شباك علي الثورة

البنت المصرية الأروبة »ريم ماجد« نجمة قناة ال »أون تي ڤي« المتألقة دائماً مسكت حرامي! حتقول لي يعني إيه مسكت حرامي؟ ح أقول لك اللي حصل من طقطق لسلامو عليكم.. صلي ع اللي مش حتشوفه بقي يا سيدي العبارة بدأت من علي شاشة القناة الثقافية المصرية اللي هي في الأساس قناة رسمية يعني تاريخها مرتبط بالمرحوم صفوت الشريف مرمي دلوقتي في سجن مزرعة طرة مع باقي أفراد العصابة اللي حكمت مصر المحروسة تلاتين سنة بالتمام والكمال ومن خلال هذا الحكم سرقت ونهبت وباعت وخربت وحرقت كل عود أخضر نبت فيكي يا مصر يا محروسة ياغلبانة ياللي عيشك مافيهوش ملح وحسبي الله ونعم الوكيل ونرجع تقرير للقناة الثقافية المصرية موضوع الحديث.. وأنا آخر علمي بهذه القناة إن اللي كان ماسكها هو الأستاذ جمال الشاعر وهو شخص مدكوك في بعضه وبسم الله ما شاء الله ممكن يجر عربية من حبل القمة اللي فيه واللهم لا حسد ودي كل معلوماتي عن المذكور اللهم الا حكاية انه شاعر اسما وفعلا ودي عبارة أنا ما أدرش أفتي فيها لأني ماسبقش وقريت له ولا سمعت له شعر اللهم مرة واحدة كانوا واخديني يكرموني في قاعة داخل مبني الأوبرا وفوجئت بأن اللي بيقدمني هو الأستاذ الشاعر جمال الشاعر وأثناء ما بيقدمني مشكوراً نفسه نقحت عليه وقدم ما قال انها قصيدة من تأليفه وأنا قسماً عظماً ما سمعت منها ولا حرف عشان أحكم عليها هي شعر ولا لأ لأن اللي كان قاعد جنبي زوجين شابين قال الزوج متسائلاً »يعني ايه الشاعر جمال الشاعر؟« فقالت الزوجة ضاحكة »حاجة كده زي لوبيا يا فجل لوبيا« آدي كل معلوماتي عن الرئيس الأزلي للقناة الثقافية المصرية جمال الشاعر نرجع بقي للبت ريم الطعمة اللمضة وبرنامجها الصباحي علي فتاة أون تي ڤي اللي مسكت فيه الحرامي وقدمته بمنتهي الهدوء للمسئولين وأولي الأمر في مصر الثورة وراحت متصلة بزميلها الاعلامي محمود من قناة الثقافية المصرية.
ايه اللي حصل يا محمود
قال لك انه كان في لقاء مع بثينة كامل وما أدراك ما بثينة كامل تلك هي البت المصرية الأصلية بدون اضافات ولا رتوش واثقة من نفسها لدرجة تغيظ لأنها عارفة قيمتها وقيمة بلدها وقيمة أهلها وقيمة مريم طفلتها الجميلة التي تحكم أحد وزراء مصر حكما عسكريا وهذا الوزير هو الصديق عماد الدين أبو غازي وزير الثقافة في وزارة الدكتور عصام شرف الحالية وعلي رأي المثل »وكل حاكم وفوق منه حاكم« يا عماد.. المهم نرجع للموضوع اللي هو سبب الفضيحة.. أثناء حوار يجريه محمود مع بثينة كامل »مرشحة الرئاسة القادمة« دخل عليه صوت وقال له.
بس كفاية كده:
ولأن الصوت ده اختفي بعد ثورة 25 يناير فان السؤال الآن بعد امسك حرامي.
من الهاتف الداعي؟