مساعدة المبدعين والرقابة الجادة‎

سمعت مصرى (متعلم) بيقول لمصرى (فلاح) إن الشعب المصرى بقر... رد المصرى الفلاح وهو مضايق : متغلطش يا أستاذ إحنا مش بقر....كان الكلام ده فى المواصلات وكان سبب الكلام إن المتعلم بيقول برة أحسن من عندنا وعندهم نظام وذكر المتعلم قطار صينى يتميز بقمة التكنولوجيا فرد الفلاح ما تعمل يا أستاذ زى ما هما بيعملوا فى الصين إعمل قطار ....معنى الكلام اللى فات إن مفيش فى مصر مخترعين ولا مفيش ناس بتساعد المخترعين دول.... أكيد طبعاً فى مخترعين وناس قادرة تقدم أفكار وإبتكارات بس المشكلة فى الشخص اللى فى إيده ُصنع القرار ....
حاجة تانية تؤكد إحتياج الشعب المصرى لحد يراقبه ...لأن مفيش رقابة داخلية ولا رقابة خارجية ... الرقابة الداخلية هى الضمير ومعظمنا معندوش ضمير والرقابة الخارجية تكاد تكون منعدمة محدش بيقول لحد إنت ليه عملت كده وبيحاسبه لحد اللحظة اللى أنا بكتب فيها الكلام ده مفيش رقابة على حد ...ومثال على الكلام سمعت سواق تاكسى بيحكى لناس قرايبه على العداد الجديد بتاع التاكسى اللى واخده من المرور اللى من خلاله بيضحك بيه على الزبون ...العداد الجديد فى زر يوقفه لو العربية وقفت فى الإشارة طبعاً سواقين التاكسى بيسيبوا العداد شغال حتى ولو العربية وقفت فى الإشارة ساعة مع إن معاه زر يوقف العداد لحين السير مرة أخرى وزر أخر يرتبط فيه العداد بسير العجلات ....معنى ذلك أن هذا السائق غشاش ويأخذ أكثر من حقه وما يضايقنى أكثر من ذلك أنه يتفاخر وهو يحكى عن نصبه ....
إذن مما سبق عايزين نشوف إختراع بدأ يتنفذ وعايزين نشجع الشباب والشخص اللى فى إيده صنع القرار يحط فى عينه حصوة ملح ويحس بالمصريين ونحس إن فيه رقابة ....