حمدى السطوحى: لم أفز بجائزة نوبل للمعمار لعقم النظام السابق

بعد اعلانه عن الترشح رسميا لرئاسة مصر 2012من ساحة سجن القلعة الثلاثاء الماضى، وتصريحاته بأنه لن تكون القاهرة هى العاصمة لمصر فى الفترة القادمة بجانب تأكيده على ان السمك سيكون الوجبة الشعبية للمصريين بعد 15 عام، وفاجأ الجمع بإمساكه لقالب من الطوب اثناء اعلانه للترشح وقال انه وضع اول طوبه فى بناء مصر...انفردت بوابة الوفد بحوار المعمارى حمدى السطوحى المرشح المحتمل للرئاسة
فى البداية..عرفنا بنفسك عن قرب؟
حمدى السطوحى 41 سنه بشتغل استشارى معمارى فى مجال التصميمات المعمارية ومشاريعى لها مردود اجتماعى وثقافى عند الناس، فتحت مكتبى للهندسة المعمارية منذ 16 عام، بهتم بالعمل المجتمعى وعملت مؤسسة للوعى الثقافى والإجتماعى اسمها "بكره بأدينا" ، علشان نحصد نتيجة اللى بنعمله مع ولادنا فى الحاضر والمستقبل
ماذا عن خلفتك السياسية؟ هل تنتمى لأى تيار سياسى ؟ وما هى ميولك السياسية؟
انا مبحبش كلمة التيار السياسى اوايدلوجية لانى بنتمى لمصر وعمرى ما انتميت لحزب بعينه لأنى مش عارف اشوف مصر من خلال قالب سياسى ثابت، انا دخلت انتخابات 2005 لمجلس الشعب ايام المجزره، وكان قدامى حلين يا اما اخش مع الحزب الوطنى او اخش ضدهم، وتراجعت عن الترشح لانى كان عندى خطة انى اخش انتخابات الرئاسية لمصر
كيف كانت بدايتك السياسية؟ وكيف دخلت المجال السياسى؟
دخلت من مجال الوعى المجتمعى من زمان جدا، بس رسميا منذ إشهار مؤسسة بكره ، وكان ليا اراء سياسية، بس مكنتش بظهر فى الإعلام، لأن هدفى هو الشغل المجتمعى وخدمة الناس ، وكمان النظام البائد كان اى حد بيتكلم فى العمل المجتمعى او السياسى كان مكانه المعتقل وده اللى فجر الثوره
ما هو الدافع الحقيقى الذى جعلك تفكر فى خوض انتخابات الرئاسة؟
الدافع الحقيقى انى عاوز لما ابنى يكبر استمتع معاه فى بلد بنحبها بالشكل اللى بحبه، ولو مكسرناش الحاجز النفسى لإصلاح بلدنا لم نتقدم ولو خطوه
من الذى يساعك فى وضع البرنامج الإنتخابى التى ستخوض من خلاله الإنتخابات ؟
مجموعة من المستشارين ولكنهم مغمورين ..لأن فيه مشاريع وابحاث كتيره جدا موجوده ومحبوسه فى المكاتب، بنشتغل اننا نطلعاها للنور زى مثلا القمح والإكتفاء الذاتى لمدة 3 سنين فمش غريبة ولا حاجه، احنا نقدر، والإبحاث موجوده فى الزراعه والصناعة والتجارة
كلمنا عن حياتك الأسرية والشخصية ؟ وهل لها دور فى فكرة الترشح للرئاسة؟
انا متزوج من مروه مختاره دكتوره فى اكاديمية الفنون بالهرم، عندى طفلين يوسف 9 سنين وهنا 3 سنين، والدى متوفى وكان عميد كلية الزراعة ووالدتى دكتوره ايضا فى كلية تربية فنيه، وافتخر بأن لي جزور سيناوية لان جد ولدتى مشهور جدا فى طابا وفى سينا كلها، اسرتنا متوسطه جدا بتهتم بالتعليم والثقافة
لما كان بيبقى عندى فكره لمشروع بحولها "لجواب فى البريد" لأنى مؤمن ومصدق باللى عندى ..مثلما فعلت بمعرض سجن القلعة لشباب المعمارين من 11 سنه لأن المعمارين لهم دور كبير فى التوعية.
مش لازم علشان اكون سياسى ..ابقه وزير
من وجهة نظرك الشخصية؟ ماهى علاقه الهندسة المعمارية برئاسة الجمهورية؟
ملهاش علاقه، وان كان غريب ان كثير من روئساء الدول كانوا معماريين زى نجاد فى ايران و نتنياهو وكثير من الروئساء كانوا معماريين، لأن المعمارى بيتميز ان عنده رؤية كاملة مش مجرد معمارى فقط،، بالإضافة انه مخطط بارع
لماذا لم تعلن سابقا عن نيتك للترشح للرئاسة ؟ ولماذا الأن؟
مهم جدا ان يكون لك خطة، انا بخطط للرئاسة من 2008 وكنت حاطط خطه للرئاسة بس مش منافسة مبارك ولكن لمنافسة جمال مبارك، لأن الوقت مهم، وانا اخوض حرب مضغوطة ومعروف نتائجها للجميع، مش فتره طويلة بدون شىء أى نتائج.
ممكن توضح لنا الخطوط العريضة لبرنامجك الإنتخابى؟
اهم ما فى البرنامج ان يكون عندك المؤسسة اللى تقدر تعمله،لأن مصر حاليا بمؤسساتها مينفعش يتحط عليها برنامج، فلازم تفصل السلطات عن بعضها وتبنى نظام اقتصادى قوى وحر وانا مبفكرش انقل نظام ولكن بفكراعمل نظام يكون خاص بمصر وله اهداف واضحة وانا عامل كل مجال هصلح فيه ازاى وامته يعنى محدده مش كلام مرسل
فمثلا لما اقول ان بعد 10 سنوات هيكون عندنا 3 جامعات مصرية عالمية كده انا محدد المدة، ومصر دلوقتى امامها طريقين يا نطلع فوق قوى، يا نقع وقعه كبيرة اوى
بإختصار كلمنا عن كتابك "انما بعثت لأتمم مكارم الأخلاق"؟
الحديث الشريف "انما بعثت لأتمم مكارم الأخلاق" ده مهم جدا وانا حاولت اشرحه واقول ان المسلم الغير متخصص فى علوم الدين بيفكر ازاى، انا عملته اصدارين الأول كان عند نزول الكاريكاتيرات الساخره للرسول للرد عليه، اما الطبعه التانية فقولت فيها لازم نفهم ونعرف الدين لبعضنا وكل كلمه من الحديث لها باب فى الكتاب فمثلا انما باب وبعثت باب اخر ..وهكذا
كلمنا عن مؤسسة "بكره بأيدينا" الذى ترأس ادارتها؟ وانشتطها ؟
اسمها مؤسسة بكره بأيدينا وبنشتغل فى مجال الوعى السياسى والإجتماعى والمؤسسين مجموعة من رجال الأعمال المهتمين بالثقافة المجتمعية بنعمل توعية بالبرلمان وازاى تكون بنى ادم صالح فى المجتمع ولينا انشطه مختلفة وبنعمل دورات توعية عن ايه هو البرلمان وازاى تنتخب زى مبادرتى "وعد النائب دين عليه" وتم اشهار المؤسسة بعد الثوره ب3 شهور وتمويلها من مؤسسيها فقط
ماذا عن المبادرات الذى اطلقتها "وعد النائب دين عليه" "ودوله دوله بعد العسكر" "وخليك فى مصر علشان ولادك"؟
ملخص الأولى ان العلاقه بين النائب والناخب لا تنتهى بالصندوق الإنتخابى وكثير من النواب تبنوها مثل عمرو حمزاوى، اما دوله دوله بعد العسكر، فالعسكر هيمشوا اكيد فلازم نفكر كيف نكون الدولة الحازمه بالقانون
هل فعلا.. فزت بجائزة نوبل للمعمار؟ولماذا؟
للأسف لا ..وهى اسمها جائزة "اغاخان للمعمار" وتعادل جائزة نوبل، وتم ترشيحى اليها ، وتعطى الجائزه للمبنى الذى اثر فى المجتمع ، وهناك 3 معمارين فازوا بها سابقا وانا كنت هكون الرابع ، ومأخدتهاش بسسب عقم النظام لأن مشروعى كان خدمى لقرية الشيخ الشاذلى فى العريش لمساعدة اهل القرية بتوصل ماء مبرد للشرب ومحلات ومساكن
طيب.. ليه مفزتش بالجائزه؟
لأن القائمين على المسابقه عندما جائوا لتقييم المشروع على الطبيعة وجدوا المشروع متوقف فالمحافظة قافلة الحمامات علشان متتبهدلش، وقافلة المياه عن الخزان والمحلات مغلقه واهل القرية ليسوا مستفيدين
وكيف كان رد فعلك؟
كلمت المحافظ وقولت له ان مصر خسرت جائزه كبيره، وانت ستُحاسب على كلما حدث ، فدخلنى السجن لمدة 10 ساعات، وقالولى ازاى تتكلم مع المحافظ كده، وهو نفسه المحافظ اللى خرجنى من النقطه لأنه خاف الدنيا تتقلب عليه بعد ما حد يسأل عنى ويعرف انى اتحبست، وساعتها شفت بعينى اد ايه الظلم وحش
...واللى عجبنى ان لجنة المسابقه بعتولى جواب شكر وانهم اسفين لما حدث.
لماذا اتخذت شعار"بنحلم ونقدر" لحملتك الإنتخابية؟
لأن احنا لازم نحلم ونقدر ننفذاحلامنا ونحولها لواقع وتكون حلم جماعى لمصر
كيف تمول حملتك الإنتخابية ؟وهل يساعدك احد؟
بمولها تمويل ذاتى شخصى وبمساعدة من اعضاء الحملة والأصدقاء والأقارب، وعند فتح باب التبرعات سنفتحها لكل الشعب، والأهم فى الموضوع هم المتطوعين
هل عملك كمهندس معمارى يكفى انك تغطى حملة انتخابية للرئاسة؟
القوه انك تعمل حاجات قوية جدا بتكلفة بسيطة، فلازم احسب ان رئيس الجمهورية هياخد كام فى الأربع سنوات وبناءا عليه ابدأ اصرف، وحملتى لن تتعدى ال10او 20% من المرتب اللى هاخده كرئيس جمهورية ل4 سنوات
لماذا اخترت السمك أن يكون هو الوجبه الشعبية للمصريين؟ ولماذا لم تكن اللحوم؟
لأن دى امكانيات مصر فعندنا بحر احمر وابيض ونهر النيل وبحيرة ناصر والبردويل ده غير مزارع السمك وهو انضف حاجه نأكلها، ولو اصبح الأكلة الشعبية، فكثير من الناس هتبقى صحتها كويسة واتفرج لو ده حصل وبجانب ذلك بقايا ومخلفات السمك عباره عن اعلاف سيكون غذاء للحيوانات والدواجن
كيف فكرت بألا تكون القاهرة عاصمة مصر؟ ولماذا؟
النظام القديم اختزل مصر فى القاهره فكان اكبر عماره واكبر مول وافضل شارع واحسن مصنع فى القاهره وده خطأ
لازم يكون لينا اكتر من عاصمة زى عاصمة سياسية واخرى حضارية وتجارية وسياحية ، فمثلا الحدود مهمله تماما، ولازم نعمل تنمية لتفعيل ادوار الأقاليم لأنها مهمشه تماما
من وجهة نظرك ايه اللى بيميز حضرتك عن المرشحين الأخرين ؟ وايه اللي يخلى الناس تنتخبك عن غيرك؟
اللى هيميزنى عن غيرى هو الرؤية والفكر والمقومات الشخصية لأن اختيار الرئيس بيكون من خلال برنامج ، لأن الأمانه والصدق دول اساسى وشرط لازم فى كل الناس، انما انا معمارى عندى رؤية وتخطيط واضح عن غيرى
اذا اصبحت رئيسا، كيف ستستطيع التعامل مع التيارات الإسلامية الممثلة فى مجلس الشعب والحكومة لقادمة؟
انا مبحبش كلمة مسلم ومسيحى، لأننا مصرين، وان الأرضية المشتركة بن اى طرفن فى مصر هى حبها، وانا هعمل على تكاملنا وعدم التناظر بين كل التيارات لهدف واحد
ماهو موقفك من الجيش والمجلس العسكرى إذا أصبحت رئيسا ؟هل ستكون رئيسه؟وهل ستناقش ميزانية الجيش فى البرلمان؟
الجيش ده اللى بيحمينا ولازم يكون قوى وهعيد بناءه..انما المجلس العسكرى هو قائم بأعمال رئيس الجمهوريه وبيعمل دوره حته لو أخطأ بس بمسئولية ويجب محاسبته، وانا لم ارجح ابدا ان يكون الرئيس القادم هو رئيس المجلس الأعلى للقوات المسلحة، او رئيس اى حاجة تانية غير مصر، فمثلا قرار الحرب او قانون الطوارىء لا يستطيع الرئيس او قائد الجيش اتخاذه الا بموافقة البرلمان
هل ستوافق على مناقشة ميزانة الجيش فى مجلس الشعب علنيا؟
من اللازم ان تكون مجمل الميزانة معروفه لدى الجميع ومناقشتها بعلانية امام الشعب، ولكن لابد من لجنة للدفاع تناقش الأشياء والجوانب السرية منها لأن الشعب لازم يعرف فلوسه بتروح فين
ما هى رؤيتك لإستعادة الملف الأمنى مره اخرى للشارع المصرى؟
الأمن احساس، فلازم كل مواطن يشعر به وعلاجه مش انك تعالج المؤسسة الأمنية، ولكن من اللازم علاج الأسباب اللى عملت كده يعنى البلطجى اشغله وامنع ظاهرة اطفال الشوارع واضبط العشوائيات، والكلام ده له طريقن الأول طويل المدى وهو الثقافة والوعى والأخر هو قانون صارم للداخلية
فى رأيك ممكن تصفى فى سباق الرئاسة مع مين ؟
مع ا حد وكل مرشحن الرئاسة لهم افكار جديدة، ولواصبحت رئيسا هعمل اول اجتماع لكل المرشحين لعرض مشروعاتهم وافكارهم للأستفاده منها وهعمل لجنه لهذا الموضوع لأن خساره نفتقدها
هل توافق ان تكون نائبا للرئيس ؟
ليس لى اى مانع ان اتعاون مع اى حد لأن هدفنا اصلاح مصر، ولو اى حد عرض عليا ان اساعده مش هتردد حتى لو اشتغلت بواب
مشروعاتك المعمارية الملصقة على حوائط مكتبك زى "سجن القلعه وتحويله لمقر ابداعى" وغيره من المشاريع..هيكونوا على ارض الواقع امته؟
لأن مكنش عندنا نظام ادارى ناجح فكلها وضعت فى الأدراج، والمشارع دى كانت هتغير مستقبل مصر، ولم تنفذ الإ بعد صلاح المنظومة
اذا اصبحت رئيسا هل ستغلق مكتبك للأعمال الهندسية؟ أما ماذا ستفعل؟
معايا شباب فى المكتب يقدروا يكملوا هدفنا ومشاريعنا وانا واثق فيهم لأن المكتب ده بتاعتا كلنا ومش بيقف على حد