من سنة ..... بقلم الشاعر زغلول الطواب

من سنه
زى الليلادى
جانى يهنينى
حبيب العين
فاكراه لما جانى
كان واقف هنا
وع شفايفه بسمه
وبيهدينى
أجمل ورده
وبيقولى
كل سنه
وإنتى طيبه
يا ضى العين
الليلادى زهرة شبابى
راح منى فين
فين البسمه
وفين الورده
يا حبيب العين
فاتنى أعانى
سابنى ألالى
وحدى نزيف جرحى
طول الليل
يا ليل الجرح
يا عمرى
من بعدك
ساعاته ويل
عذاب وألم
سهر الليل
من غيرك يا بعد عمرى
الحلو إتمرر
وصفو الحياه إتعكر
وعنيا بتسح بالدمع
ما بتبطل
طول الليل
صحابك جونى يهنونى
قدمولى
بستان ورد
حاولوا يقلدوا بسمتك
بكونى
بدمع العين
قالولى إفرحى
إبنك شهيد
قولتلهم
لو كان بإيدى
أبدل قلبى
وأكتم مشاعرى
وأفقد الإحساس
ولا أبكى عليك
يا ضى عينى
بس عينى بتخونى
وقلبى بيفط منى
وصورتك وشم ع صدرى
إزاى أقدر أنسى
حته منى
راحت ف غمضة عين
يا ليل الجرح
يا معكر سهر الليل
ألاقى فين الصبر
ع بعادك يا ضى العين
أنا مباقتش بفرق
من بعدك
النهار من الليل
قلبى يا عمرى إنفطر
زى الشجر
لما بتقع منه
زهره أو ثمر
بيبقى شكله زين
ولا الربيع زى الخريف
هل يتساوى النهار بالليل
عليه العوض ومنه العوض
إللى إنكسر
مش ممكن يرجع تانى
يا ضى العين