يوميات أم سيد الإعصارية

بقلم علاء الغندور
سمعنا عن إعصار كاترينا فى أمريكا والنهاردة تسمعوا عن إعصار أم سيد فى مصر..و أم سيد زوجة مصرية مكافحة و لكنها عصبية جدا و ما بيعجبهاش العجب و لا الصيام فى رجب و صوتها عالى جدا و عمرها ما تحمد ربنا أبدا و لا تعترف بفضل وكل كلامها يناقض بعضه رغم انها ست بيت شاطره وبتتعب جدا فى خدمة اولادها وتسكن أم سيد فى برج يتجاور فيه المطابخ و يسمع الجيران أصوات بعضهم و كأنهم مقيمين فى شقة واحدة و الشخصية دى بتعّبر عن فئة من فئات زوجات المجتمع المصري والعربي.وبالطبع لا تعميم على كل الزوجات..ولكن كل زوجة قد تقوم ببعض ما تفعله أم سيد.
**1-*و بدأت المدارس
دق جرس المنبه يعلن عن تمام الساعة السادسة صباحا وقامت أم سيد تصرخ فى ولديها سيد وكريم وبنتيها منى وسحر عشان يصحو عشان يروحوا المدرسة ..لأن النهارده هو أول يوم فى الدراسة و طبعا الأولاد كانوا سهرا نين و متعودين على السهر ومش قادرين يقوموا من النوم فتغضب أم سيد و تطلق صراخا يشبه إعصار كاترينا فى أمريكا و يصحى كل الجيران على صرختها الإعصارية وتقول جارتها أم سها من مطبخها المجاور: صباح الخير يا أم سيد..كّتر خيرك انا راحت علّيا نومه وصحيت على صوتك وربنا ما يحرمنا من صوتك المجّلجل ده...فترد عليها أم سيد : ليه ان شاء الله؟ هوه انا صوتى عالى ؟ دنا صوتى زى النسمة.ثم تتجه أم سيد الى غرف نوم الأولاد و تطلق صرخة إعصارية وتقول :.قومى يا زفتة الطين انتى وهيه ..قوم يا هباب البرك منك له..انا مش قلت تناموا بدرى..ربنا يدّوخكم زى انتوا ما انتوا مدّوخّنى..آدى الخلف..ييجى اللى عايزين يخّلفوا يشوفوا الخلفة و اللى بيخلفوها..يللا اصحو يا اولاد على الحّمام على ما أعمل لكم الساندويتشات وتصحى سها و تقول :سيبينى انام شوية صغنين وتقول سحر: سيبينى حبه نونو يا ماما ويقول كريم: انا تعبان وعايز اجازة النهاردة.. وهنا تصرخ أم سيد صرخة إعصارية يهتز لها البرج وتقول :قوموا قامت قيامتكم ..ايه الدوخه دى بس يا ربى. وهنا تناديها جارتها أم شاهى و تسألها : انتى هتعملى ساندويتشات ايه للعيال ؟ فترد أم سيد عليها و تقول :.سيد عايز ساندويتش بيض بالبسطرمة و جبنه مثلثات و كريم عايز جبنه رومى و لانشون و سحر عايزة بطاطس متحمرة و سها عايزة جبنه فلمنك و جبنه بيضا..ولسه أبوهم عايز طبق الفول بالطحينه والزيت الحار.وتترك المطبخ وتتجه الى غرفة نومها وتوجه كلامها الى زوجها قائلة :.قوم يا سبعى...قوم يا مجّوعنى..ياللى عمرى ما شفت معاك يوم حلو.قوم يا اخويا ساعدنى..بدل ما انت نايم ومنجعص كده و تقول لأولادها :يللا يا أولاد..الباصات بتاعه مدارسكم قرّبت تيجى..يللا..شاطر يلا سيد افتح باب الشقه وهات الأسانسير....يا خرابى..الكهربا اتقطعت..الله يخرب بيت الحكومه و بتوع الكهربا..منكم لله يا حرامية.مش كفاية بندفع نضافه على فاتورة الكهربا و انتوا لا بتنضفوا و لا بتهببوا..ربنا ياخدكم أخذ عزيز مقتدر..وتدخل على زوجها و تقول له:.قوم يا سبعى قوم اتّصرف وهات الكهربا..قوم و شيل المخده من على رأسك..انا عارفه انك صاحى و عامل نفسك نايم..قوم روح لبتوع الكهرباء وهات الكهربا فى ايدك و انت راجع...هوه انا هأعمل كل حاجه لوحدى..مش كفاية انى هأروح المدارس ادفع المصاريف ..منهم لله بتوع المدارس اللى رفعوا رسوم المدارس بشكل مجنون..عندهم حق يعملوا اللى همه عايزينه ما دام محدش بيحاسبهم و لا بيقولهم انتوا بتعملوا ايه..ولسه هاشوف المدرسين و المدرسات..و اللى غايظنى ان المدرسة التجريبيه عاملة كتاب المستوى الرفيع لمادة الأنجليزى اللى المدرسة بتبيعه لينا ب 150 جنيه الحرامية بيتاجروا علينا ولاد ال... ليه ؟ احنا هنجيب لهم منين؟ مصاريف و كتب و باص ويونيفورم ودروس..وكله كوم والدروس الخصوصية كوم تانى ... المدرس من دول بياخد فى الحصة فى السنتر أكتر من 3000جنيه فى الساعه وواكلين فلوسنا فى كرشهم اشى دروس و اشى مذكرات و قال ايه بعد كده عايزين يعملوا إضراب..جت لكم ضربة على قلبكم يا بعده..ده انتوا خربتوا بيوتنا من فلوس الدروس..الراجل جوزى بيدفع لكم كل شهر 3000جنيه دروس للعيال..هيجيب لكم منين هيسرق و الا هيسرق؟ّ!!دا جوزى بشتغل ليل نهار عشان يكفينا و مش ملاحق علينا..انا هأطلب من كل الأمهات يعملوا إضراب عن الدروس الخصوصية وخّلى المدرسين بقا يعملوا إضراب بجد..يللا يا اولاد على المدرسة و ربنا يحميكم..مش عايزين مشاكل مع حد و استمعوا للشرح المدرسين و اتعلموا عشان تنفعوا نفسكم..بس لو حد ضربكم قطّعوه او كلمونى و انا آجى أاقّطعه حتت.وتعلو سرينة الباصات فتصرخ فيهم صرخة إعصارية و هى تقول :.يللللللللللللللللللللللللللللللللللللللللللا..