عمار يا مصر....العمل عبادة

عشان أمضى ورقة من الإدارة لفيت على كعوب رجلية أربع ساعات..مش المهم التعب ولا العرق اللى بيصب ولا المشوار فى الشمس الحارقة ولا العطش ولا الهبوط فى نهار رمضان...كل دة مقدور عليه...المشكلة لما تفضل تلف لغاية ماتنسى إسمك من مكتب لمكتب...تلاقى الموظفين قاعدين على الكراسى فى المروحة كل واحد فاتح مصحف وقاعد يقرا فيه..واللى فارد سجادة صلاة قدام المكتب..ولما تيجى تعدى تلاقى اللى بيزغدك فى كتفك...قال يعنى بيقولك إنت إتعميت؟؟؟مش شايف التقوى والورع اللى نزلوا علينا فى رمضان؟؟؟؟
واللا المصيبة بقى...لما تدخل مكتب وتلاقى تلات أربع موظفين نايمين على المكاتب بيشخروا..ياعينى طول الليل سهرانين فى المسجد وبيصلوا التراويح والفجر
يا عااااالم؟؟؟ هو ربنا بيقول كدة؟؟؟ بيقولك اسهر طول الليل صلى وتعالى الصبح نام فى الشغل؟؟ دول الصحابة كانوا بيسهروا طول الليل يصلوا ويقوموا الصبح يحاربوا!!!؟
كانوا بيصوموا فى الزحف وعند لقاء العدو فى الصحرا والشمس..مش قاعدين فى المروحة والتكييف...
وأنا مش عاوزاكوا تقوموا تحاربوا يا ناس..دى حتة ورقة تتمضى وكل واحد يروح لحاله...عمااااار يا مصر