حلم الثورة .... كتبت في عام 1988

وبحكي عليكي
وانده فيكي الناس والبحر
وكل مراكب صابرة تعدي
شايله معاها قلوب الناس
واحكي عليا.
شوقي في قلبي الأخضر
رسم الشط.
رمال ورديه
جوه ايديكي
واحكي عليهم
صبر الناس الساكتة
تثور
تنده طاقه القدر عليهم
وتكون ليهم بيت و قصور
وتتوجهم عقد الماس.
واحكي علينا
إحنا الواقف منا القاعد.
إحنا الرايح منا الجاي.
إحنا الجيل الساكت ثوره.
إحنا الجيل الغاضب نار.
علي شباك القطر الزحمة.
او في طابور العيش إلحاف.
او في المصنع .
.وسط المكن الكايرو الداير.
او في الغيط.
تحت الشمس القايده .حماس
واحكي عليهن
.بصدور خضرا بعمر النار.
خارجين تحت سيوف الزحمة.
حلم الشقة حلم العيشة الهادية الناعمة
حلم زفاف النور للنور.
وسط الكل بعقد الفل.وعقد الماس.
واحكي وأقول عن ناس مختلفة.
ناس بتغطي همومها بجوع.
وتبات ليلها أنين مسموع.
ورغم الهم في ناس تانيه .
غايبه تماما ع الموضوع.
ناس تستني أول هله .
علشان تصرف كل الجاي.
وناس تستني
لجل ما تخطف منها المال.
ناس مش عارفه همنا خالص.
وناس تعرفنا .
تعرف ان همومنا جبال.
ناس تتحاكي علينا وتضحك.
وناس ملهيه في قعده هنيه .
وناس مرمية علي الجمعية
مستنيه تفوت م الموت.
وناس تهلب رزق الناس.
....
وانا من جيل الناس الصابرة .
وانا من جيل الناس الصامدة.
رغم مرارة صمتي وريقي.
بالع صوت الهم في صوتي.
نادهه عليا قيامتي وموتي .
واقف وسط الناس الصامدة .
حالم حلم الناس الصابرة .
تيجي اليوم وتقوم الثورة
.تيجي تحقق حلم الناس ..