مدونه محمود احمد

بقلم : سحر عمرو
صاحب هذه المدونه هو محمود أحمد 25 سنة
مؤسس ومدير ل مؤسسة " صعيدى جيكس " لريادة الاعمال
مدير مكتب الصعيد ل مؤسسة " ايجى برونور مصر " لريادة الاعمال
مطور ويب , ريادى أعمال صغير , مؤسس لتطبيق الموبايل الخاص بحل مشكلة ازمة التبرع بالدم " فصيلتى " ..اعشق ريادة الاعمال
من محافظة قنا , طالب جامعى ..
لينك المدونه
http://www.midoodj.com/
و تتضمن المدونه العديد من المقالات في مواضيع مختلفه و متعدده يغلب على بعضها طابع الرجل الصعيدي و ما يحمله من مباديء و تراث الصعيد و ما بين التقدم و التطور الذي يعيشه الشباب في هذه الايام فتضم المدونه مقالات سياسيه و اخرى خاصه بالتقنيه و الانترنت
و من المقالات الموجوده بالمدونه
تويتر بسبع نكهات مختلفه
سواق التاكسى الفصيح !
ثورة 25 يناير
تباً لقمع الحريات , عودة من جديد للتدوين رغم انف الحاقدين !
احداث اشتباكات جرجا
و من ضمن الموضوعات التي تناولتها المدونه تدوينه بعنوان " سواق التاكسي الفصيح " و هي عباره عن حوار دار بين صاحب المدونه و سائق تاكسي مصري بسيط و لكن على الرغم من بساطته الا انه مصري اصيل يعشق ارض بلاده و يفتخر بالثوره و يحاول ان يجتهد في ايجاد حلول للخروج من هذه المرحله الحرجه التي تمر بها مصر و اليكم التدوينه
سواق التاكسى الفصيح !
اهلاً بكم , نعم انه السواق الفصيح ! وأقل ما يقال عليه وستثبت لكم التدوينة الاتية وما ساكتبه لكم عن مدى فصاحته , هذه التدوينة قصة حقيقة احداثها حدثت معى اثناء رجوعى من ميدان التحرير منذ اسبوعين , ورحلة عودتى من القاهرة الى صعيد مصر .... ملحوظة التدوينة باللغة العامية
أنا : تاكسى ! محطة رمسيس ؟ السائق : نعم اتفضل !
السائق اخبار التحرير ايه ؟ انا : تمام الحمدلله , ربنا يسترها على مصر الواحد بقى حاسس نفسه فى متاهة كبيرة وفى لعبة قذرة بتحصل
السائق : مصر دى احسن بلد وشعبها احسن شعب وربنا حميها واللى يقولك شعب مصر دا ما ينفعش معاه الا الكرباج فدى نظرية قذرة النظام السابق هو من ابتكرها !!
انا : اكيد طبعاً وحتى لو كلامهم صحيح فدا مع نسبة قليلة جداً من الشعب ومعروفين جدا زى البلطجية او المجرمين والفاسدين من طوائف الشعب ..
السائق : شوف يا افندم , انا عندى حلول للمرحلة اللى احنا فيها دى بس حد يسمعنى , انا نفسى حد يدخلنى فى مداخلة على اى برنامج اعلامى او اى لقاء تلفزيونى او حتى على الراديو ولو كلامى مالوش لازمة ما ينشروهوش , احنا حققنا المستحيل بثورتنا ولازم نحافظ عليها مين فين كان يحلم بكل اللى حققناه دا وفى 18 يوم احنا ممكن كنا نبقى ليبيا رقم 2 والله بس ربنا بيحمى مصر ولازم نحافظ على ثورتنا خصوصاً فى المرحلة دى وانا عندى 4 او 3 حلول وهقولهملك وانت احكم على كلامى !
انا : اتفضل يا افندم ياريت اسمع حلولك لاننا بجد محتاجين لاى حل احنا بيتلعب بينا والله ولعبة قذرة جدا فى الوقت دا اتفضل انا سامعك.
السائق :
اولاً – احنا محتاجين لرئيس فيه صفتين مهمين جدا جدا قبل اى حاجة تانية , ” رئيس قوى و امين ” قوى بأنه ياخد قرارات فى اوقات عصيبة بدون اى ضغط من اى جهة . رئيس امين على شعبه وعلى موارد البلد وعلى مصلحة مصر اولاً وفوق الجميع .
ثانياً – احنا ايه المشكلة لو وقفنا التعليم لمدة سنة !! , انا : نعم ؟ السائق : ايوه الدنيا مش هتخرب ولا هتولع ولا عجلة الانتاج هتقف ومحدش بيموت من الجوع التعليم هو اللى هيساهم فى نهضة البلد بعد جهل اكتر من 30 سنة يا استاذ اسمعنى بس للاخر خلال السنة اللى هنوقف فيها التعليم دى هنعمل التالى وبكل حزم , هناخد كل المدرسين والدكاترة فى الجامعات والاستاذة والمعيدين والنظار وكل اللى شغلهم فى مجال التعليم ونوديهم اكاديمية تعلمهم ازاى يعلموا الطلبة ويطلعوا اجيال ممكن تبدع وتحب بلدها بجد وتنتج فيها ويقدروا يكونوا عند حسن ظن الطلبة , نيجى بقى للطلبة دول مش هيقعدوا سنة من غير تعليم لا الطلبة هنعملهم معسكرات ونعلمهم فيها يعنى ايه وطن ويعنى ايه انتاج ويعنى ايه تعليم ومبادرة وريادة اعمال وازاى تقدر تعمل مؤسسة ناجحة ليك او تختار شغل مناسب ليك هتقدر تبدع فيه وتطلع كل طاقتك ونعلمهم ازاى يحبوا المكان اللى بيتعلموا فيه ويتلعموا مبادىء احترام المدرس , نيجى بقى للمدارس والابنية نفسها لازم لازم كل المدارس والمبانى التعليمية بالكامل يتعملها سنفرة ايوه تنضف كلها وتتطور وتبقى مجهزة بالكامل للطلبة والمدرسين كمان , الطلبة لما يلاقوا مكان نضيف وادامى يتعلموا فيه هيبقى الطالب منتظر الصبح علشان يروح يجرى على مدرسته او كليته او جامعته , والمدرس كذلك هيبقى منتظر بفارغ الصبر اليوم الجديد يبدأ علشان يبدأ يعلم فى الجيل المبدع واللى بقى مؤهل للتعليم .
ثالثاً – فئة الرقيب على الشعب بعد ربنا سبحانه وتعالى ودول هما مين بقى ( الشرطة – القضاء – التموين – الضرائب – الخ ) دول لازم ياخدوا اعلى مرتبات ممكن ياخدوها لو الناس دى ظروفها المادية ارتاحت عمرها ما هتساعد على الفساد او الغش او الخداع او غيره من اللى بنشوفه كل يوم منهم ... بكدا اوعدك هتلاقى بلدنا حالها اتصلح بس فى حاجة مهمة قبل كل الكلام اللى قلتهولك دا لازم اولاً الشعب بالكامل وبكل فئاته يتعلم ازاى ( نحترم بعضنا )...
انا : بصراحة مش عارف اقولك ايه انا لو مفكر انك هتقول الكلام دا كنت سجلتلك فيديو ولكن للاسف معاد القطر خلاص ولازم الحقه بسرعة
السائق : انا نفسى الناس يوصلها كلامى يمكن يفيد والله ومصر لسه فيها كتير قوى ولازم نستغله كويس ونحافظ عليه فى عنينا .
انا : اوعدك هنشر كلامك دا كله إن شاء الله اول ما ارجع الصعيد :)
ما رأيكم فى السائق الفصيح وفى حلوله