بنْنجِرح .... بقلم محمد مصطفى الهلالي

.تنزف جراحنا ف بركم
ميادين
دمي اللي
سال ع الأرض
منشفشي
و ضاعت عينيه
برصا ص بنادكو
وضحكوا الجلادين
راسي من زحمه النواب
لافرحت ولا ندمت
فسر ولي السر بعد
ماحلفتوا اليمين
آنا لسه واقف
بتكي علي عكازين
لادقت طعم العيش
ولا مرارة ناره
قبل مايستوي
خطفوه السراقين
خدوه من أيد المحرومين
رموني في الشارع
يطحني الغضب
ضربوني بالخرطوش
بقنابل الغاز اللعين
والعجب يوم مااشترها
من عدوي غصب عني
وسابو القمح ينشف في الغيطان
ويصدروا الغاز اللي
محرومه منه مصر
ويشهدو بالزور علينا
مين قتل أخواتي وأصحابي
لو شهاده الحق
قالها صاحب الكاب الكبير
يبقي مين وازاي قتلنا
مين وليه وازاي وفين؟؟
كل الغلابة
زى حالتي حيرانين
دي ثوره ولا رغيف حوا وشي !!
قليل اللحم وكتير العجين
والعجيب في الثورة دي
فُجر الظلم و الطغيان
واستكانة الشعب علي مر السنين
طوابير وواقفة ترتجيه يرجع
والتانيه واقفة تندهوا يسمع
وأم الشهيد والجريح
بالوعيد مهدده تخشع
وليه لو عطشنا
النيل مايرويشي
ولو وقعنا الزاد ميكفيشي
حتي جدار بيتنا القديم أتهد
فسروا سر الكابات
اللي وقفت في البراح
تضحك علي دمايا
علموني أزاي
نقبل حقنا في الزاد عطايا
ونبوس أيدين الجلادين
ع الرأفة والرحمة
مين يمنحني الأمان
لو حوطت الغربان وليدي
مين هيبكي
لو قتلني البرد
في الليل اللي جي
مين مخبي الشمس
جوه كف السجانين
مين يحاسب السفاح
ويحمي المحرومين
مين سمح للديب ده يرعي في الجموع
مين ضرب تعظيم سلام
للقاتل السفاح وسابني
مين كافئهم في المحاكم علي قتلي
أزاي منحهم الأمان
مين منع عني الطعام
مين سرقني في الميدان
طب قلولي ؟؟
هقول لولادي ايه؟؟
لو رجعوا يسحبوني
في وسط الليل ومنطقش
ولا يسمع جيراني الصوت
وانا بصرخ غيتوني
مين منعني من أخد تاري؟
م اللي مات واللي حي !!
مين منعني ارتجي بكره اللي جي
انتو اللي منكوا الخجل يرحل
ولا يوم سكوتي يعدي بالساهل
ولو أنهم ..قالولي تستاهل !!
الحق دوله وانتم رضيتو
الثورة تتبدل
سيبتوا المجالس
في العتمة تتشكل
وتضيع ياحق الطيابه
والغربة بتطول..
كل اللي حاصل
مات الغلابة ..ومبارك أتبدل ..!!!