الحياة الزوجية

الحياة بين الزوجين ماشية كدا خد وهات
مرة عيشتهم مكروبين ومرة تبات ونبات
مرا يناموا جوعانين ومرة الخيرة يملا السبات
مرة تلاقيهم محبوبين ومرة هجر وكره ساعات
بس لازم بين الزوجين يحصل تواصل
لازم يكون بين النكد للحب فاصل
يفرد جسور القرب ويبعد خراب حاصل
ويجعل ما بينا وبين الشريك حبل اتصال واصل
يا ريت تحبوا في بعضكم الميزة بعد العيب
وتبلعوا لبعض الزلط والرب ليه الغيب
والشك طوحوه لبعيد وفضوا منه الجيب
والغيرة شئ عادي جدا بين الحبيب والحبيب
بس أمانة تفرقوا بين الشك والغيرة
لحسن يا عيني الشك ده عيبة خطيرة
والغيرة للحب بين لتنين زبيب جوا فطيرة
بس اوعوا تزودوها لحسن تبوظ الخميرة
السر بينكم بلاش تحكوه للأمهات والصحاب
المشكلة بين التنين مش مشكلة لو يعرف التالت صبحت خراب
والرزق حافظو عليه يلاش إسراف ولما تزنق معاكم استلفوا من جوا الدولاب
تصبح حياتكم جميلة والحقيقة تلاقوها وتنسوا السراب
خناقة عبده ومراته
عبد القوى مخانق مراته
وطردها من بيتهم هي وحماته
عبد القوى ندمان قوى
صعبان عليه حبه لبناته
جولو صحابه عبد الودود وعبد الرحيم وأنيس
لجل مايروحو لحماه يصلحوه يوم الخميس
عبد القوى منشف دماغه هي الى ترجع
قالوا الصحاب لما انت بايع يا عبده طب ليه تعيس
عبد الودود سأله ايه المشكلة
دى ام فاطمة ست رزينة وكملة
عبد القوى قال ان الحكاية
انهم لما بيتكلموا بتحصل معضلة
عبد الودود قاله عاكس مراتك
كل حلاوة بعقلها هي وحماتك
خلى جوا البيت محبة وحبة حبة
وانسوا الخناق وابدوا اتفاق وتعيش حياتك
ولما المدام ترجع من عند امها
ابقى حضر حاجة حلوة تحلى بيها بقها
وامسك أيدها بشدة جدا
لين نشافة قلبها
انيس كمل لعبده المواعظ والحكم
قاله مراتي ام موريس لما بشوفها بابتسم
ولما تحطلى ريحة حلوة
تبقى عايزة تترسم
عارف لما تيجي تمشي قدامي جوا البيت
أقولها غزال وماشي وبقلبى كعبه فاديت
ولما تطبخ طبخة حلوة
اقولها صوابعك سمنة بلدى رغما تكون بالزيت
عبد الرحيم قاله حلاوتك يا واد يا انيس
دا انت طلعت واعر وبحر غطيس
اسمع كلامه يا عبد القوى ونفذ
وعاكس مراتك تمام زي انيس وايريس
يا سيدى حط الاكل بالمعلقة في بقها
ولما تخرج المعلقة اخبط بيها سنها
اضحك لها بحنية جدا
قلها احلى موسيقى في دنيتي سمعتها
عبد الودود قالوا انت عمرك كام سنة
عبد القوى رد وقاله مين........انا؟
قاله امال امى يا عبد القوى
قاله عمرى اربعين سنة
قاله طب والمدام رد قاله تلاتين
قاله يعني بينك وبينها عشر سنين
قاله ايوه هما عشرة
قاله خلى عشرتك ليها ود وحنين
لو قالت لك نانسي عجرم ولا انا
قلها انتى احلى واطعم منها بمليون سنة
ولو قالت لك طب وهيفا
قلها هايفة عجوزة وانتى شباب كلك هنا
عبد الرحيم قاله براوا عليك يا ود ود
دا كلام يخلى الوحش يميل قلبه ويقعد
بس خد زود شوية من عندي
حبة كلام حلو يمسك ويسند
عبدالقوى ناغش المدام وخش في عقلها
حنن كيانها وطلع غل في قلبها
قولها يام فاطمة عينيكي هى الشمس
وانا مراكبي راكب فلوكة في وسطها
عبد القوى قلبه حن ولان
من كتر شوقه ليها صبح ولهان
قالهم لما تيجي مراتي يا اصحابي
هاحافظ عليها كويس واكون أنسان