يعني إيه سلمية؟!

بقلم رانيا مسعود
قبل كتابة النوت لا بد نعرف إنها تعارض لمعنى انتشر كتير وهو: يعني إيه مدنية ويعني إيه إسلامية؟ والاتنين كانوا غلط في المفاهيم اللي طرحها الناس ودا من وجهة نظري بالطبع..يعني واحد قال الإسلامية يعني واحد يحجب أمك والمدنية إن واحد يلبسها مايوه
وحاجات كدة منتهى الكوميديا طلعت على مفاهيم منتهى كوميديا الكوميديا
وفي النهاية ما سابوش أمهاتنا في حالهم
لدرجة إنهم طلعوا عين أمنا ولا عملوش حاجة م الآخر
أنا بقى هنا هقول يعني إيه سلمية
وبرضو دا رأي شخصي
يعني إيه سلمية؟
يعني تقف تصرخ تطالب بحقك واللي ماسكين السلطة يغلوا عليك المواصلات والخدمات والسلع الغذائية ويضربوك بالرصاص ويعذبوك في السجون وينتهكوا أعراضك
وانتَ بتنادي برضو بالسلمية
طب يعني إيه سلمية؟
يعني القدس بيحصل فيها أكتر من كدة ومدن فلسطين كلها وانتَ شايف وعارف إنك نموذج مستنسخ لما يحدث في كافة الدول العربية وبرضو واقف تستأذن اللي بيعملوا فيك كدة إنهم يصلحوا لك
طب يعني إيه سلمية
يعني النائب العام معروف إنه فاسد من أيام مبارك وإنه مش بيحقق ولا بينظر في قضايا الفساد، وإن القضاء فيه قضاة مرتشين ومع ذلك تقف تنادي بالعدل مع ناس ناسيين أصلًا معنى كلمة العدل
طب يعني إيه سلمية؟
يعني
حسني مبارك وولاده في قفص الاتهام وواحد بسيط يشير لجمال أو لعلاء أفندي بما لا يعجبهم فينفوه أو يبهدلوه لأنهم أبناء الرئيس وما يصحش يتعامل معهم أي حد إلا بكل احترام وتعظيم سلام
طب يعني إيه بقى سلمية؟
م الآخر
يعني العرب المسلمين زمان كانوا بيقاتلوا اللي بيحاربهم في الحق والدين والشرف والعِرض
والرسول كان بيخوض غزوات في أمر امرأة تكشف وجهها أو تعرى كعب قدمها
يعني إن كل دول الغرب بيقول عنهم إنهم نشروا الإسلام بحد السيف في الوقت اللي كانوا هما بيخوضوا المعارك بعد ما توجه لهم الضربات
واحنا لحد دلوقتي
بنقول سلمية سلمية عشان الريس مبارك كان بيقول بالسلام بالسلام
ومع ذلك بصوا لحالنا بقى من الداخل والخارج
نساء تُنتهك أعراضهن
رجال تُنتهك أعراضهم
دماء ونفوس مسلمة قتلت
ومع ذلك برضو لسه خايفين إننا لو قاتلنا في سبيل الله إننا نكون همج وبربر ومجرمين
مع إننا إحنا المعتدى علينا يا جدعان
وسوريا معتدى عليها
البحرين معتدى عليها
السعودية برضو معتدى عليها
وكافة البلدان العربية والإسلامية معتدى عليها
ولسه بنقول: سلمية!! عرفتم بقى يعني إيه سلمية
ولا مؤاخذة هو السلمية دي موجهة ناحيتنا ليه السلاح وناحيتهم رافعة الراية البيضا؟
ولا مؤاخذة التخاذل السلمي اللي احنا فيه دا علشان إخوان أو سلفيين أو ليبراليين يقعدوا على كراسي مجلس الشعب وياخدوا لهم كام ألف؟
ولا مؤاخذة هو سلمية دي يعني واحد كاتب يطلع يسب للي جابوا وعملوا الإخوان إنهم ما اتحركوش مع أختهم اللي كشفوا عليها وأختهم اللي عروها في الشارع وهو بيكتب عن دي وعن دي وعن دول، ولا حاولش ف مرة يورينا إن هو راجل من غير ما يكتب فيهم ويعمل موقف محترم أكبر من الكتابة ليه؟
طب لو الإخوان وحشين والسلفيين مش عاجبين تفتكر حضرتك وغيرك وغيرك ليه ما حاولتوش تقتصوا بغير أقلامكم لشرف وعورات الستات دول؟ ولا هو قعداتنا وجلساتنا اللي نناقش ونسخن بعض فيها ونقول سلمية هي الحل؟
طب ولا مؤاخذة فعلًا هي الست اللي انتهكت جسديًّا دي هيقبل أي واحد من بتوع السعي نحو الكراسي إنه يتجوزها؟ أو حتى بتوع السعي نحو الشهرة الكتابية والإعلامية يتجوزها؟
بلاش هو حتى لو اتجوزها هيعيش معاها بصورة طبيعية دون ما يجرح فيها ويمن عليها إنها انتهكت وهو سترها؟؟
طب ليه بنتكلم إن الناس دول لا يطبقون شرع الله واحنا نفسنا بعاد تمام البعد عنه؟
هل الكاتب اللي بيهاجم الإخوان فكر يحفظ القرآن ويطبق ما به؟
طب هل هو بيقيم الصلاة اللي هي عماد الدين؟
طب هل هو بيراعي ربنا في ماله وبيعطي الفقير حقه؟
هو احنا ليه منصبين نفسنا كلنا وعاظ واحنا محتاجين اللي يشيل الطين من علينا عشان الطين مدارينا؟؟
لو كل كاتب وإعلامي ومشهور فكر يتبرع بأجره بالفعل اللي هو بيتعدى الملايين للفقير في مصر أو حتى فكر يتبرع به لإنشاء مصانع أو ورش لعمل منتجات تشغل شباب وتبني مدارس وتعلم أجيال وتحفظها من الضلال والدمار والخراب العقلي والفكري ، ما هو احنا مش هنعيش اللي احنا فيه دلوقت
هي دي سلمية الثورة يا جماعة
مش إننا نفضل نكتب ونقرأ ونشتري الكتب ونرص فكر على فكر على فكر وسايبين البلد مليانة كلام وخلاص
الثورة ف كل بيت
لما ألاقي أبويا بيسرق أو يرتشي عشان يأكلني أنا وأهلي
لما ألاقي أمي بتشتغل بمرتب سبعين تمانين شاب ممكن ينقذهم راتبها من الضياع في الشوارع
الثورة على نفسنا
ولا تقول لي سلمية ولا تقول لي خيبة قوية
بس افتكر إن الأخ المجاهد في سبيل الله دا ما هواش نبي
وإنك انتَ نفسك مش نبي ورضي الله عنك وأرضاك
وإنك برضو زي ما انتَ بتتكلم عن استغلال الحكومة للشعب انتَ استغليت الثورة لشهرتك ولجيبك
وإلا كل واحد إعلامي أو كاتب أو مشهور من الثوار ليه ما جابش لحد دلوقت حق الشهدا وحق البنات
واللي مش هيعرف يجيب حق الناس دي إلا بالكتابة عنهم وببيع كتبه يبقى ما يستاهلش إننا نرفع منه ولا نحضر له لقاء ولا نعمل له حساب ونخليه بقى يسلم لنا ع السلمية