أراجوز عنطوز؟.. لا إنسان

آي آي.. دست علي صباعي يا بني آدم.. حرام عليك.. يوووووه كتفي انخلع.. إيه الزحمة دي.. الأرض بتطرح بني آدميين بدل الفول والقمح؟!!
آه يا زمن.. الناس فيه جعانة وبتشحت وبتاكل من الزبالة.. وبتخلف عيال.. آه طبعا هوه فيه مانع.. ما فيهاش دفع فلوس.. حتي لو جعان حتجيب عيال!!
الله الله الله.. عمارات وتحف الخديو إسماعيل المحترم.. يا سلام بتفكرني بالزمن الجميل والمحترم.. أيوه مصر كانت قبل 1952 بلداً جميلاً ومحترماً.
أي أي أي.. يا ساتر يارب.. اتكعبلت في راجل فارش علي الرصيف طراطير ومزامير.. وفين؟ في شارع طلعت حرب.. يا عيني عليكي يا مصر.
شالوني ووقفوني ونفضوني.. واحد شخط فيه وقالي ما تبص قدامك.. رافع راسك بتتفرج علي إيه؟!! نظرت له بحرص ولم أنطق.. بصراحة خفت منه.. مجرم حقيقي في شارع سليمان باشا وجاهل!!!
انسحبت بسرعة السلحفاة متكئاً علي عصايتي.. وصلت ميدان التحرير وعند أول شجرة جلست التقط أنفاسي.. ثم سرحت وسرحت.. تذكرت وتذكرت ثم غفلت ورحت في سابع نومه.
طرقات القرية الضيقة المغبرة مليانة عيال ورجالة ونسوان.. رايحين جايين.. بيعملوا إيه؟ معرفش.. رايحين فين؟!. بردة معرفش.. زحمة ودوشة وزعيق وصراخ.. كلاكسات وتكاتك وصوت جاموسة بتنعر وأغاني هابطة ملء السمع وتناقض في الطرقات ملء البصر.
أراجوز.. أراجوز.. أنا جمعة بتاع الأراجوز .. علي واحدة ونص أضرب وأرقص كله بنص تعالي تعالي.. شوف وبص.
يُهْ يُهْ يُّهْ .. دا جمعة بتاع الأراجوز.. وحشتني يا جمعة.. لسه فاكرني يا أبوالبيه.. هو أنت لسه أراجوز.. لأ لأ داحنا بقينا كتير قوي.. الأرجزة بقت موضة. آه مش أحسن من النفاق والسرقة والبهدلة.. أصل ما بيتحبس غير الغلابة.
الدنيا اتغيرت إحنا إتربينا من خير طين الأرض اللي ضاعت وبتنزرع الوقت بني آدميين بدل الفول والقمح.
الخير ضاع.. يسرقوا الأرض والعرض وجاعت الناس وبقينا كلنا أراجوزات وأهي عيشة يا بيه.. هو إنت مش لسه بيه زي زمان؟؟!
لأ يا جمعة أنا بيه من بتوع زمان.. أما بهوات الأيام دي تف من بقك دا الدستة منهم بقرش صاغ بتاع زمان.. خربوها وقاعدين علي تلها والشعب جعان وفلسان وعطلان وهمه بينظروا ويتفلسفوا وراكبين طيارات وبياكلوا جاتوه وسيمون فيميهات.
يا جمعة.. يا جمعة.. جري الغلبان زي المجنون والعيال بترد وراه.. أنا كحيان أيوه وكمان فلسان إنما برضه والله العظيم إنسان وبضرب بألف لسان ولسان وباكل لقمتي بعرق جبيني.. آه بالعافية لكن مش إحسان.
أنا راجل إنسان غلبان لكن رجولتي تقف قدام جبروت أي جبان.. ولا يمكن أطنش ع الاندال.
بلدنا خلاص سماتها اللوع والملاعين رايحين جايين أخذوها نهب وسرقوها سلب زي القراميط.. برقص وأجري وأبيع طراطير وقراطيس.. أطنش لأ.. لازم أدي المفتري مهموز وأدوس عليه برجلي هو والعنطوز.. وأجري وأأرجز.. ما أنا أراجوز.
مصر بلدي اللي كانت بلدي.. وبرضه لسه بلدي حبيبتي.. مصر الميدان.. وأنا أشجع أراجوز حتقولي بلا فشر وإنت قد الكوز.. لأ دنا بجري وأجري وأدور علي الشجعان وألبس حارس وأنا أراجوز وأقف ددبان حرس.. أحرس مصر من الخونة والحرامية وقتلة الميدان.. إطمن يا شهيد.. أنا أراجوز لكن ليه أنياب وأنياب.
أصل أنا أراجوز .. كحيان ومفلس كمان إنما برضه أنا راجل مصري وإنسان.. عزيمتي قوية وروحي غنية وعنيه متعودة ع الفول والطعمية.. هوه فيه غيرهم يا حسرة!! كل ده وأحمي الغلبان وأدفي البردان.. شجاعة قوية، شجاعة فكر ومخ ودماغ ومفهومية مش شجاعة عُلّقْ وخناق وشتايم ووجع دماغ.
وقفولي القراميط .. شدوني وضربوني وسرقوني وقرصوني كمان.. آه آه إبعد إيدك دنا كبير وعندي دماغ وروّحنا وقمنا نلم هدومنا وربطنا بطونا وقاعدنا في الميدان.. أصل مصر ميدان.
نضحك ونجري ونهلل ونبكي وورانا عيال وكمان شجعان.. شباب يبكي ويفني بالليل ويا ليل يا عيني علي اللي مات بطلقة غدر من مجرم خاين جبان.. نايم جنبي مغمض عينيه وقافل إيده كمان.. عايز ينتقم .. فينك يا سيد درويش لما قلت وغنيت يا زغلول سعد وصحيت كل النايمين وصحيت الميدان.
كانوا رجالة وبرضه كان فيهم أراجوز يتأرجز عامل عليهم عنطوز.. ضربهم خلعهم وراهم العين الحمرا وما خلا فيهم ولا عنطوز.. وكانت مصر أم الدنيا راكبة جمل وحصان ورافعة علم الحب يا حبيبتي يا معشوقتي وكان الانتصار.
أنا أراجوز وبرضه مفلس كحيان ولكن أنا راجل والله وإنسان.. أتمسخر وأضحك علي الفجرة الطماعين حرامية الأرض والعرض وشجر التوت كمان، أضرب الأرض برجليه تطرح بطيخ أحمر قاني ينور زمانكم وزماني.
فوقي يا مصر وعودي فتية.. اتأرجزي واضربي الحرامية.. لسه في أولادك شرفاء.. ولكن تايهين في الزحمة عايشين أراجوزات.
المنسق العام لحزب الوفد