الأقوال المستباحة في النقد والصراحة

خليهم يخطفوك تاني..!!!

* إلي الدكتور كمال الجنزوري رئيس الوزراء الفدائي
اللي توفر له حريته ورغيفه
ويرفع عليك صوته وسيفه
علي رأي مدحت صالح
ليشوف له كوكب تاني
يتحكم فيه علي كيفه..!!!
* إلي فلاح كفر الهنادوة أخبار اليوم
بما أن لك في البلد شعبية
وصاحب أحمد رجب
ومصطفي حسين
وشلة الناس الأكابر المكلمنجية
ياللا اغسل وشك بشوية ميه
انت اللي ناقص
اجري قبل ما يقفلوا الباب
رشح نفسك لرياسة الجمهورية..!!!

ياعلم يا محترم
مازال اسمك في عالم الفن
بيرفرف فوق هضبة الهرم..!!!
* إلي الاعلامي توفيق عكاشة قناة الفراعين
بتقولك خالتي فطومة
أفكارك الثورية
معلومة ومفهومة
ومهضومة
بس طول م الضمير العربي
في سابع نومه
وحضرتك لا مؤاخذة بتنفخ
في قربة مخرومة..!!!
إلي الدكتور سعد الكتاتني رئيس مجلس الشعب
بعد اللي حصل في المجلس
واللي جري
من نرفزة وشوشرة
النائب اللي يغلط يادكترا
يرفع ايديه لفوق
ووشه للحيطة
واضربوا علي صوابعه بالمسطرة..!!!
الي كذبة ابريل
المذكورة أعلاه
معتش تهمنا
فالكذب الآن
محاصرنا كلنا
من الشمال ومن اليمين
ومن هناك ومن هنا
وبنستعملوا طول السنة..!!!
إلي الشابة الموهوبة المطربة كارمن سليمان
مبروك يابنت النيل
مبروك الصوت الأصيل
ياريتك ظهرتي
في عصر الفن الجميل.. "ياخسارة"..!!!
إلي المستشار مرتضي منصور المرشح المحتمل لرياسة الجمهورية
اللي دماغه ثروة في القانون
يحافظ عليها ويلمها
وبلاش من الطموحات وزنها
أصل أحلام الرئاسة الأيام دي
مبتجبش همها..!!!!
إلي الدكتور ابراهيم سليمان اللي كان وزير السكان زمان
دنيا
ناس بتسكن الفلل
وفي القصور متغندرة
وناس تنام في سجن المزرعة
وناس تنام في سجن لومان طرة.. دنيا..!!!
* إلي الدكتور محمد بديع المرشد العام للاخوان المسلمين
علي رأي عم زتون
بياع اللمون
بوس الأيادي السنادي
ياحاج عبدالهادي
ضحك ع الزبون
وضحك ع الدقون..!!!
* إلي أعضاء مجلس الشعب والشوري
بيقولوا في ميدان العباسية
أساتذة القانون
في الجامعات المصرية
من كل نوعية
خبراء في كل الأمور الدستورية
دول يعملوا دستور ميخرش الميه..!!!
* إلي الملحن اللي كان مخطوف صلاح الشرنوبي
بيقولك ربيع الملواني
شاعر الأغاني
اعمل البوم وسميه
خطفوه
الملحن فلان الفلاني
ولو كسر الدنيا
خليهم يخطفوك تاني..!!!

----
لبخيت بن بيومي صاحب المساحة