على فين يا دنيا واخداني .... بقلم الشاعر زغلول الطواب

على فين يا دنيا الهم
واخدانى
ليلك ونهارك غم
وتعبانى
إتهدى حرام عليكى
عنيا من كُتر البكى
وجعانى
إنسينى وكفايه ظُلم
أنا بنى آدم
من لحم ودم
ليه كده يا دنيا
كرهانى
تلاتين سنه صابر
ومتحمل
إهانه وذل وظلم
جوع وفقر وغُلب
دأنا لو جبل
كان زمانه إنهد
من تُقل
أحمالى
طعمك ف حنكى مُر
وم شدة مراره
بعانى
ريقى نشفان
حتى الميه
مش رويانى
بآكل اللقمه حاف
عشان غموسها مر
وأحلى بالذل
أبات الليل سهران
مهزوز وحيران
هم الدين تقيل
وعشان أنا حُر
أبكى بدل الدموع دم
ودمى بيغلى وفاير
حتى الآه أكتمها
جوايا حابسها
مقدرش أتنفسها
ولا م قلبى أطلعها
أخاف يسمعهوها
الأكابر
وكأنى عبد خدام
مربوط ف الساقيه
ليل ونهار
لونك شايفه ضباب
كأنك مغميانى
كأنك عزبة فُلان
ملكيه خاصه للحُكام
وأنا غريب ف اوطانى
ليه بيلمونى
لما قومت بثورة يناير
ليه مش مصدقين
بالإراده ممكن
نعدل المايل
ويبقى عبره
لأى ظالم