حلا شيحة المُثيرة للجدل | القصة الكاملة لأزمتها مع تامرحسني

أثارت الفنانة حلا شيحة جدلًا واسعًا خلال الأيام الماضية بعد هجومها على النجم تامر حسني وفيلم "مش أنا" الذي يعرض في السينمات حاليًا.
وتستعرض بوابة الوفد خلال السطور الآتي القصة الكاملة للأزمة :-
في البداية هاجمت الفنانة حلا شيحة الفنان تامر حسني ومشاهدها في كليب "بحبك" الذي يعرض ضمن أحداث فيلم مش أنا ، قائلة : " فوجئت بنشر الكليب يجمع فيه مشاهد متفرقة من الفيلم، وفي أيام ذي الحجة، أيام مباركة، وخصوصا بعد آخر بوست نزلته، ووضحت فيه أنا ايه ".
قائلة : "بتكلم من قلبي، الكليب ده ميرضيش ربنا، وأنا عيطت لأني شفت نفسي في المشاهد دي.. دي كانت زلة نتيجة ظروف مريت بيها، وكلنا بنغلط، ولازم نغلط علشان إحنا بشر، بس المصيبة إننا بنغفل وبننسى.. الفن لو بيخلينا نبعد عن منهج ربنا، ومنبقاش قدوة لأولدنا يبقي باطل، وميبقاش فن".
وذكّرت حلا تامر بفيديو قال فيه: "أنا مش بتمنى أموت وأنا مطرب، أنا دايما خايف من كده.. كلام أكيد قولته في لحظة صدق جواك وجوانا كلنا." ودعته للتوبة بالقول: "شوفه تاني يمكن يفكرك إن جواك أكيد في صراع، وأنا وكلنا كلنا بنغلط، بس المهم في الآخر نتدارك الغلط ونصلح".
وختمت شيحة رسالتها لتامر حسني بآية من القرآن، قائلةً: "الله على كلام الله وجماله، يا سلام لو أصواتنا، ومواهبنا كلها نستعملها في الخير عشان يبقى فن بجد".
تامر حسني يرد على تصريحات حلا شيحة
وسرعان ما رد المطرب تامر حسني على هجومها عبر صفحته الرسمية على "فيسبوك" قائلًا: "الحقيقة عمري ما بتخيل إني أدخل في نقاش بالشكل دا مع زميل بحترمه، وكان في بينا كل خير... للتوضيح بما إنك يا حلا كتبت بوست، وأشركت الجمهور الكريم معانا بدال ما كنت تكلميني شخصيا ونتناقش بيني وبينك، فأنا مضطر أرد هنا برضو".
وتابع : "الحقيقه إني احترمت كلامي معاك، ووعدتك أشيل مشاهد تانية طلبتيها، وشلتها بالفعل، وشكرتيني عليها ولو حابة تفتكري المشاهد اللي اتشالت بعد إذنك روحي شوفيها في المونتاچ عند الأستاذ عمرو عاكف، أو كلميه يبعتهالك كلها موجودة، وبعدين الفيلم بقاله 3 أسابيع في السينمات، والكليب موجود جوه الفيلم هو بالنسبالك الحرام إننا ننزل الكليب على اليوتيوب بس !! إنما الكليب يتشاف جوه السينمات عادي ؟؟؟.."
وأكد تامر حسني أنّ زميلته تقاضت مبلغا كبيرا على الفيلم، وكانت موافقة تماما على الدور الذي صورته بمنتهى الرضا على حد قوله، وتوجه للجمهور موضحا بأنه ومخرجة فيلم "مش أنا" تواصلا مع حلا لرؤيته قبل عرضه، لكنها كانت تتجاهل اتصالهما، ولم تكمل تركيب صوتها على الفيلم، أو تحضر جلسة تصوير "الأفيش".
وأضاف : "أي فيلم بيبقى ليه خطة مسبقة في الدعاية، وإنتي عارفاها كويس، ووافقت عليها، ودا كليب رومانسي، يعني معقول كنتي عايزة المنتج يشيل كل مشاهدك اللي صورتيها من الكليب، و يطلعني بغني وبقول الكلام الرومانسي دا للأستاذ ماجد الكدواني مثلًا هو دا يُعقل ؟؟!!!!!".
اختتم تامر حسني رسالته قائلًا: "أنا زعلان منك جدًا يا حلا على مفردات البوست بتاعك غير موفقة، ومستحيل هرد بطريقتك اللي فيها تجريح، واتهامات باطلة ليا احتراما لحاجات كتير يمكن فايتاكي بس مش هتفوتني، وعلى فكرة أنا واثق إنك عارفة إني مستاهلش منك كدا، وهكتفي بالتوضيح دا، وربنا يهدي الجميع، ويكتبلك كل الخير اللهم آمين."
معز مسعود يوجه رسالة لزوجته حلا شيحة
وكتب معز مسعود مساندًا زوجته حلا شيحة قائلًا : «إلى زوجتي الغالية حلا.. قادر أفهم انزعاجك نتيجة مرور وقت كبير على تصوير الفيلم ده بسبب كورونا وإن حياتك اتغيرت زي ما أنتِ قولتي في البوست بكل احترام».
وتابع: «قادر كمان أفهم انزعاجك من التركيز على المشاهد دي وتجميعها رغم الوعد الشفهي بتجنب ذلك من صناع العمل (الكلام ماكانش عن إلغاء الكليب ولكن إن التركيز ميكونش على مشاهد معينة زي دلوقتي)، خصوصًا مع نزول الكليب في توقيت له قدسية كبيرة بالنسبة لنا».
وأضاف: «ولو كنا نعرف أن الوعد مش كافي علشان يحل المشكلة دي كنا مشينا في حلول تانية.. اللي بينك وبين ربنا فيما يخص أجورك عن أعمالك السابقة مش مضطرة تقوليه لحد.. ومتشغليش بالك بأي كلام بيتقال بغير علم.. الناس مش بتاخد بالها من تفاصيل كتير أبسطها الوقت الطويل والأحداث
الكبيرة اللي بتحصل في حياة اللي بيتكلموا عنهم بمنتهى الأريحية والثقة والتسرع في إصدار الأحكام.. قادر أفهم قصدك لما اتكلمتي عن (نوع معيّن) من المشاهد يعني نوع معيّن من الفن و(مش تعميم على الفن كله)».
وقال: «عاوز أفكرك يا حبيبتي إن رحلتنا هي رحلة بحث عن الحق والخير والجمال.. رحلة اعتزاز بالثقافة والهوية.. نموذج قوي لرفض التطرف على الناحيتين.. الناحية المكسوفة من هويتها وبتقلّد الغرب من غير حكمة أو علم أو عزة (اللي أنا سميته الانتحار الثقافي في كلمتي في الحوار الوطني سنة 2011) والناحية التانية المسجونة في قوالب مميتة للفكر والفنون".
وأضاف : "كل ناحية منهم فاكرة إنها معاها الحقيقة المطلقة وهيفضلوا يتخانقوا إلى يوم الدين.. لحد ما يظهر ناس عندهم الشجاعة والاعتزاز بثقافاتنا وهويتنا.. وبيحملوا هم أولادنا والأجيال الجاية.. وساعتها هيكون فنّنا بيعبر بجد عننا.. الشجعان زيك بس هم إللى بيمشوا الرحلة بصدق وإصرار لحد ما يوصلوا.. مهما كترت المحطات".
وتابع : " مهما كان الألم والحيرة واللخبطة.. مهما كان الهجوم والخذلان والمزايدات.. مهما كان التمن إللى بيتدفع.. الشجعان زيك بس هم إلى بيراجعوا نفسهم وبيعترفوا بأخطائهم ويصلحوها.. ده غير إن المشهور رحلته بتكون تحت المجهر.. الشجعان زيك بس بيعيشوا بتلقائية واتساق مع النفس».
وقال إن «فنوننا وثقافتنا وهويتنا يقدروا يتقابلوا.. أنا بدأت أعمل ده في أعمالي الفنية وفيلمي (اشتباك) افتتح في مهرجان كان، وفيلمي القادم رايح مهرجان ڤينيسيا قريب.. وهنقدر ناخد أنا وأنتِ خطوات أكبر وأمثل على الطريق العظيم ده اللي هتعرف قيمته الأجيال الجاية.. وتاني بقولهالك يا حبيبتي.. رحلتنا واحدة».
بيان نقابة الممثلين
كما أصدر مجلس إدارة نقابة الممثلين، برئاسة الدكتور أشرف زكي، بيانا للرد على أزمة الفنانة حلا شيحة وفيلم "مش أنا.
جاء نص البيان: "يعلن مجلس إدارة نقابة المهن التمثيلية رفضه التام لكل محاولات العودة بنا للوراء بنشر الفكر الظلامى الذى عانى منه المجتمع المصرى، طوال عقود، سواء عبر الصفحات العامة بالوسائط الإلكترونية أو الصفحات الخاصة لمن يعتزلون الفن تحت غطاء التوبة، وكأن الموهبة التى منحها الله المبدعين خطيئة".
وأضاف البيان: "يعلن مجلس نقابة المهن التمثيلية أنه لن يقف ساكنًا أمام محاولات تشويه الفن والإبداع الذى يعد أحد المؤشرات الثقافية التطور الرؤية فى المجتمعات المتحضرة، كما يؤكد الدعم الكامل للإبداع والمبدعين فى كافة الفنون عامة والمهن التمثيلية خاصة، فخروج البعض من دائرة الفن وعودتهم المتكررة له إنما تعبر عن تذبذب فكري ورؤية ربما تحكمها مصالح شخصية وهي حالات نادرة ولا تعبر إلا عن ذاتها".
وتابعت النقابة فى بيانها: "يهيب مجلس نقابة المهن التمثيلية بمقاطعة هذه الصفحات التى يريد أصحابها أن يعودوا برؤيتنا الثقافية للمربع صفر فى رجعية جديدة لا تستهدف سوي مصالح خاصة على حساب المصلحة العامة لهذا الوطن الذى لا ولن يبتلع طعم التشدد الذى أفضى للعنف والفوضى".
حلا شيحة ترد على نقابة الممثلين
وكتبت "شيحة" عبر حسابها على موقع تبادل الصور والفيديوهات الشهير "إنستجرام": " حابة أشكر كل الناس الجميلة على رسايلهم الجميلة المشجعة".
وأضافت "حابة أشكر كل الصحافة اللي نشرت فتوى دار الافتاء النهارده اللي موقفي هو نفس موقفها اللي بيوضح إن التمثيل والفن عموما زي أي مهنة في الدنيا حلاله حلال وحرامه حرام، وأنا لا أحب أن أكون جزءًا من أي نوع من التطرف سواء باسم الدين أو باسم الفن، ولو نقابة المهن التمثيلية ترفض موقف دار الإفتاء الواضح فهنيئا لي بشطبها لعضويتي".
وتابعت، حبي للفن محدش يقدر ينكره ولا يزايد عليه، أنا ماتكلمتش غير عن نفسي وبقدر كل زمايلي، الزميل الوحيد اللي ذكرته هو اللي الموضوع أصلا متعلق بيه، وعتابي ليه لحسن ظني بيه، والعتاب في الملأ عشان الكليب في
الملأ.
واستكملت، بالنسبة للكلام غير اللائق عن الأجر، كل اللي في المجال شاهدين أني كنت أعتذر عن عدد كبير من الأعمال الفنية وكنت أقبل أجورًا أقل مما يتناسب معي تعاونا مع صناع العمل، وأصلا ما استلمتش الجزء الأخير من أجري في الفيلم لما اتأخر نزوله جدا و بدأت أتغير وأصلّح، لأن بصراحة الكلام عن (أجر كبير) ضحكني.
وأكدت، أنا فنانة بطبعي ومن صغري وكل اللي يعرفوني عارفين حبي للفن، ودايما هعبر عن نفسي بمواهبي الفنية لما أحب لكن الجديد إني مش هاعمل كده على حساب اللي انا مؤمنه بيه بجد جوايا زي ما قولت مؤخرًا، أنا لا أهاجم أحدًا و لا أحارب أحدًا و لا أنا أفضل من أحد و لا أنصح أحدًا قبل ما أنصح نفسي أولًة و كلنا نخطئ مفيش حد معصوم من الخطأ ".
واختتمت حلا شيحة، قائلة، بتمنى الخير دايمًا لكل الناس بما فيهم كل زمايلي و صناع العمل".
تصريحات والد حلا شيحة على تصرفات ابنته
أكد الفنان التشكيلى أحمد شيحة والد الفنانة حالا شيحة، أنه بعد الفترة التى انقطعت فيها وهى خارج مصر بدأ يحدث لها بعض التغيرات وكنت قلقان لان بنتى معندهاش خبث وملهاش فى التخطيط وطيبة جدا.
وأضاف "شيحة"، خلال مداخلة هاتفية ببرنامج "آخر النهار"، مع محمد الباز، عبر شاشة "النهار"، أنه تواصل مع تامر حسنى وطلبت منه أن نتريث حتى يتضح من وراء هذه الهجمة الغريبة على ابنتى.
وأعرب عن حزنه من حديث ابنته، موضحا أن خطأها هذه المرة كبير جدا، وأن والدتها مريضة وانهارت عندما علمت بما كتبته، متابعًا: "ابنتى لم تقول ان الفن حرام".
حلا شيحة ترد على تصريحات والدها
وكانت ردت الفنانة حلا شيحة على تصريحات والدها، قائلة : "الحقيقة مصدومة من الكلام اللي والدي قاله عن زوجي اللي اتجوزته بكامل إرادتي والحمد لله لقيت معاه كل المعاني الجميلة من احترام ورجولة وشهامة نادرة الأيام دي".
وأضافت "حلا": "وأنا لم يخطفني احد كما قال والدي والكلام ده لا يصح أبدا، وانا بحب زوجي وسعيدة بحبه ليا وبنحترم بعض ومعز بيحترم رأيي وبيقدر مشاعري وبالعكس هو دائما بيهدّيني، وطبعا بيساندني ويشجعني لأني زوجته وحبيبته، وهو اكبر بكتير من كل الكلام اللي بيتقال عليه وافتراءات مش صحيحة وهو ابعد ما يكون عنها".
وتابعت: "لن أسمح لاحد الكلام عنه ولن اسمح بأي تصور خاطئ عنه بأي شكل من الاشكال، معز طول عمره له رؤيته الواضحة في الدين وحتي في الفن وهو ليس مع أي جماعة أو فئة معينة هو يمثل نفسه وله افكاره وارائه العلمية والدينية المختلفة الجميلة وليس لاحد ان يصنفه أو يضعه في أي قالب فقط لأن هواه لا يوافق ما يمثله معز".
واستكملت، هو في ايه في بلدنا الأيام دي بنحارب ونصارع في بعض وعايشين في قصص وهمية من نسج خيالنا عن بعض، هو خلاص أي حد يتكلم بلغة الدين لازم يبقي متطرف أو إخواني هو مبقاش في مسلمين وسطيين طبيعين هو ليه كل أنواع الهجوم ده على أي حد".
وقالت، أنا زعلانة من والدي جدا؛ لأنه يعرف معز كويس جدا وقعدوا مع بعض كتير ووالدي يحبه جدا وشاف منه كل خير، معز زيي اتجوز 14 سنة من عمره وكان مستقر في حياته وعنده ثلاث أولاد ربنا يخليهمله جمال ماشاء الله وعمره ما كان بتاع ستات زي ما بيتقال كلام لا يليق أبدا وفي الاخر زيي لم يكمل جوازه وحدث الطلاق وكلنا معرضين لده طبيعي أنه كان بيحاول زي أي راجل محترم أنه يلاقي استقرار في حياته في الحلال ومتوفقش أكتر من مرة ودي مش حاجة تعيب أي حد".
وأكدت "حلا": "الحمد لله اتقابلنا وتلاقينا لأن ظروفنا قريبة جدا وعندي أولاد مثله وأولادنا شبه بعض الحمد لله واستقرينا احنا الاتنين ليه ده يزعل الناس بدل ما ندعي لبعض بالخير بقينا نتصيد لبعض، ونخوض في اعراض بعض هو حصل في مجتمعنا ده احنا جرالنا ايه".
وأضافت، في الاخر بوجه كلمة لوالدي الحبيب ان لا يصح ابدا كلامك مع كامل احترامي لك وللجميع، انا الحمد لله سعيدة في حياتي ومع زوج اتشرف انه زوجي وبعتز بيه واحنا اصدقاء قبل ان نكون أزواج، وكل كلمة اكتبها وقلتها نابعة مني وانا متدينة بطبعي زي أي ست مصرية بتحب دينها وده لا يعيبني.
واستطردت، وتديني اللي بدأ من اكتر من 15 سنة من المنطقي ان معز مش هو سببه، مش محتاجة حد يخطفني أو يكتب عني أو يوجهني، هذا كلام لا يليق، دعوا الخلق للخالق وكل واحد يخليه في حاله، وياريت نسمع من بعض بدل ما نسمع عن بعض، أحسنوا الظن".
حلا شيحة تصالح والدها بعد هجومها عليه
وجهت الفنانة حلا شيحة، رسالة حب لوالدها، وذلك عبر حسابها الرسمي على موقع التواصل الإجتماعي الشهير "فيسبوك".
وكتبت "حلا" عبر حسابها قائلة : "حبيبي والدي الغالي أعز الناس بحبك ومحدش هيقدر يخلف بنا ابدًا وانا متفهمة حبك وخوفك عليا وأنت أغلى الناس".
بلاغ أشرف زكي في حاتم الحويني
واتهم الدكتور أشرف زكي، نقيب المهن التمثيلية، حاتم الحويني نجل الداعية الإسلامي أبو إسحاق الحويني، بسبه وقذفه في البلاغ الذي حمل رقم 23 أحوال بالإدارة العامة لتكنولوجيا المعلومات، إدارة مكافحة جرائم الحاسبات وشبكات المعلومات، مطالبا باتخاذ الإجراءات القانونية حيال المشكو في حقه.