ما كنا خلصنا من شنطة الإسعاف

أحلى حاجة فى الشعب المصرى، إنه مفتح وناصح وياكلها بمزاجه، وأحلى كلام ممكن الواحد يسمعه لما سواق تاكسى يفتح قلبه ويتكلم.. هذه الفضفضة حقيقية جداً، وهى شكاوى السواق الفصيح 2009: «أنا مش عارف والله يا مدام الحكومة دى مالها ومالنا إحنا بالذات.. إحنا الغلابة الشقيانين لأ.. معلش لا مؤاخذة الناس المقتدرة ما تفرقش معاها قوى الغرامات والمثلثات وشنط الإسعاف والكلام ده.. لكن معانا تفرق.. لأ.. طبعاً الكل مش زى بعض.. فيه ناس وناس.. ناس يتطبق عليها القانون بحذافيره وناس تِطْبق فى زمارة رقبة القانون.. الظاهر إن ده حال الدنيا.. بعد ما قلنا خلاص خلصنا من حكاية شنطة الإسعاف، ووزير الصحة بنفسه قال ياريت يلغوها وبطلوا كلام.. قلنا كانت تقليعة وخلاص..
رجعوا تانى يقولوا بعد تلات شهور.. وهنشتريها من إدارة المرور.. أنا مش فاهم ازاى يعنى الناس هتتعامل مع شنطة إسعافات؟ طيب واحد زيى أنا ما أعرفشى أغير على صباعى لو اتعورت.. حاجة ما أفهمش فيها.. أتعامل مع حاجة طبية إزاى؟.. بلاش.. يمكن ربنا يسترها معانا وما يحصلش حاجة.. الحاجات اللى جواها مش طبية يعنى ممكن تبوظ مع الوقت وتاريخ صلاحيتها ينتهى زى الدوا! الشاش فازلين، وده مش ممكن ينشف من الحر والركنة؟
 طيب بعد سنة ولا اتنين هيوقفونا فى اللجان ويجيبوا دكاترة مثلاً ولا صيادلة يفتحوا الشنط فى كل عربية ويشوفوا صالحة للاستعمال ولا باظت؟ ولو باظت أرجع أشترى واحدة تانية من المرور وأرميها فى العربية عشان تبوظ بعد سنة.. وهكذا؟
ولما يلاقوها بايظة يسحبوها ويدونا وصل نمشى بيه برضه زى الرخصة ولا هيعملوا إيه؟ فيها إيه الشنطة؟ ما حدش عارف فيها إيه، هنشتريها غصباً عن عين أبونا وخلاص.. شوفى بقى حضرتك كام مليون عربية فى البلد، واحسبى كام مليون شنطة هتتباع.. هبرة جامدة قوى.. الله أعلم مين سعيد الحظ.. يمكن حد من المسنودين.. ولا المثلث.. كلنا اشترينا المثلث بأربعين جنيه.. قاِلك لأ لازم نشتريه من المرور لأنه بمواصفات عالمية!!
حتى ده راخر بقاله مواصفات عالمية؟ ده حتى مثلث عاكس كنا بنشتريه بخمسة جنيه، أول ما قالوا عليه غلى وبقى بأربعين.. ما أعرفش بتاع المواصفات العالمية ده هيبقى بكام؟ وإيه العالمية اللى فيه يعنى؟ هيعكس النور بالإنجليزى؟ والله أعلم مين اللى واخد توكيل المثلث العالمى.. ربنا يزيدهم.. هيبيع ثلاثين مليون مثلث، قولى المثلث بتلاتين جنيه، آدى مليار.. واحد فى مجلس الشعب ما أعرفوش قال نوفر شنطة الإسعاف وندفع تلاتين جنيه زيادة فى التجديد السنوى ونجيب عربيات إسعاف.. أهى دى فكرة حلوة وأنا أدفع وأنا راضى ومبسوط، إنما الكلام ده بصراحة معناه إن الحكومة بتقلبنا.. واحنا متقلبين جاهزين.
 وروحنا طلعت، ومقضيينها بالعافية.. أنا بطلت أدعى على الحكومة.. باين عليها متحصنة ضد الدعا.. بافكر أدعى ليها صبح ومساء يمكن تيجى معاهم بالعكس وربنا يرضى علينا ويخلصنا.. آدينا صابرين.. بس بيقولوا فى الأمثال: «الصبر حرق الدكان».