شباك على الثورة

موضوع مؤجل ليوم الحسبا

وبينهم نعيش
تعارف
يخلى التحالف يعيش
تعيش كل طايفة
من التانية خايفة
وتنزل ستاير
بداير وشيش
لكن فى الموالد
ياشعبى ياخالد
ونهتف يعيش
يعيش أهل بلدى

يعيش المثقف على مقهى ريش
يعيش يعيش يعيش
محفلط مزفلط
كتير الكلام
عديم الممارسة
عدو الزحام
بكام كلمة فاضية
وكام اصطلاح
يفبرك حلول المشاكل قوام
يعيش المثقف
يعيش يعيش يعيش
يعيش أهل بلدى

يعيش التنابلة فى حى الزمالك
وحى الزمالك مسالك مسالك
تحاول تفكر
تهوب هنالك
تدور حياتك
بلاش المهالك
لذلك
إذا عزت توصف حياتهم
تقول الحياة عندنا
مش كذلك

وممكن تشوفهم فى وسط المدينة
إذا مر جنبك أوتومبيل سفينة
قفاهم عجينة
كروشهم سمينة
جلودهم بتصوت
دماغهم تخينة
بناتهم مبارد
تفوت فى الجليد
مافيش سخن بارد
بياكلوا الحديد
مادام نهر وارد
وجاى م الصعيد
تزيد الموارد
كروشهم تزيد
وتسمع وتسلم
بأن التنابلة
أو الأكايد
حيسمح كبيرهم
ويعمل مقابلة مع الفلاحين
ويحصل تعارف
ما بين الجميع
وتملأ المصارف
بدم القطيع
أطيع الخليفة
أطيع والديك
أطيع التنابلة
دا مفروض عليك
وتزرع وتبعت
لحى الزمالك
وحى الزمالك
مسالك مسالك
تحاول تفكر
تهوب هنالك
تودر حياتك
بلاش المهالك
لذلك
إذا حد جاب لك سيرتهم
تبسمل تكبر وتهتف كذلك
يعيش التنابلة
يعيش يعيش يعيش
يعيش أهل بلدى
يعيش الغلابة فى طى النجوع
نهارهم سحابة
وليلهم دموع
سواعد هزيلة
لكن فيها صلة
تبدر تخضر
جفاف الربوع
ياغلبان بلدنا
يافلاح ياصانع
يافحم السواقى
ياشحم المصانع
يامنتج يامبهج
ياآخر حلاوة
ياهادى ياراضى
ياعاقل ياقانع
ماتتعبش عقلك
فى شغل السياسة
وشوف انت شغلك
بهمة وحماسة
وعود عيالك فضيلة الرضا
لأن احنا طبعاً عبيد القضا
ورزقك ورزقى
ورزق الكلاب
دا موضوع مؤجل
ليوم الحساب
كمان الصحافة حتكتب فى حالتك
وتنشر مناظر لخالك وخالك
وتطلع ياسعد عليك الفناوى
ونسمع باسمك فى قلب القهاوى
تحبك مشيرة وبنات الجزيرة
وقصة غرامك تشيع فى الرداوى
يعيش عم مسعد
يعيش يعيش يعيش
يعيش أهل بلدى