...
وأشار الحاج عمر سليمان أنه فى حالة فوزه سيقوم رحيماً بالثوار وهيعذبوهم بأحدث الطرق من غير ما يحسوا ... وهيحسن العلاقة مع إسرائيل اللى ساءت بسبب الثوار الأغبياء وهيصدر الغاز لمدة خمس سنين ببلاش ... يا ثورة ما تمت بسبب الإخوان ...