نفسى"أتَبِّتْ" فى مَصْر

ياهْل بَلَدْنا ولَدْنا "فَصْ مَلْحْ و دَابْ"
وَاخِد فى "وِشُّهْ" و "زَرْجِنْ"، سَابْنا و "رَزَعْ" الباب
ناسِى سِنِين الرِّضَاعَة والعِيشَة واللَّمه
وعَطْف أُمُهْ عَلِيه، وشَعْرِهَا اللِّى شَاب
*****
الأُم "ِمتْرَمِّلِه" بَدَلْ السَّنَة تِسْعَة
وعشان تِكَفِّى المَعَايْشْ، طُولْ النًهَارْ تِسْعَى
مِنْ كُتْر هَمْ السِّنين "مِجَّرْبِدَه" دَايْمًا
عَشَانْ تِرَبِّى العِيَالْ، ولا يقُولُوشْ "خِسْعَة"
*****
السِّتْ شِقْيِِتْ و"حِفْيِِتْ"، عَشَانْ يِكَمِّلْ عَلاَمُه
كَانْ حِلْم ابُوه لمَّا مَات، لازم نِحَقّقْ كَلامُه
"حِسين ينُولْ الشِّهَادة و يِبْقى زِينْة الشَّبَابْ"
رَاحْ يِحْضُنْ ابنُه و يفْرَحْ، لمَّا يشُوفُه فى مَنَامُه
****
دا الوَادَه زَاكِرْ وعَافِر، فُوقْ العَشَر سَنَوَات
ماشَا الله دَايْمًا بِرِيمُه، دَايْمًا مَالُوشْ هَفَوَات
يِحْلَمْ بإنُّه "زِويل" وهَيعْدِلْ المَايلْ
وِيسَتِّتْ امُّه ويفْرَحْ، و يعَوَّضْ اللِّى فَات
*****
آدِى اللِّى أخَدْ الشِّهَادِه، عِيشْتُه بَقَتْ بَهْدَلِه
لا حَتّى مَشْغُول بشُغْلِة، ولا حَتّى لُه مَشْغََلِه
قَهْوة و طَاولَه يُومَاتى لمَّا الدِّمَاغ "صَدَّه"
وِجيبُه فَاضِى مِفَلِّسْ، و لا حَتّى فِيه خَرْدَلِه
*****
قَالُولْنَا و احنا عِيَالْ إن البَطَالَة نَجَسْ
والشُّغْل يِجْعَلْ إيديكْ دَايْمًا ما فِيها دَنَسْ
يا ناس شُوفولْنَا و ظَايفْ نَاكُلْ و نِسْتَرْزَقْ
دا "اللَّطْعَة" فى القَهْوَة "تِنْقِطْ" من كُتْر ذُل "الفَلَس"
*****
إبْنِى طِلِعْ م "البُرُلُّس"، يِظْهَرْ فى نُص اللَّيل
مَعَ "صُحْبِه" "قِرْفِتْ" و عاشِت، دايمًا فى آخر "الدّيل"
أيّامْها سُودِة, و لا تِقْدَرْ تِقُول حَقِّى
شَايلين جِبَالْ م الهموم "تِقِهِرْ تِهِدْ الحيل"
*****
الكُلْ هَجّ وطَفَشْ مِنْ قِلِّة المَوْجُود
واضطر يِرْكَبْ مَرَاكِبْ، ويادوبْ فى إيدُه وُعُودْ
معقول كِدَه "نَأبِنَا" يِطْلَعْ عَلَى "شُونِهْ"
وعَشان أعِيشْ فى الوَطَن لازم أكون مَسْنُود؟
*****
فَقِيرْ مِشَعبَط فى قارِب، خَايِفْ يِغُوصْ و يمُوت
والشِّلة قاعدَه فى "مَارينا"، عاملة سِبَاقْ اليخوت
والبَحْر عَمَّال بيغلى من ظُلْمِنا للنَّاس
ورِزقهُم اللّى رَايحْ، كُلُّه فى إيد كَام حُوت
*****
اللّى يقُول دا طَمَعْ و اللّى يقُول دا انفِلات
و يقول دا لازم نِحاكمُه، حتّى لو كان مَات
أنا إبنى مَيِّتْ بحَسْرِه مِنْ عَمَايلكُم
غَرقان ودَمُّه فى رِقَابِةْ، اللّى نهبْ سَنوَات
*****
أنا ابنى فاكر إن جدو مينا
أنا ابنى ضحى يوم محرر سينا
بس الديابه نهبوا خيرها وهوه
عمال بيهرب بين سفينة و مينه
*****
لو كُتْ إبن الكُبَارْ، لازم "أتَبِّتْ" فى مَصْر
ولا عُمْرى أخاف م البوليس، واسكن فى أحْسَنْ قَصْر
طَبْ لِيه أسِيبِك يا بَلَدِى واركَب المَجْهُول
إذا كُتْ رَاكِب "شِرُوكى"، وعندى مال بلا حَصْر؟
*****
عل ذلك يفسر محاولة هؤلاء المساكين فى الخروج فى عرض البحر (فى اكتوبر 2007 ) للبحث عن حياة أفضل. أرجوكم لا تكونوا بهذه القسوة فى الحكم عليهم.
* أستاذ إدارة الأعمال بجامعة الإسكندرية "سابقا"
وبجامعة الكويت"حاليا"