ياسمين رئيس تنتقد طريقة عرض "من ضهر راجل" في المهرجان السينمائي

أعلنت ياسمين رئيس، بطلة فيلم "من ضهر راجل"، عن استيائها من رجال الأمن والصحفيين والمنظمين للمهرجان، وذلك بعد حدوث مشاجرات وتزاحم على باب القاعة وتأخرها على دخول الفيلم.
فقد عبرت عن ذلك عبر صفحتها الرسمية على موقع "فيسبوك"، قائلة: "امبارح حضرت العرض الأول لفيلم "من ضهر راجل" في مهرجان القاهرة السينمائي، وللأسف كان من الصعب عليا أنا وأبطال الفيلم دخول قاعة المسرح الكبير في الأوبرا قبل بداية عرض الفيلم بوقت كافٍ بسبب الزحام الشديد والسلوك العام من الكل".
وأضافت: "بالنسبة للزحام فده شيء يسعدني لأن الناس حريصة على إنها تشوف فيلمي، لكن القاعة عدد كراسيها محدود، والدخول بأسبقية الحضور زي ما كلنا عارفين، فكان المفروض الباب يتقفل لما القاعة تتملي بالكامل، لكن الأمن تعامل بارتباك مع الموقف والجمهور كان مستمر في دخول القاعة رغم إن مفيش أماكن جوا".
وعن الصحفيين قالت: "دة غير بعض الصحفيين اللي كانوا بيطلبوا في وقت وظرف زي دة تصريحات نارية ضد الموقف مش أكتر عشان سبق صحفي مزيف أو أي فرقعة إعلامية".
واختتمت كلمتها قائلة: "أتمنى أن الجمهور والصحفيين والقائمين على تنظيم مهرجان القاهرة يتعاونوا مع بعض ومايخلوش فيه فرصة لتكرار ده تاني".