شواكيش

جحا زمانه!!

• سألوا جحا: إيه رأيك فى المشهد السياسى؟!
أجاب: شايف ناس حلمها التغيير.. وناس همها الأخونة والتنعير.. وناس ماشية بتلف دائرى فى ميدان التحرير!!
• قطار التغيير رايح على فين؟!
جحا زمانه: رااايح دوووغرى على محطة «الأخونة جزاز»!!
• شايف إيه من ميكروسكوب مستقبل البلد؟!
جحا: لامؤاخذة.. شايف البلد بتتأخون.. والشباب مش لاقية الثورة!!
• ماذا يعجبك فى حديقة الحيوان بالبلد؟!
أجاب جحا وهو يشير بيده: هذا الشبل من ذاك الأسد!!
• مقولة تتشاءم منها؟!
جحا زمانه: يا قاعدين يكفيكم شر المتأخونين!!
• ما نصيحتك للمرأة؟!
جحا: المرأة تبادر برسم العلم المصرى على خدودها... وتلطم لحد 6 الصبح!!
• شعار حزب الحرية والندامة؟!
جحا: «من أجلكم أنتم.. جايين نكبس على أنفاسكم»!!
• أحوال الناس فى البلد؟!
جحا: الأغنياء يزدادون غنى ونعنشة والفقراء يستعدون لثورة جياع!!
• أسخى رشاوى الانتخابات؟!
جحا: توزيع حباية «قمح» وفتفوتة لحمة من «بيت اللوح»!
• صحيح التغيير.. سُنة الحياة؟!
جحا: لأ.. دى سُنة «الهيمنة»!!
•أغنية يرددها الناس على المقهى السياسى؟!
جحا: طبعًا.. أغنية إحنا شعب مش خرونج .. ده إحنا شعب وقفتنا «بمب»!!
• شوفت أحدث «بوستر» على جدران البلد؟!
جحا: «النهضة.. كذبة شعب»!!
• الأكلة المفضلة؟!
جحا : هوه فى غيرها.. كوسة بالطاعة «المفروسة»!!
• الصحافة حرة ؟!
جحا: لأ .. دى صحافة « ُمرة» يا عبد الرحيم !!
• برنامج يعجبك فى التلفاز ؟!!
جحا: أكييييد برنامج «العزبة عزبتك»!!
• طوابير البطالة وصلت لحد فين؟!
جحا: ما شاء الله.. وصلت لحد الخط الأحمر!!
• أكبر أزمة بتعيشها البلد؟!
جحا: طبعًا.. أزمة الكذب المرورى و طوابير العيش الحاف!!
• الانتخابات نزيهة؟!
جحا: الله يرحمها الست «نزيهة» ويبشبش الطوبة اللى تحت دماغ عمتها «ثورة هانم»!!
• الشعب عايز إيه؟!
جحا: عايز مم.. ووظيفة حرة بدون غم!!
• بنات العنوسة نفسهم فى إيه؟!
جحا : نفسهم يتجوزوا.. والحكومة ترقص وتنقط على خيبتها!!
• تحب تسمع اغنية من الإذاعة ؟!
جحا: وقفة احتجاجية على رصيف الحكومة لا محطش رجلى
• الغلابة بيناموا فين اليومين دووول؟!
جحا: هوه فيه غيره... سرير الغضب الرصيفى!!
• وسيلة انهاء الطلبات؟!
جحا: هوه فى غيرها «توك توك الرشاوى»!!
• العملة المتداولة ؟!
جحا: طبعا.. قزازة الزيت وكيس السكر وأنبوبة «منفسة»!!
• الرياضة الأكثر انتشاراً ؟!
جحا: الضرب تحت حزام الجوع.. وفيييين يوجعك!!
• المحصول الرئيسى فى البلد؟!
جحا: طبعًا «المانجة والقرع الاسطمبولى»!!
• فى نهاية الجولة عايز تقول إيه لحكومتنا المقندلة؟!
جحا: عايز أقولها من ُمرها: بالرق .. هاااااى هىء!!
‏