رسالة إلى الخال عبد الرحمن الأبنودي

لو تفتكر يا خال يوم ما أعلنت الحداد
ولبست جيلنا كله السواد
أربعين سنة ليك عندي أمانة
من لولاد اللي بقوا اليوم أجداد
طلع النهار
إللي مالوش مغربية
وباس الندى ورق الشجر
وعشان لقينا السكة
هل علينا مليون قمر
وبلدنا في التحرير غسلت شعرها
جبنالها النهار وقدرنا ندفع مهرها
ياهلترى ذل السنين
وريحة الفساد وذل السجون
يقدر يغمينا النهار أبو شمس بترش الحنين
أبدا بلدنا ام الجمال
بتحب موالك ياخال
لما يزغرد في القلوب
ويصرخ في النهار عبرنا المحال
ياللابنا نبوس الكنال
ونرجع نغني للنضال
ونسجد على رملنا ف سينا
وناخد العزا ف جمال
أرجو يا خال أكون رديت الأمانة
ومعلش لو واد من اولادنا وجهلك إهانة
مايعرفوش وما داقوش وماجربوش
بارك الله فيهم جابوا الشمس فسمانا
وبعد ما اليأس قتلنا والذل هرانا
طلعوا أسود في عيد القهر قالوا كفانا
قوم يابا قوم يا جدي تعالوا معانا
الحقوا الفجر شدوه لمصر في التحرير
وقولوا للأبنودي قوم يا خال غني غنوتك
طلع النهار اللي مالوش مغربية
وليالي الذل رايحة ومش جاية
وبلدنا عاترعة غسلت شعرها
وزفيناها للورد اللي دفع مهرها
وسالي مسكت لها الطرحة في الجنينة
ورشت دمها شربات لحبايب العروسة أمها